Olembiwa na Yohani
14 “Mirima dinyu kadivuteye koma roromelani Mulungu, mundiroromele teto miyo. 2 Munyumba ya Babanga mukala malo anjinji okalamo. Aakale ira kamuli malo ndoouwandelani, chifukwa ndinaadowa ira ndausakaedeleni malo. 3 Ndiye ndadowa ira ndausakaedeleni malwayo, ndinoza ira ndiutukuleni, ira nanyen’ne teto mudowe mwakale wewo ndinakale miyo. 4 Moi wewo ndinadowa miyo, ndiliwa munoiiziwa.”
5 Tomasi oomufuka ira: “Mbwiyeni, wewo munadowa nyo iyo kaninaiziwawo. Ndiye ndiliwa ninaiiziwe avi?”
6 Yesu oomuwandela ira: “Miyo ndili ndila, choonadi na moyo. Kavali muthu unoyo unafiya wa Baba o-ozela mwa miyo. 7 Aakale ira munondiiziwa, moomuiziwa teto Babanga. Ambeela vathawiila dowa usogolo munomuiziwa moi mumuona wale.”
8 Filipo oomuwandela ira: “Mbwiyeni, nioni-eni Babinyu moi mwera eno iyo ninosimikizela.”
9 Yesu oomuwandela ira: “Kodi we Filipo kunandiiziwave ngakale ira miyo ndikala na nyo wathawi yetene inela? Unoyo undionile miyo umuona teto Babanga. Nanga chifukwa n’ni weyo unaonga ira, ‘Nioni-eni Babinyu’? 10 Kodi kunaroromela ira Baba na miyo nili ogwilizana? Vyongo vyevyo ndinauwandelani miyo kandinaonga vyokeda ganiza mekave, koma Baba unoyo uli ogwilizana na miyo ngunoyo unapanga chito dae zela mwa miyo. 11 Roromela vyevyo ndiongile miyo ira miyo na Baba nili ogwilizana, kapena keda roromela chifukwa ya chito dedo ndinapanga miyo. 12 Ndithu ndinaauwandelani, muthu uliwetene unoyo unandiroromela miyo, naliyene teto unoza apange chito dedo ndinapanga miyo, moi unoza apange chito dilukulu kwaranya dedo ndinapanga miyo chifukwa miyo ndinaadowa wa Babanga. 13 Koma teto yongo iliyetene ineyo munaze nyo muvepe muzina langa, miyo ndinoza ndiipange, ira Baba alemekeziwe zela mwa Mwanae. 14 Yongo iliyetene ineyo munaze nyo muvepe muzina langa, miyo ndinoza ndiipange.
15 Akala munandiomeliwana, munoza mu-arele malamulwanga. 16 Miyo ndinoza ndimuvepe Babanga moi liye unoza auva-eni oukami-ani* m’mo-iwa ira aze akale na nyo mpakana walewale. 17 Oukami-ani unola ngu zimu owela wa choonadi unoyo ilambo kinawande uwachela, chifukwa kinauona koma teto kinauiziwa. Nyo munouiziwa chifukwa unakala mwa nyo moi uli mwa nyo. 18 Kandinaza ndiu-iyani ngati a-ima amasiye, ndinoza ndize wa nyo. 19 Ukede ala thawi yoyeva moi ilambwela kinaza indiona nawili. Koma nyo munoza mundione, chifukwa ndikaana moyo moi nanyen’ne teto munoza mukaena moyo. 20 Va dambo lelo munoza muiziwe ira miyo ndili ogwilizana na Babanga koma teto ira nyo na miyo nili ogwilizana. 21 Uliwetene unoyo una-arela malamulwanga, ngunoyo unandiomeliwana. Koma teto unoyo unandiomeliwana, Babanga unoza amuomeliwena. Namiyene teto ndinoza ndimuomeliwena moi ndinoza ndivioni-ede pamapama wa liye.”
22 Yudasi m’mo-iwa, iyavo Yudasi Isikariyoti, oomufuka ira: “Mbwiyeni, chifukwa n’ni munafuna muvioni-ede pamapama wa iyo ookala wa athu a muilambwela?”
23 Yesu oomusomeda ira: “Akala muthu unandiomeliwana, unoza a-arele mawanga teto Babanga unoza amuomeliwena moi miyo na Babangoyo ninoza nidowe wa muthuyo dowa kalanga limo-i na liye. 24 Muthu unoyo kanandiomeliwana kana-arela mawanga, moi mawu anayo ndinaonga miyo kai aanga, koma mba Babanga unoyo andirumile.
25 Ndiuwandelani vyevi vevo ndili miyo na nyo. 26 Koma oukami-ani, unoyo ngu zimu owela unoyo Babanga unaze liye autumize muzina langa, unoza uufunji-eni koma teto unoza uumbucheni vyongo vyetene vyevyo ndauwandeleni miyo. 27 Ndinou-iyedani murendele moi ndinouva-ani murendelanga. Kandinaupeleka wa nyo ngati mwemo ilambwela inaupelekelaathu. Mirima dinyu kadivuteye kapena ova. 28 Muvwa vevo ndauwandelani miyo ira, ‘Ndinodowa moi ndinoza ndize wa nyo.’ Akala munandiomeliwana, moosangalala ira ndinadowa wa Babanga, chifukwa Babanga ngu mulukulu kwaranya miyo. 29 Eno ndiuwandelani vyongo vyevi vyaanaireye, ira vyaza viireya muze muroromele. 30 Kandinaonga vyongo vinjinji na nyo chifukwa olamulela wa ilambwela unaaza moi kan’na kopolo wa miyo. 31 Koma ira athu a muilambwela kaiziwe ira ndinomuomeliwana Babanga, ndinopanga vyongo mogwilizana na vyevyo Babangoyo andilamulile liye. Maruwani, tiyemoni nivenyewo uno.”