Vanda ya kukubama samu na kilumbu ya Yehova

1. Yinki beto me lunga kusala samu na kuvuuka na kilumbu ya Yehova?

NA BIBLIA, “kilumbu ya Yehova” zola zonza ntangu yina Yehova ke kufwa bambeni ya yandi mpe ke vuukisa dikanda ya yandi. Yehova salak’ yawu na ntama. (Iza. 13:1, 6; Ezk. 13:5; Sof. 1:8) Na ntangu ya beto, “kilumbu ya Yehova” ke banda ntangu bamfumu ya yinza ke kufwa Babiloni ya nene mpe ya ke manisa na mvita ya Armagedoni. Yesu zonzá na beto na kuvanda ya “kukubama” samu na mpasi ya nene to ‘bilumbu yina bantu ke lutila na kutala mpasi.’ Mambu yayi zola zonza ti beto me lunga kuvanda ya kukubama ntangu nyonso. Na yawu, samu na kuvuuka, beto zolá banda kubongama bubu yayi.​—Mat. 24:21; Luke 12:40.

2. Wa’ faso mukanda ya 1 Batesalonika lenda sadisa beto?

² Na kati ya mukanda ya 1 Batesalonika, ntumwa Polo sadilá bifwani mingi samu na kusadisa bakristo na kuvanda kaka ya kukubama samu na kilumbu ya Yehova. Ntangu yandi soniká mukanda yango, yandi zabá ti kilumbu yango zolá kwiza ve na ntangu yina. (2 Tes. 2:1-3) Kasi yandi vandá sosa kunata bampangi ya yandi na kuvanda ya kukubama mutindu kilumbu yango ke kwiza mbasi. Malongi ya yandi lenda sadisa mpe beto. Beto tala faso malongi yango ke sadisá beto na kuzaba 1) wa’ faso kilumbu yango ke kwiza, 2) banani ke vuuka ve na kilumbu yango mpe 3) wa’ faso beto lenda bongama samu na kuvuuka?

WA’ FASO KILUMBU YA YEHOVA KE KWIZA?

3. Samu na yinki Polo zonzá ti kilumbu ya Yehova ke kwiza mutindu muyibi ke kwizá na kati ya mpimpa? (Tala mpe kizizi.)

³ “Mutindu muyibi ke kwizaka na kati ya mpimpa.” (1 Tes. 5:2) Yayi ni kifwani ya ntete yina Polo me sadila samu na kuzonzila faso kilumbu ya Yehova ke kwiza. Miyibi ke zonzá ve ntangu ba ke kwizaka. Ya ke salá ti beto pamuka ntangu ba ke yibá beto. Kilumbu ya Yehova ke vanda mpe mutindu yina samu bantu mingi ke pamuka yawu. Ata bakristo ya tsyeleka lenda pamuka faso bamambu ke kwiza na mbangu. Kasi beto ke kufwa ve mutindu bantu yina ke salá bamambu ya yimbi.

4. Samu na yinki beto lenda zonza ti kilumbu ya Yehova ke vanda mutindu misongo?

⁴ “Mutindu misongo ke simbaka kento yina ke na kivumu.” (1 Tes. 5:3) Ntangu kento ke vandá na kivumu, yandi zaba ti yandi ke vanda na misongo. Kasi yandi zaba ve na wapi ntangu misongo yango ke banda. Misongo yango ke salamá na mbala mosi, ya ke salá mpasi mpe ke kwizá kaka. Faso mosi mpe, beto zaba ve wapi kilumbu mpe na wapi ntangu kilumbu ya Yehova ke banda, beto zaba ti ya ke kwiza kaka na mbala mosi, mpe bantu yina ke salá bamambu ya yimbi ke lenda ve kukima yawu.

5. Samu na yinki beto lenda zonza ti mpasi ya nene ke mutindu suka-suka?

⁵ Mutindu suka-suka. Kifwani ya tatu yina Polo me sadila ke na zonzilá dyaka muyibi yina ke yibá na kati-kati ya mpimpa. Kasi awa Polo ke na fwanisá kilumbu ya Yehova na ntangu yina suka ke kuminá muyibi. Muyibi lenda pamuka suka kana makanisi ya yandi nyonso ke kaka na bima yina yandi ke na nsatu ya kuyiba mpe ba lenda simba yandi. (1 Tes. 5:4) Faso muyibi, bantu lenda pamuka ti mpasi ya nene me banda kana ba ke na biká ve kusala bamambu yina Nzambi ke zolá ve. Kasi beto lenda vanda ya kubongama kana beto ke na losá bamambu yina Yehova ke zolá ve mpe beto ke na landá “konso mutindu ya bumbote, ludedemo, mpe butsyelika.” (Ef. 5:8-12) Ntangu yayi beto tala bifwani zole yina Polo me sadila samu na kulakisa banani ke vuuka ve.

