Yehova ke sadisa nge ntangu nge ke kutana na bamambu ya mpasi

1. Yinki beto zaba?

BETO ke bisadi ya Yehova. Na yawu, beto zaba ti yandi ke zolá beto mpe yandi zola ti beto vanda na luzingu ya kulutila kitoko. (Rom. 8:35-39) Beto ke na kundima ti ntangu beto ke sadilá malongi ya Biblia, beto ke kuzwá kaka bambote. (Iza. 48:17, 18) Kasi, yinki beto me bonga kusala kana beto me kutana na bamambu ya mpasi?

2. Wapi bamambu ya mpasi beto lenda kutana na yawu, mpe yinki beto lenda yufula ntangu ya ke kuminá beto?

² Bisadi nyonso ya Yehova ke kutaná na bamambu ya mpasi. Na kifwani, muntu ya dikanda ya beto lenda sala mambu yina lenda nyongisa beto. Beto lenda zwa kimbevo ya ngolo yina lenda kanga beto nzila na kusala mambu yina beto vandá na nsatu ya kusala samu na Yehova. Bamambu mutindu bamvula ya nene lenda salama kisika yina beto kele. To beto lenda kutana na bankwamusu samu beto ke sadilá Yehova. Ntangu beto ke kutaná na bamambu ya mutindu yayi, beto lenda banda kuyufula: ‘Samu na yinki ya ke na kuminá munu? Mu me sala kwandi mambu ya yimbi? Yehova me bika kwandi munu?’ Ya me kuminá nge na kuvanda na makanisi ya mutindu yayi? Kana ni yawu, kulemba ve. Bisadi mingi ya Yehova nwaná na makanisi ya mutindu yayi.​—Nku. 22:1, 2; Aba. 1:2, 3.

3. Nkunga 34:19 ke na longá beto yinki?

³ Tanga Nkunga 34:19. Nkunga yayi ke na zonzilá bamambu zole ya mfunu: 1) Bisadi ya Yehova ke kutaná na bamambu ya mpasi. 2) Yehova ke vuukisá beto na bampasi ya beto. Wa’ faso yandi ke salak’ yawu? Mosi ya bafaso yina yandi ke salak’ yawu, ni na kusadisa beto na kuvanda na faso ya kulunga ya kutadila luzingu na yinza yayi. Yehova pesá beto nsilulu ti beto ke kuzwa kilengi na kusadila yandi, kasi yandi ke zonzá ve ti beto ke kutana ve na bamambu ya mpasi. (Iza. 66:14) Yandi ke sadisá beto na kutula mingi makanisi ya beto na bilumbu yina ke kwiza, ntangu beto ke kuzwa luzingu yina yandi kanisá samu na beto, luzingu ya ntangu nyonso. (2 Ko. 4:16-18) Kasi, tekila ntangu yina kuma, yandi ke sadisá beto samu beto bika ve Kusadila yandi.​—Bid. 3:22-24.

4. Yinki beto ke zonzila na disolo yayi?

⁴ Na disolo yayi, beto ke zonzila bamambu yina beto lenda longoka na bisadi ya Yehova ya ntangu ya ntama, mpe ya ntangu ya beto. Mutindu beto ke tala yawu, beto lenda kutana na bamambu ya mpasi. Kasi, kana beto tula ntima na Yehova, yandi ke bika beto ata fioti ve. (Nku. 55:22) Ntangu beto ke na zonzilá bifwani yayi, nge lenda yufula: ‘Kana mambu ya faso yayi kumina munu, yinki mu ke sala? Wa’ faso bifwani yayi ke na kumisá dyaka ngolo kiminu ya munu na Yehova? Wapi yina ke bileso yina mu lenda sadila na luzingu ya munu?’

NA NTANGU YA NTAMA

5. Wapi mpasi Labani talisá Yakobi? (Tala kizizi ya paje ya ntete ya mukanda.)

⁵ Bisadi ya Yehova ya ntama kutaná na bamambu ya mpasi. Beto zonzila Yakobi. Tata ya yandi fidisak’ yandi na Labani samu na kukwenda kwela mosi ya bana ya yandi ya kento. Labani vandá sambilá Yehova, mpe tata ya Yakobi zonzá na Yakobi ti Yehova ke sakumuna yandi mingi. (Kub. 28:1-4) Na yawu, Yakobi salá mambu yina ba zonzá na yandi na kusala. Yandi biká bwala ya Kanana samu na kukwenda kisika yina Labani vandaka. Labani vandá na bana zole ya kento, Lea na Rashele. Yakobi zolá Rashele leki ya Lea, mpe yandi ndimá kusala bamvula 7 samu Labani pesa yandi Rashele. (Kub. 29:18) Kasi bamambu lutá ve faso Yakobi vandá kanisa. Labani vunak’ yandi samu yandi kwela Lea, yaya ya Rashele. Labani ndimá ti Yakobi kwela Rashele lumingu yina ke landa. Kasi, samu na kusala yawu, yandi zolá sala dyaka bamvula 7 samu na Labani. (Kub. 29:25-27) Labani vandá mfumu mosi ya mbaki samu na Yakobi. Na kati ya bamvula 20 Labani futá ve Yakobi mutindu ba wisanaka.​—Kub. 31:41, 42.

