“Paulu Wavutula Matondo kwa Yave yo Kasakeswa”

Vava nkutakani ya Roma bawa vo Paulu mu nzila kena, batuma buka kia mpangi ana bakangala kilometa 64 mu kwenda kunkika. E nzol’a mvevo basonga, adieyi yavanga kwa Paulu? “Paulu vava kabamwene otondele Nzambi, oyangalele.” (Mav 28:15) Kana una vo Paulu watoma zayakana mu kuma kia fu kiandi kia kasakesa ampangi muna nkutakani kakingulanga, vava kakala mu pelezo, yandi watambula o lukasakeso.—2 Kor 13:10.

O unu akengi a zunga bekingulanga e nkutakani mu kasakesa ampangi. Nze una uvangamanga kwa selo ya Nzambi yawonso, ezak’e ntangwa beyoyanga, tokana yo kendalala. Vava o nkengi a zunga yo nkaz’andi bekingula e nkutakani eno, adieyi olenda vanga muna ‘kubakasakesa?’—Roma 1:11, 12.

• 

  Yikama o tukutakanu twa salu kia umbangi. O nkengi a zunga okasakeswanga vava ateleki bevanganga mawonso mu yikama e nkubika za lumingu lwa nkingula. (1 Tes 1:2, 3; 2:20) Vanga e nkubika muna sala se mviti a nzila ansadisi muna ngonde a nkingul’a nkengi a zunga. Nga olenda lomba wasala kumosi yo nkengi a zunga yovo nkaz’andi muna salu kia umbangi? Nga olenda lomba mosi muna yau nuenda fila longi dia Nkand’a Nzambi? Oyau beyangalelanga vaika ye ateleki aswaswana, kumosi ye ateleki ampa yovo awana bemonanga vo ke bena ye ndekwa zafwana ko muna salu kia umbangi.

• 

  Kala ye fu kia tambula e nzenza. Nga olenda kubavana e fulu kia leka yovo kubakayila e madia? Muna mpila yayi osonga vo ozolanga nkengi a zunga yo nkaz’andi. Ke bevavanga ko vo wabakubikila e lambu dia kafu-kafu.—Luka 10:38-42.

• 

  Lemvokela tuludiku ye malongi mandi. O nkengi a zunga una ye tima dia kutusadisa twabakula una tulenda sadila Yave una ufwene. Ezak’e ntangwa olenda kutuvana e longi. (1 Kor 5:1-5) Vava tulemvokelanga malongi mandi yo songa o lusakalalu, kiese dikuntwasilanga.—Ayib 13:17.

• 

  Songa vo oyangalelanga e salu kiau. Zayisanga kwa nkengi a zunga yo nkaz’andi una salu kiau kikusadisilanga. Olenda wo kubavovesa yovo kubasonekena nkanda.—Kol 3:15.