BANANI KE VUUKA VE NA KILUMBU YA YEHOVA?

6. Samu na yinki beto lenda zonza ti bantu mingi ke na lalá pongi? (1 Batesalonika 5:6, 7)

⁶ “Bayina ke lalaka pongi.” (Tanga 1 Batesalonika 5:6, 7.) Polo ke na lakisá ti ba yina ke vuuka ve na kilumbu ya Yehova ke mutindu ba yina ke lalá pongi. Na kati ya pongi ba lendá tala ve ti ntangu ke na lutaka. Mpe, ba lendá zaba ve bamambu yina ke na salamaka. Ntangu bamambu ya mfunu ke na lutá, ba lendá zaba ve mpe ba lendá sala ata kima. Faso mosi mpe bubu yayi, bantu mingi ke na kati ya pongi ya kimpeve. (Rom. 11:8) Ya ke na talaná pwelele ti beto ke na zingá na “bilumbu ya nsuka” mpe mpasi ya nene me kuma pene-pene, kasi ba ke ve na ndimak’ yawu. Ntangu bamambu ke sobá na yinza, ya ke natá bantu na kuvumbuka na kimpeve mpe na kundima kuwa nsangu ya kimfumu. Kasi, mingi ke vutuká dyaka na pongi ya kimpeve. Ata ba yina ke ndimá ti kilumbu ya Yehova ke kwiza, ke talá ti ya ke ntete ntama. (2 Pi. 3:3, 4) Samu na beto, malongi yayi ya Polo ke sadisa beto na kulala ve mpe na kutala ti kilumbu ya Yehova ke dyaka ve ntama.

7. Samu na yinki beto lenda zonza ti bantu yina ke salá bamambu ya yimbi na meso ya Nzambi ke mutindu ba yina ke kolá malafu?

⁷ “Bayina ke kolaka malafu.” Polo ke na lakisá ti bantu yina Yehova ke kufwa ke mutindu ba yina ke kolá malafu. Ntangu muntu ke kunwa malafu mingi, ya ke vandá mpasi na yandi na kuzaba yinki ya kusala. Yandi ke baká ve mikanu ya mbote. Faso mosi mpe bantu ya yimbi ke kangá makutu na mambu yina Nzambi ke zonzá mpe ba ke soolá kusala bamambu yina ke nata bawu na lufwa. Kasi bakristo me bonga kubumba makanisi ya bawu. (1 Tes. 5:6) Muntu mosi ya mayela zonzaka: “Muntu yina ke bumbá makanisi ya yandi ke tekita ve. Ni boma ve ke natak’ yandi na kusala bamambu. Na yawu, yandi ke lendá kubaka mikanu ya mbote.” Ya ke mfunu beto bumba makanisi ya beto, samu beto kota ve na bamambu ya politiki, mpe na bamambu nyonso yina ke na lutá na yinza. Nyonso beto ke na kumá pene-pene na kilumbu ya Yehova, bantu ke lutila kusosa kunata beto na kukota na bamambu yayi. Kasi beto me lunga kuvanda ve na boma samu mpeve ya Nzambi ke sadisa beto na kukutika nzutu mpe kubaka mikanu ya mbote.​—Luke 12:11, 12.

YINKI BETO LENDA SALA NA KUBONGAMA SAMU NA KILUMBU YA YEHOVA?

8. Wapi bifwani 1 Batesalonika 5:8 ke na sadilá samu na kuzonzila bifu yina ke sadisa beto na kuvanda ekenge mpe na kubumba makanisi ya beto? (Tala mpe kizizi.)

⁸ “Lwata kinkuti ya kisengo . . . mpe . . . yimpu ya kisengo.” Polo ke na fwanisá beto na basoda yina ke vandá ekenge mpe yina ke ya kubongama samu na kunwana. (Tanga 1 Batesalonika 5:8.) Soda me lunga kuvanda kaka ya kubongama ntangu nyonso samu na mvita. Ya ke mutindu mosi mpe na beto. Samu na beto, kinkuti ya kisengo ni kiminu na luzolo mpe yimpu ya kisengo ni kivuvu. Na kubongama samu na kilumbu ya Yehova, beto me lunga kuvanda na bifu yayi.