6. Wapi bamambu ya nkaka ya mpasi Yakobi kutaná na yawu?

⁶ Yakobi kutaná na bampasi ya nkaka. Yandi vandá na bana mingi, kasi bantangu ya nkaka, bana ya yandi vandá wisaná ve. Ba kwendá tii na kutekisa mpangi ya bawu Yozefi mutindu ngaamba. Simeoni na Levi, bana zole ya Yakobi fwisá dikanda ya bawu nsoni mpe losá mvindu na nkumbu ya Yehova. Dyaka Rashele kento yina Yakobi vandá zolá mingi kufwaka na zulu ya kubuta mwana ya bawu ya zole. Mpe ntangu nsatu ya ngolo kumaka, ya natá Yakobi na kukwenda na Ezipte ata ti yandi kumá kiboba.​—Kub. 34:30; 35:16-19; 37:28; 45:9-11, 28.

7. Wa’ faso Yehova lakisá Yakobi ti yandi ndimak’ yandi?

⁷ Ata bamambu ya mpasi nyonso yayi, kiminu ya Yakobi na Yehova mpe na bansilulu ya yandi manisá ve, mpe Yehova lakisá Yakobi ti yandi ndimak’ yandi. Na kifwani, ata ti Labani vuná Yakobi bambala mingi, Yehova pesak’ yandi bimvwama mingi. Kanisa mpe na matondo yina Yakobi vutulá na Yehova, ntangu yandi kutaná dyaka na mwana ya yandi Yozefi, yina yandi vandá kanisa ti yandi kufwaka. Kindiku ya ngolo yina Yakobi vandá na yawu na Yehova sadisak’ yandi na kununga bampasi yina yandi kutaná na yawu. (Kub. 30:43; 32:9, 10; 46:28-30) Beto mpe ke lenda kununga bampasi yina ke kuminá beto kana beto ke na kindiku ya ngolo na Yehova.

8. Wapi dikanisi Davidi vandá na yawu?

⁸ Mfumu Davidi lendá ve kusala bamambu nyonso yina yandi kanisá kusala samu na Yehova. Na kifwani, yandi vandá na nsatu mingi ya kutungila Nzambi ya yandi tempelo. Yandi zonzá dikanisi ya yandi na mbikudi Natani. Natani zonzá na yandi: ‘Sala mambu nyonso yina kele na ntima ya nge, samu Nzambi ya tsyeleka kele na nge.’ (1 Ns. 17:1, 2) Beto lenda kanisa ti mambu yina Natani zonzá na Davidi kindisak’ yandi mingi. Ntangu ya nkaka, na manima ya kusolola na Natani, Davidi bandá kubongisa bamambu samu na kisalu ya nene yayi.

9. Yinki Davidi salá na manima ya kuwa nsangu yina Natani pesak’ yandi?

⁹ Mwa ntangu fioti na manima, mbikudi ya Yehova vutuká kutala Davidi. Yandi vandá ve na nsangu ya mbote samu na Davidi. “Kaka na mpimpa yina,” Yehova zonzá na Natani ti ni Davidi ve ke tunga tempelo, kasi ni mwana ya yandi ke sala yawu. (1 Ns. 17:3, 4, 11, 12) Yinki Davidi salá ntangu yandi kuzwá nsangu yayi? Yandi ndimá kusoba makanisi ya yandi. Yandi tulá bangolo ya yandi nyonso samu na kuvukisa mbongo mpe bima nyonso yina mwana ya yandi Salomoni zolá vanda na yawu nsatu samu na kulungisa kisalu yina.​—1 Ns. 29:1-5.

