Yinza ke vanda kwandi ntangu nyonso na bamvwama mpe ba yina ke ve na mbongo?

Na babwala mingi, bantu ke basiká na banzila samu na kulakisa ti ba ke na sepelá ve na yina bantu ya nkaka ke na mbongo mpe ba ya nkaka ke ve na yawu. Bamambu yayi me beba dyaka na kati ya kimbevo ya COVID-19. Kimbevo yayi me sala ti bantu vanda kaka na bayinzo, madya ke mpasi na kuzwa, mpe bantu mingi ke ve na mbongo na kukipe nzutu ya bawu ntangu ba ke na belaka. Nyonso yayi me sala ti bantu me kuma na nkele ya kulutila na kutala ti bantu ya nkaka ke na mbongo mingi, kasi ba ya nkaka ke na ata mbongo.

Ya ke kwandi na kilumbu yina bamambu ya mbongo ke manisa? Ee. Biblia ke lakisá ti Nzambi ke manisa bampasi ya beto.

Bamambu yina Nzambi ke yidika

Mambu: Bantu me lenda ve kusala bamambu samu bantu nyonso vanda na bima yina ba ke na yawu nsatu.

Yina Nzambi ke sala: Nzambi ke katula bimfumu nyonso ya bantu, mpe na kisika ya yawu yandi ke tula Kimfumu ya yandi. Kimfumu yango ke na mazulu mpe ya ke yala na ntoto nyonso.—Danyele 2:44; Matayi 6:10.

Bambote: Samu Kimfumu ya Nzambi ke yala na ntoto ya muvimba, bamambu nyonso ke tambula na mutindu ya kulunga. Bantu nyonso ke vanda na bima ya kulunga samu kuzinga, mpe ba ke vanda dyaka ve na boma samu na mbasi. (Nkunga 9:7-9, 18) Ba ke zwa bambuma ya kisalu ya bawu, mpe ba ke vanda na luzingu ya kitoko na makanda ya bawu. Biblia ke zonzaka: ‘Ba ke tunga bayinzo mpe ke zinga kuna, ba ke kunda bilanga ya vinu mpe ke kudya mbuma ya yawu. Ba ke tunga ve samu muntu ya nkaka vanda kuna, ba ke kunda mpe ve samu bantu ya nkaka kudya.’—Izaya 65:21, 22.

Mambu: Bantu ke ve na ngolo ya kukanga nzila na bamambu yina ke natá bampasi mpe ke salá ti bantu zimbisa bima ya bawu.

Yina Nzambi ke sala: Na nzila ya Kimfumu ya yandi, Nzambi ke katula bamambu nyonso yina ke pesá bantu boma.

Bambote: Ntangu Nzambi ke baka bamambu na maboko ya yandi, bantu ke kutana dyaka ve na bamambu yina ke salá ti ba zimbisa bima yina bawu to makanda ya bawu ke na yawu nsatu. Na kifwani, bamvita, bansatu, mpe bimbevo yina ke mwanganá na yinza nyonso ke vanda dyaka ve. (Nkunga 46:9; 72:16; Izaya 33:24) Nzambi zonzaka: ‘Bantu ya munu ke zinga na kisika ya ngemba, na bisika ya kuzinga ya lukengolo mpe na bisika ya kupema yina ke swi.’—Izaya 32:18.

Mambu: Bantu ke sadilá bampangi samu na kilengi ya bawu mosi mpe samu na kuzwa ya kulutila.

Yina Nzambi ke sala: Bantu yina Kimfumu ya Nzambi ke yala ke longoka na kuzola bampangi kulutila bawu mosi.—Matayi 22:37-39.

Bambote: Ntangu Kimfumu ya Nzambi ke yala, bantu nyonso ke landa kifwani ya Nzambi mpe ke lakisa luzolo yina ‘ke sosaka ve bambote ya yawu mosi.’ (1 Bakorinto 13:4, 5) Biblia ke zonzaka: ‘Ba ke sala ata yimbi mosi ve mpe ke bebisa ata kima mosi ve na mongo ya munu nyonso ya santu, samu ya tsyeleka ntoto ke fuluka na nzayilu ya Yehovaa mutindu bamaza ke fulusaka nzadi ya mungwa.’—Izaya 11:9.