9. Wa’ faso kiminu ya beto lenda bumba beto?

⁹ Mutindu kinkuti ya kisengo ke bumbá ntima ya soda, kiminu na luzolo ke bumbá ntima ya beto. Ya ke sadisá beto na kukangama na Yehova mpe kulanda Yesu. Na kiminu ya ngolo beto ke ndimá ti kana beto sosa Yehova na ntima ya beto nyonso yandi ke sakumuna beto. (Ebr. 11:6) Ya ke sadisá beto na kuvanda ya kukangama na Yesu ata ti beto ke na kutaná na bamambu ya mpasi. Kiminu ya beto ke kumá dyaka ngolo ntangu beto ke longoká bifwani ya bampangi ya beto ya bubu yayi yina ke ya kukangama na Yehova ata na kati ya bankwamusu to mambu ya mbongo. Bifwani ya bampangi ya beto yina biká bima ya nkaka na luzingu ya bawu samu na Kimfumu ya Nzambi lenda sadisa beto na kubwa ve na mutambu ya kuzola mbongo to bima mingi.b

10. Wa’ faso luzolo samu na Yehova mpe samu na bantu ke sadisa beto na kukanga ntima?

¹⁰ Luzolo ke mfunu mingi samu na kuvanda ekenge mpe kubumba makanisi ya beto. (Mat. 22:37-39) Kisalu ya kusamuna lenda natina beto bampasi ya mutindu na mutindu, kasi luzolo samu na Yehova ke sadisa beto na kubika ve yawu. (2 Tim. 1:7, 8) Beto ke lakisá luzolo na bantu yina ke sadilá ve Yehova ntangu beto ke samuná na bayinzo, na telefone mpe ntangu beto ke soniká mikanda. Beto ke ndimá ti bantu yina beto ke na samuná lenda soba mpe kukuma bisadi ya Yehova.​—Ezk. 18:27, 28.

11. Wa’ faso luzolo samu na bampangi ya beto ke sadisa beto? (1 Batesalonika 5:11)

¹¹ Na kati ya bantu yina beto me fwana kuzola, ya ke mpe na bampangi ya beto ya kimvuka. Beto ke lakisá luzolo na ‘kukindisaka bampangi mpe na kusalasanaka.’ (Tanga 1 Batesalonika 5:11.) Mutindu basoda na kati ya mvita ke salasanaka, beto mpe me bonga kukindisa bampangi. Ya lenda kumina soda na kulwalisa mpangi ya yandi na kati ya mvita, kasi yandi lenda sala ve yawu na nko. Mutindu mosi mpe, beto lenda talisa ata fioti ve bampangi ya beto ya kento na ya bakala mpasi na nko. (1 Tes. 5:13, 15) Beto ke lakisá mpe luzolo na kupesá buzitu na bampangi yina ke twadisá kimvuka. (1 Tes. 5:12) Ntangu Polo soniká na bampangi ya Tesalonika, kimvuka ya bawu vandá ntete ya malu-malu. Bampangi yina vandá twadisa, zabá ve bamambu mingi mpe ya lenda vanda ti ya kuminá bawu na kusala bafoti. Ata faso yina, ya vandá mbote ba pesa bawu buzitu. Samu ti mpasi ya nene me kuma pene-pene, beto me lunga kulanda malongi yina bakuluntu ke pesá beto. Bubu yayi, kimvuka ya bantwadisi na filiale ke lakisá beto nzila na bamambu mingi. Kasi na mantwala ya lenda vanda ti kaka ni bakuluntu ke lakisa beto nzila ya kulanda. Na yawu beto me bonga kulongoka kuzola bawu mpe kupesa bawu buzitu. Beto me lunga ve kutula makanisi ya beto na bafoti ya bawu. Mpe beto zolá zimbana ve ti ni Yehova na nzila ya Yesu ke na sadilá bawu samu na kutwadisa beto.

12. Wa’ faso kivuvu ya beto ke bumbá makanisi ya beto?

¹² Mutindu yimpu ke bumbá yintu ya soda, kivuvu ya beto ke bumbá makanisi ya beto. Kivuvu ya beto ke sadisá beto na kuzaba ti bima ya yinza ke kaka mpamba. (Flp. 3:8) Ya ke sadisá mpe beto na kubumba makanisi mpe na kuvanda ya kukangama. Ni yawu salamá na bampangi ya beto zole Wallace na Laurinda, yina ke salá na Betele mosi na Afrique. Kaka na kati ya balumingu tatu, Laurinda fwidilá mama ya yandi mpe Wallace fwidilá tata ya yandi. Samu na kimbevo ya Coronavirus, ba lendá ve kuvutuka na bwala ya bawu samu na kuvanda kintwadi na dikanda ya bawu na ntangu ya mpasi yina. Wallace sonikaka: “Kivuvu ya kuvumbuka ya bantu ya kufwa ke sadisá munu na kukanisa ve na bilumbu ya nsuka yina ba lutisá na yinza yayi, kasi na faso ba ke vanda na bilumbu ya ntete yina ba ke vanda na yinza ya malu-malu. Kivuvu yayi ke pesá munu kizunu ntangu mu ke vandá na manyongi ya kulutila.”