10. Wa’ faso Yehova sakumuná Davidi?

¹⁰ Kaka na manima ya kuzonza na Davidi ti ni yandi ve ke tunga tempelo, Yehova salá luwawanu na yandi. Yehova pesá na Davidi nsilulu ti mosi ya mitekolo ya yandi ke vanda mfumu samu na ntangu nyonso. (2 Sa. 7:16) Na yinza ya malu-malu, na kati ya bamvula 1 000 ya Kimfumu ya Yesu, Davidi ke vanda na kilengi mingi ntangu yandi ke zaba ti ni mosi ya mitekolo ya yandi ke na yalaka. Disolo yayi ke na longá beto ti, ata ti beto ke ve na ngolo ya kusala bamambu nyonso yina beto lenda kanisa kusala samu na Yehova, Nzambi ya beto lenda sakumuna beto na bafaso ya nkaka yina beto lenda kanisa ve.

11. Wa’ faso Yehova sakumuná Bakristo ya ntete ata ti Kimfumu ya Nzambi kumá ve na ntangu yina ba vandá vingila yawu? (Bisalu 6:7)

¹¹ Bakristo ya ntete kutaná na bamambu ya mpasi. Na kifwani, ba vandá na nsatu Kimfumu ya Nzambi kwiza na mbangu, kasi ba zabá ve na wapi ntangu ya zolá salama. (Bis. 1:6, 7) Yinki ba salaka? Ba vandá kaka na mingi ya kusala na kisalu ya kusamuna. Ntangu ba talá mutindu nsangu ya mbote vandá mwangana na bisika mingi, ya lakisá bawu pwelele ti Yehova vandá sakumuna bangolo ya bawu.​—Tanga Bisalu 6:7.

12. Yinki Bakristo ya ntete salá ntangu nsatu ya nene mwanganaka?

¹² Na ntangu mosi, nsatu ya nene mwanganá “na ntoto ya muvimba.” (Bis. 11:28) Mambu yayi vandá mpe mpasi samu na bakristo ya ntete. Kanisa na mpasi yina nsatu yayi natiná bawu. Ntangu ya nkaka, bamfumu ya makanda vandá na manyongi na yina me tadila yinki ya kusala samu na kudikisa dikanda ya bawu. Beto lenda kanisa mpe na bantwenya yina vandá na nsatu ya kusala dyaka mingi na kisalu ya Yehova. Ntangu ya nkaka, ba kanisá na kuvingila tii nsatu ke manisa samu na kulungisa dikanisi ya bawu. Ata mambu ni mambu yina vandá na bawu, bakristo yayi ndimá kusala bamambu na faso ya malu-malu. Ba salá nyonso yina ba lendá kusala samu na kubika ve kusamuna, mpe ba kabulá na kilengi nyonso bima yina ba vandá na yawu na bampangi ya Zude.​—Bis. 11:29, 30.

13. Wapi bamambu ya mbote Bakristo ya ntete kuzwá na ntangu ya nsatu?

¹³ Wapi bambote Bakristo ya ntete kuzwá na ntangu ya nsatu? Ba yina kuzwá bima yina bampangi fidisá bawu talá diboko ya Yehova. (Mat. 6:31-33) Ntangu ya nkaka, mambu yayi kulisá dyaka luzolo ya bawu samu na bampangi yina fidisá bawu bima. Mpe ba yina pesá bima to ba yina tulá diboko na kisalu ya kusadisa bampangi kuzwá kilengi na kukabula. (Bis. 20:35) Yehova sakumuná bawu nyonso samu ba ndimá faso ya malu-malu ya kusala.

14. Yinki kuminá Barnabasi na ntumwa Polo, mpe wapi bambuma ya butaka? (Bisalu 14:21, 22)

¹⁴ Bambala mingi Bakristo ya ntete kutaná na bankwamusu. Bantangu ya nkaka, ba vandá vingila ata fioti ve yawu. Beto tala mambu kuminá Barnabasi na ntumwa Polo ntangu ba vandá samuna na bwala ya Listre. Na kubanda, bantu yambá bawu na kilengi, mpe kuwá bawu. Kasi na manima, bantu yina vandá zolá ve kisalu ya bawu “ndimisaka bimvuka ya bantu” mpe ba ya nkaka bulá Polo matadi mpe ba kanisá ti yandi kufwaka. (Bis. 14:19, nwt-MK.) Kasi Barnabasi na Polo kwendá na kisika ya nkaka samu na kusamuna. Wapi bambuma kisalu ya bawu butaka? Kisalu ya bawu salá ti “bantu mingi kuma bilandi ya Yesu.” Dyaka, bamambu yina ba zonzá mpe kifwani ya bawu kindisá bampangi. (Tanga Bisalu 14:21, 22.) Samu Barnabasi na Polo lembá ve na mantwala ya bankwamusu yina ba kutaná na yawu, bantu mingi kuzwá bambote. Kana beto lemba ve kusala kisalu yina Yehova me lomba na beto na kusala, yandi ke sakumuna beto.

