Vyoira Vya Anamarumiwa
25 Vangavirile malambo maralu kumela vevo Fesito aambeele liye lamulela muigawo ya Yudeya, oodowa wu Yelusalemu kumela wu Kaisareya. 2 Wewo asembe alukulu na alombwana olemekezeya vaari va Ayuda koomuwandela Fesito vyongo vyotakala vyokuza Paulo. Ndiye koowambeela muchondelela 3 ira aaomele murima moi amuitani-e Paulo ira awelele wu Yelusalemu. Koma aluwa kali kangapanganile ira kamuembekezele vasewu ira kamuphe. 4 Koma Fesito oowasomeda ira Paulo unafuneya sungiwa wu Kaisareya koma teto liye ukede ala vang’ono welela wewo. 5 Ndiye liye aongile ira: “Athu anayo kan’na maudindo vaari vinyu, kadowe limo-i na miyo ira akala vali yongo iliyetene ineyo muthula ulakwile liye kadowe kamuimbe mulandu.”
6 Eno Fesito ookala na athwayo wa malambo 8 kapena 10, moi vanduli viwa oowelela wu Kaisareya. Ndiye dambo lo-arela oogarati vapandwae oweluzela milandu moi ooawandela athu ira kamuzena Paulo. 7 Paulo angafiile, Ayuda anayo kazide kumela wu Yelusalemu, kooimela momurungunuwa nomunamedelanga milandu dinjinji doopi-a, dedo katawandile peleka umboniwa.
8 Koma Paulo voviteteza aongile ira: “Miyo kandichimwele Ilamulo ya Ayuda kapena kachisi kapena teto Kaisara.” 9 Koma Fesito vofuna ira Ayudayo kamuomeliwengana, oomufuka Paulo ira: “Kodi unafuna ira udowe wu Yelusalemu ira khanila idowe yaweluziwe vamaso vanga?” 10 Koma Paulo oosomeda ira: “Miyo ndiimela usogolo wa pando oweluzela milandu wa Kaisara, moi vano pavevo ndinafuneya miyo weluziwa. Ayuda kandiachimwele yongo iliyetene moi nanyen’ne teto munoiziwa pama vyevi. 11 Akala ndili muthu olakwa, moi ndinofuneya phiwa chifukwa ya vyevyo ndipangile miyo, kandinakoonda phiwa. Koma akala vyevyo kanandinamedelaathuvi kai vyoona, kavali muthu unoyo unandipeleke wa aluwa ira kasangalale. Eno ndinavepa apilo ira khanila idowe yaweluziwe na Kaisara.” 12 Ndiye Fesito angakambilanile na athwae oweluza milandu, oosomeda ira: “Voi uvepa apilo ira khanila idowe yaweluziwe na Kaisara, unodowa wa Kaisara.”
13 Vangavirile malambo mangasene, Mwene Agiripa na Berenike koofiya wu Kaisareya vaulendo wa boma odowa peleka ulemu wa Fesito. 14 Voi Fesito ookala wewo wa malambo mangasene, liye oomufotokozela mwene Agiripa khani yokuza Paulo. Moi aongile ira:
“Vikala muthu m’mo-iwene unoyo Felike amu-iile liye mundende. 15 Vevo ndali miyo wu Yelusalemu, asembe alukulu koma teto andimuwa a Ayuda kooza za ndiwandela vyongo vyotakala vyokuza liye moi koovepa iweluzo yoi aphiwe. 16 Koma miyo ndoowasomeda ira Aroma katinapanga vyongo mundila inela. Aluwa katinamupeleka muthu wa athu anayo kanamunamedela mulandu vokeda funa asangalasa, muthu onamedeliwoyo aanava-iwe mwai oonana vamaso na vamaso na omunamedeloyo ira aviteteze vamulanduyo. 17 Eno kangafiile uno, miyo kandadimbeliwile, koma dambo lo-arela ndoogarati vapandwanga oweluzela milandu moi ndoomuitani-a muthuyo ira kamuzena wa miyo. 18 Athu omunamedela mulanduyo kangaimelile nowambeela fotokoza, kataongile vyongo vyotakala vyevyo ndaganiza miyo ira muthula unokoza panga. 19 Aluwa kakeda runi-ana na liye vakhani yokuza mwemo unalambelela liye mulungu* koma teto vakhani yokuza muthu m’mo-iwa zina lae Yesu unoyo akhwile, koma Paulo unopitilizave onga mosimikiza ira uli moyo. 20 Ndingalepelile mali-a mkangano okuza khani inela, ndoomufuka akala unafuna dowa wu Yelusalemu ira mulandwae udowe waweluziwe wewo. 21 Koma Paulo oovepa ira ndimusunge na yolinga yoi adowe avwe igamulo ya Olemekezeya Kaisara. Eno ndoolamula ira kapitilizeve musunga mpakana vevo ndinaze miyo ndimutumize wa Kaisara.”
22 Agiripa oomuwandela Fesito ira: “Namiyene teto ndinafuna ndivwe mekave muthula aonganga.” Fesito oomusomeda ira: “Mechelo munoza mumuvwe.” 23 Dambo lo-arela, Agiripa na Berenike kooza na ulemu ulukulu wa umwene novolowa m’mba mwemo kaweluzelamoathu milandu. Moi kali limo-i na andimuwa a asilikali koma teto athu ochuka a mu mzindoyo, moi Fesito oolamula ira kamuzena Paulo. 24 Ndiye Fesito aongile ira: “Mwene Agiripa na etene anayo mulivano, mumuona muthula? Ayuda etene wu Yelusalemu koma teto uno, koondivepa ira muthula kanafuneya kaana moyo moi kaongile vyevi mokuwa. 25 Koma miyo ndoowona ira muthula kapangile yongo iliyetene yofuneya phiwa. Eno liye angavepile ira khanae idowe yaweluziwe na Olemekezeya Kaisara, ndooganiza vyomutumiza. 26 Moi kandin’na yongo iliyetene yoi ndiulembeleni nyo Mbwiyeni yokuza muthula. Eno ndimuzana vamaso vinyu, simbwasimbwa nyo Mwene Agiripa, ira mwamufuka vyokuza khanila, ndifwanye yongo yoi ndilembe. 27 Chifukwa miyo ndinaona ira kai paama mutumiza mkaidi, koma o-oromola mulandwae.”