Biblia ke lakisá ti beto ke na zingá na bilumbu ya nsuka ya yinza yayi, mpe ti na mwa ntangu fioti Nzambi ke lungisa nsilulu yina yandi pesá ya kusala ti bantu nyonso vanda na bima ya kulunga na luzingu.b (Nkunga 12:5) Tekila ntangu yina kuma, misiku ya Biblia lenda sadisa nge bubu yayi samu na bamambu ya mbongo. Na kifwani, tanga “Comment vivre avec moins” mpe “L’argent et vous.”

Bafaso ya yimbi ya kutadila bamambu ya nkaka yina Biblia ke zonzá samu na mbongo

Luvunu: Pauvreté ke manisa ve, samu Yesu zonzá ti ba yina ke ve na mbongo “ke vanda na beno ntangu nyonso.”—Matayi 26:11.

Tsyeleka: Yesu vandá zonza kaka bamambu mutindu ya kele: Na yinza yayi ya yimbi, ba pauvres ke vanda kaka. Kasi, nsangu yina Yesu vandá samuna vandá ‘nsangu ya mbote na bamputu’ mpe ya vandá lakisa ti Kimfumu ya Nzambi ke sala ti pauvreté vanda dyaka ve.—Luke 4:18, 43.

Luvunu: Samu na kusepelisa Nzambi, muntu me bonga kuvanda ve na bimvwama, samu Yesu zonzaka: “Kwenda kutekisa bima nyonso yina kele na nge, mpe kabula mbongo na bamputu.”—Matayi 19:21.

Tsyeleka: Ntangu Yesu zonzá mambu yayi, yandi vandá pesa ve musiku yina bilandi ya yandi fwana kulanda. Yandi vandá zonza na bakala mosi yinki yandi zolá sala. Bakala yango vandá na ntima ya kukabuka samu na mbongo mingi yina vandá na yandi. Yesu vandá zonza na yandi na kuvanda dyaka ve na bima mingi na luzingu mpe kundima kukuma mosi ya bilandi ya yandi.

Luvunu: Ntangu Nzambi ke sakumuná muntu, yandi ke kumisak’ yandi mvwama, samu Biblia ke zonzaka: “Lusakumunu ya [Yehova] ke kumisaka muntu mvwama.”—Bingana 10:22.

Tsyeleka: Ntangu Biblia ke zonzilá ‘lusakumunu ya Yehova,’ ya ke lakisá mingi-mingi bimvwama ya kimpeve, mutindu luzingu yina ke na kilengi, kindiku ya mbote na Nzambi, mpe kivuvu ya kitoko samu na bilumbu yina ke kwiza. (Nkunga 25:14; Yoane 17:3) Ata ti Nzambi sakumuná bisadi ya yandi ya nkaka na kupesá bawu bimvwama, kasi mingi ya ba yina kumá bakristo vandá ve na mbongo. (Kubanda 24:34, 35; Zaki 2:5) Ata Yesu mpe vandá ve na bima mingi.—Matayi 8:20.

Luvunu: Biblia ke longá communisme samu ya ke zonzá ti bakristo ya siècle ya ntete ‘vandaka vukisa bima nyonso yina vandaka na bawu. Bawu vandaka tekisa balupangu mpe bimvwama ya bawu.’—Bisalu 2:44, 45.

Tsyeleka: Baverse yayi ke na zonzilá mambu yina bakristo salá na kubakisa samu na mwa ntangu fioti ba yina kumá bakristo ntama mingi ve. Bantu yayi kwizá na Yeruzalemi samu na feti ya Pantekoti. (Bisalu 2:5) Kasi, ntangu ba kumá bakristo, ba lutisá bilumbu mingi na Yeruzalemi samu na kuzaba mingi malongi ya Kristo. Ni yina salá ti bampangi ya bawu bakristo vukisa bima yina vandá na bawu, na luzolo nyonso, samu ba kuzwa kima ya kudya mpe kisika ya kuvanda.—Bisalu 2:41, 42, 46, 47.

a Yehova ke nkumbu ya Nzambi na Biblia.—Nkunga 83:18.

b Na kuzaba samu na yinki nge lenda vanda na kiminu na Biblia, tanga “La Bible : une source de vérités fiable.”