Yesu vandá kaka muntu mosi ya mbote?

Mvutu ya Biblia

Yesu vandá ve kaka muntu mosi ya mbote. Na bunkufi, beto lenda zonza ti yandi ke muntu yina me bika nsangu kuluta muntu nyonso na yinza. Tala bamambu yina bantu ya mayela mpe bantu yina ke soniká mikanda zonzá samu na yandi:

“Yesu ya Nazareti . . . ke muntu yina me bika nsangu na faso ya kulutila na yinza.”—H. G. Wells, musoniki mosi ya masolo na Angleterre.

“[Yesu] ke muntu yina me lutila kunata bantu mingi na kusooba luzingu ya bawu na yinza yayi, mpe tii bubu yandi ke na landá (continuer) kunata bantu na kusooba luzingu ya bawu.”—Kenneth Scott Latourette, Musoniki mosi ya masolo na États-Unis.

Biblia ke zonzá samu na yinki Yesu ke muntu yina me bika nsangu na faso ya kulutila kuluta muntu nyonso na yinza. Ntangu Yesu lombá na bilandi ya yandi nani ba me kanisa ti yandi kele, mosi ya bawu zonzá na yandi: “Nge ke Masiya, Mwana ya Nzambi yina kele moyo.”—Matayi 16:16.