NA NTANGU YA BETO

15. Yinki kifwani ya mpangi A. H. Macmillan ke na longá nge?

¹⁵ Bamvula tekila 1914, bisadi ya Yehova vandá vingila bamambu ya nene. Beto zonzila kifwani ya mpangi A. H. Macmillan. Mutindu bampangi mingi na ntangu yina, yandi mpe vandá vingila kukwenda na zulu na mwa ntangu fioti. Na discours yina yandi salá na septembre 1914, yandi zonzaka: “Yayi lenda vanda discours ya munu ya nsuka. Mu ke sala dyaka ve discours ya nkaka.” Kasi ya vandá ve discours ya yandi ya nsuka. Mpangi Macmillan sonikaka: “Ntangu ya nkaka, mingi na kati ya beto vandá vingila ti ntangu yina beto ke kwenda na zulu kwiza na mbangu.” Yandi bwelaka: “Mambu yina beto zolá sala ni kuvanda kaka na mingi ya kusala na kisalu ya mfumu.” Na manima, mpangi Macmillan vandá kaka na mingi ya kusala. Yandi vandá na tiya na kisalu ya kusamuna. Yandi kuzwá bweso ya kukindisa bampangi mingi yina vandá na boloko samu ba mangá kukota na bamambu ya yinza yayi. Mpe ata ntangu yandi nuná mingi, yandi vandá kwenda kaka na balukutakanu. Wapi bambote mpangi Macmillan kuzwá na yina yandi sadilá na faso ya mbote ntangu yina bikaná na yandi tekila yandi kwenda na zulu? Na 1966, mwa ntangu fioti tekila yandi kufwa, yandi sonikaka: “Kiminu ya munu ke kaka ngolo mutindu na ntama.” Ya ke kifwani ya mbote samu na beto nyonso, mingi-mingi kana mambu ya mpasi yina beto ke na kutaná na yawu ke na manisá ve na ntangu beto vandá vingila.​—Ebr. 13:7.

16. Wapi mambu ya mpasi kuminá mpangi Herbert Jennings na kento ya yandi? (Zaki 4:14)

¹⁶ Bisadi mingi ya Yehova ke nwaná na bimbevo yina ba vandá vingila ve. Na kifwani, na disolo ya luzingu ya yandi, mpangi Herbert Jenningsb zonzilá kilengi yina yandi na kento ya yandi vandá na yawu ntangu ba vandá bamisionere na Ghana. Kasi ba kwizá tala yandi na kimbevo ya yintu. Mpangi Jennings sadilá mambu yina ke na Zaki 4:14 mpe zonzá ti “mambu yina kuminá bawu vandá mambu ya ‘mbasi’ yina ba vandá vingila ve.” (Tanga.) Yandi sonikaka: “Beto ndimá mambu yina vandá kumina beto. Na yawu, beto bongamá samu na kukatuka na Ghana, kubika bandiku ya beto mpe kuvutuka na Canada, samu na kusosa lunyakusu.” Yehova sadisá mpangi Jennings na kento ya yandi samu ba bika ve kusadila yandi ata bamambu ya mpasi yina ba vandá kutana na yawu.

17. Wa’ faso kifwani ya mbote ya mpangi Jennings sadisá bampangi?

¹⁷ Bamambu ya tsyeleka yina mpangi Jennings zonzá na disolo ya yandi sadisá bampangi mingi. Mpangi mosi ya kento sonikaka: “Ya ke ve na disolo yina mu tangá yina simbá ntima ya munu mutindu disolo ya mpangi Jennings. [. . .] Ntangu mu tangá ti ba biká kisalu ya bawu ya bamisionere samu na kukwenda kipe nzutu, ya sadisá munu na kutala bamambu ya munu na faso ya kulunga.” Mpangi ya nkaka ya bakala soniká mambu ya mutindu mosi: “Mu vandá kuluntu ya kimvuka na kati ya bamvula 10. Kasi samu mu kuzwá kimbevo ya yintu, mu bikaka. Samu mu talá ti mu lendá ve luzingu ya munu, ya vandá lembisa munu na kutanga masolo ya luzingu ya bampangi. [. . .] Kasi kutala faso mpangi Jennings kangá ntima kindisá munu mingi.” Ya ke na bambulá beto moyo ti ata na ntangu bamambu ya mpasi ke kuminá beto, beto lenda kindisa bampangi. Ata bamambu ke salamá ve kaka mutindu beto ke kanisá, beto lenda vanda kaka bifwani ya mbote na yina me tadila kiminu mpe kifu ya kukanga ntima.​—1 Pi. 5:9.

