Una Tulenda Vanina Lusadisu Vava Vebwanga e Sumbula

O unu, e sumbula mu wokela kaka ina. Vava vebwanga e sumbula, divavanga vo vavangwa e nkubika yambote muna vana lusadisu. Ekiaki i kuma e Buka kia Selo Yambuta bavangila e nkubika kimana konso vula diakala ye Departamento Ivananga Lusadisu kwa Awana Bebwilwanga e Sumbula.

Vava ampangi besadilanga mu departamento yayi bezayanga vo sumbula kibwidi, vana vau bemokenanga ye akuluntu a zunga kiakina kimana bazaya kana nkia lusadisu ateleki bavuidi o mfunu. Avo bamwene vo e sumbula kiampwena ye ateleki a zunga ke belenda sadisa ko awana babwidilu e sumbula, ampangi kuna vula bevavanga mpangi zazikuka ana bafwana vita o ntu muna salu kiokio. Ampangi awaya balenda lomba lusadisu lwa ampangi akwa ntim’amvevo muna yikama e salu kiaki, balenda mpe lomba lukau lwa lekwa yasikididi ivuilu o mfunu yovo sumba yo kayanesa o madia ye lekwa yankaka.

O vangila o mambu mu mpila yayi, nluta miayingi ditwasanga. Disadisanga mu lembi vutukila sala e salu kiau kimosi, venga e mvuanga yo lembi fwasa e nzimbu ye salanganu yankaka avo konso muntu obakidi e nzengo za vangila o mambu mu mpil’andi.

Ampangi besolwanga kwa vula, balenda sikidisa o lutangu lwa wantu ye nzimbu bevua o mfunu muna vana lusadisu. Balenda mpe mokena ye awana bena ye wisa muna zunga ana balenda kutusadisa kimana twasala e salu kieto mu nzaki. Muna kuma kiaki, ke diambote ko vo konso mpangi kabaka e nzengo za vit’o ntu muna kuba nzimbu yovo twika e lekwa ngatu kwenda kuna zunga kibwidilu e sumbula avo ke balombele lusadisu lwandi ko.

Kansi, vava vebwanga e sumbula, tukalanga ye tima dia vana lusadisu. (Ayib. 13:16) Wau vo tutoma zolanga e mpangi zeto, adieyi tulenda vanga? E diambu disundidi o mfunu tulenda vanga i samba mu kuma kia awana babwidilu e sumbula ye awana bena vana lusadisu. Tulenda mpe vana tukau muna yikama e salu kia nz’amvimba. Muna lutumu lwa Selo Yambuta, ampangi muna mavula, yau bena ye mbebe ya zaya e mpila yambote yasadila o tukau twatu. Avo tuzolele vana e moko muna salu kiaki, tulenda wo vanga muna soneka e ndomba iyikilwanga vo Petição Para Voluntário do Departamento Local de Desenho/Construção (DC-50).

TALA E VIDEO, KIZALU KUNA BRAZIL. I BOSI, VANA E MVUTU ZA KIUVU KILENDE:

Nkia diambu disivikisi muna mpila ina Mbangi za Yave bavanina lusadisu kunim’a kizalu kuna Brazil muna mvu wa 2020?