13. Yinki beto lenda sala samu na kuzwa mpeve ya santu?

¹³ ‘Beno kanga ve nzila na kisalu ya mpeve ya santu.’ (1 Tes. 5:19) Ntangu beto ke vandá na mpeve ya santu, ya ke sadisá beto na kuvanda na tiya mpe nsatu mingi ya kusala samu na Yehova. (Rom. 12:11) Yinki beto lenda sala samu na kuzwa mpeve ya santu? Beto lenda sambila, kulongoka Biblia mpe kulanda nzila ya kimvuka ya Yehova. Ya ke sadisa beto na kukulisa ‘mbuma yina mpeve ya santu ke pesaka.’​—Gal. 5:22, 23.

14. Yinki lenda sala ti beto kuzwa dyaka ve mpeve ya santu? (Tala mpe kizizi.)

¹⁴ Ntangu Nzambi ke pesá beto mpeve ya yandi ya santu, beto me lunga kusala bangolo samu na ‘kukanga ve nzila na kisalu ya mpeve ya santu.’ Nzambi ke pesá mpeve ya yandi ya santu na ba yina ke bumbá makanisi mpe ndyatulu ya mbote. Kasi muntu yina ke biká makanisi ya yimbi kula na kati ya yandi mpe ke sadilak’ yawu, Yehova ke pesá dyaka ve yandi mpeve ya yandi ya santu. (1 Tes. 4:7, 8) Samu Nzambi bika ve kupesa beto mpeve ya santu, beto zolá “baka ve bambikululu mutindu mambu ya mpamba.” (1 Tes. 5:20) “Bambikululu” awa zola zonza bansangu yina Yehova pesá beto na nzila ya mpeve ya santu. Na kati ya bansangu yango, ya ke na yina me tadila kilumbu ya Yehova mpe bamambu yina ke na lakisá ti ntangu me bikana kaka fioti. Na yawu, beto me lunga ve kukanisa ti kilumbu ya Yehova ke ntete ntama. Beto zolá lakisa na ndyatulu ya beto ti kilumbu ya Yehova me kuma pene-pene. Bilumbu nyonso, beto me lunga kuvanda ya “kukwikama na yandi.”​—2 Pi. 3:11, 12.

“TALA MBOTE MAMBU NYONSO”

15. Yinki beto lenda sala samu na kuvunama ve na bansangu ya luvunu yina bambazi ya yimbi ke mwangisa na ntoto? (1 Batesalonika 5:21)

¹⁵ Na mwa ntangu fioti, bambeni ya Nzambi ke zonza mambu yina ke sosa kulakisa ti yinza me kuma na “kizunu mpe lukengololo.” (1 Tes. 5:3) Bansangu yina ke katuka na bambazi ya yimbi ke mwangana na ntoto nyonso mpe bantu mingi ke vunama na yawu. (Luz. 16:13, 14) Kasi beto, beto ke bika ve ba vuna beto, kana beto “tala mbote mambu nyonso.” (Tanga 1 Batesalonika 5:21.) Na ndinga ya Greke, ba vandá sadilá “tala mbote” samu na kuzonzila faso ya kutala kana kisengo ke ya mbote. Beto mpe me bonga kutala kana bamambu yina beto ke tangá to ke kuwá ke ya tsyeleka. Ya vandá mfunu samu na bakristo ya Tesalonika. Bubu yayi ya me lutila dyaka mfunu samu na beto, samu mpasi ya nene me kuma pene-pene. Beto zolá sadila mayela ya beto samu na kutala kana bamambu yina beto ke tangá to ke kuwá ke kwelaná na yina Biblia mpe kimvuka ya Yehova ke zonzaka. Kusala yawu ke sala ti beto vunama ve na bansangu ya luvunu yina bambazi ya yimbi ke mwangisa na ntoto.​—Bin. 14:15; 1 Tim. 4:1.

16. Wapi kivuvu ke na beto mpe yinki beto zolá vanda kaka na nsatu ya kusala?

¹⁶ Beto zaba ti bisadi ya Yehova ke vuuka na mpasi ya nene. Kasi beto zaba ve yinki ke kumina mosi na mosi na kati ya beto mbasi. (Zaki 4:14) Ata ti beto luta mpasi ya nene to beto kufwa tekila ya kuma, beto ke kuzwa luzingu ya ntangu nyonso kaka kana beto vanda ya kukangama na Yehova. Ya ke na ba yina ke kwenda yala na Yesu na zulu mpe ba ya nkaka ke vanda na paradiso awa na ntoto. Beto bika ve kutula meso ya beto na kivuvu mpe kuvanda kaka ya kukubama samu na kilumbu ya Yehova.