Una Tulenda Yimina o Zola Muna Nzambi ye Mfinangani Zeto

Kana una vo Akristu ke bena ku nsi a Nsiku a Mose ko, e nkanikinu miole mianene mina muna nsiku wau, miamfunu kikilu i sia vo zola Nzambi ye Mfinangani zeto. Miakinu songa dina Yave kevavanga kwa yeto. (Mat 22:37-39) O zola kwaku ke kukwizilanga kukinsalukisa ko. Kufwete yimwa. Mu nkia mpila? I mosi muna mpila tulenda wo vangila i tanganga o Nkand’a Nzambi lumbu yawonso. Vava tubadikanga fu ya Nzambi nze una isongwanga muna Nkand’a Nzambi, tumonanga “wete wa Yave.” (Nku 27:4) Muna kuma kiaki, o zola kweto muna yandi kuwokelanga, tukalanga ye ngindu nze zandi. Ediadi dikutufilanga mu lemvokela nkanikinu mia Nzambi kumosi yo nkanikinu wa zola akaka. (Yoa 13:34, 35; 1 Yoa 5:3) Tala e zaka ndekwa tulenda sadila mu tomesa e ntangilu eto ya Nkand’a Nzambi.

• Sadila e ngindu yo umbakuzi waku. Uyisianga muna lusansu otanganga. Nga olenda mona, wá yo nunka? Adieyi bayindulanga o wantu beyikwanga muna lusansu?

  

• Sobanga e mpila ya tangila. Tala maka mambu olenda vanga: Tanganga mu ndinga yawakana yovo landanga e audio ekolo otanganga. Tanga o lusansu lwa muntu oyikwanga muna Nkand’a Nzambi yovo sola diambu diankaka vana fulu kia tanga kapu yawonso muna ndandani. Kasikil’owu, sadila e Apêndice A7 yovo B12 muna Tradução do Novo Mundo das Escrituras Sagradas yovo finkanda Lusadisu mu Longoka Diambu dia Nzambi, lukaya lwa 18-19 ye lukaya lwa 54-55. Tanga e kapu kiawonso kibongelo e sono kia lumbu. Tanganga o Nkand’a Nzambi mun’owu wa ndandani wasonekenwa.

  

• Tanga muna bakula. O tanga kapu kimosi konso lumbu bakula yo badika kio, disundidi o mfunu ke mu tanga kapu yayingi ko muna fokola kaka e Nkand’a Nzambi. Tanga e sono ivitidi ye ina ilende. Badikanga mambu mawonso mayikilu muna lusansu. Sadilanga e mapa ye referência marginal. Vavululanga e mambu mana kubakwidi ko. Avo dilendakana, vaulanga e ntangwa ya fwana mu badika mana otanganga.