18. Mutindu kizizi ke na lakisak’ yawu, yinki nge ke na longoká na kifwani ya mufwidi mosi yina ke na bwala ya Nigeria?

¹⁸ Bamambu mutindu kimbevo ya COVID-19, me nata bampasi na bisadi mingi ya Yehova. Na kifwani, na Nigeria, mpangi mosi yina fwidilá bakala vandá dyaka ve na bima ya kudya. Kilumbu mosi na suka, mwana ya yandi ya kento yufulak’ yandi, yinki ba ke kudya na manima ya kumanisa mwa ndambu ya loso yina bikaná na bawu. Mpangi ya beto ya kento zonzá na mwana ya yandi ti ba ke ve na mbongo to madya, kasi ba me bonga kulanda kifwani ya mufwidi ya Sarefati, kulamba madya ya bawu ya nsuka mpe kutula kiminu ya bawu nyonso na Yehova. (1 Mf. 17:8-16) Tekila ba banda kukanisa na yina ba ke kudya na midi, ba kuzwá bima yina bampangi fidisá bawu. Madya yina ba kuzwá, ba zolá kudya yawu na kati ya balumingu kuluta zole. Mpangi ya kento yayi zonzá na mwana ya yandi ti, ya kamwisak’ yandi na kutala ti Yehova vandá kuwá mbote-mbote mambu yina yandi zonzá na mwana ya yandi. Ya tsyeleka, ntangu beto ke tulá ntima ya beto na Yehova, bamambu ya mpasi yina ke kuminá beto bubu yayi lenda sala ti beto kuma dyaka pene-pene na Yehova.​—1 Pi. 5:6, 7.

19. Wapi bankwamusu Aleksey Yershov kutaná na yawu?

¹⁹ Na bamvula yayi me lutá, bampangi ya beto mingi me kutana na bankwamusu yina ba vandá vingila ve. Beto zonzila kifwani ya mpangi Aleksey Yershov, yina ke vandá na bwala ya Russie. Mpangi Yershov kuzwá mbotokolo na 1994. Na ntangu yina, luyalu vandá pesá nzila na Bambangi ya Yehova na kulungisa kisalu ya bawu. Kasi na manima, bamambu sobaka. Na 2020, bambulu-mbulu kotá na yinzo ya mpangi Yershov na kutala kana ba ke kuzwa kima ya yimbi, mpe ba simbá bima mingi yina yandi vandá na yawu. Bangonda na manima, luyalu zonzá ti, yandi vandá muntu ya yimbi. Ni muntu yina vandá longoká Biblia na yandi muntu tekak’ yandi. Muntu yango vuná mpangi ya beto ti yandi vandá na nsatu ya kulongoka Biblia mpe yandi salá video ya masolo yina ba vandá salaka. Ya ke mambu ya mpasi mingi.

20. Yinki mpangi Yershov salá samu na kukumisa ngolo kindiku ya yandi na Yehova?

²⁰ Mambu yina mpangi Yershov kutaná na yawu natiná kwandi yandi bambote? Ee. Kindiku ya yandi na Yehova kumá dyaka ngolo. Yandi me zonza: “Bubu yayi, munu na kento ya munu ke sambilá mingi kulutila na ntama. Me kwiza tala ti kaka ni na lubakusu ya Yehova mu me lenda kununga na mpasi yayi.” Yandi me bwela: “Kulongoka Biblia mpe mikanda ya beto ke sadisá munu na kulemba ve. Mu ke yindulá na bifwani ya bisadi ya Yehova ya ntama. Na Biblia, ya ke na masolo mingi yina ke lakisá ti ya ke mfunu na kutekita ve mpe na kulakisa kiminu na Yehova.”

21. Yinki beto me longoka na disolo yayi?

²¹ Yinki beto me longoka na disolo yayi? Na yinza yayi, beto lenda kutana na bamambu mingi ya mpasi. Ata mpila yina, ntangu nyonso Yehova ke sadisá bisadi ya yandi samu ti ba ke tudilak’ yandi ntima. Mutindu verse ya yintu dyambu me zonza yawu, ‘muntu ya lunungu ke kutanaka na bampasi mingi, kasi Yehova ke vuukisaka yandi na bampasi yina nyonso.’ (Nku. 34:19) Beto bika ata fioti ve kutula makanisi ya beto nyonso na ngolo yina Yehova ke pesá beto, kasi ve na bamambu ya mpasi yina beto ke kutaná na yawu. Kana beto sala yawu, mutindu ntumwa Polo, beto ke zonza: “Mu lenda kusala mambu nyonso yayi na lusalusu ya muntu yina ke pesaka munu ngolo.”​—Flp. 4:13.