Olembiwa na Mateyu

24 Vevo Yesu akuma liye wu kachisi, ofunjedae kooza wa liye ira kamuoni-e nyumba da vakachisivo. 2 Koma liye ooawandela ira: “Kodi kamunaviona vyongo vyetene vyevi? Ndithu ndinaauwandelani, vano kavinaza va-ala libwe lililetene vadimu va libwe limo-i lelo kalinaza ligwi-iwa.”

3 Angagaratile M’mwango wa Maolivi, ofunjedae kooza wa liye angali vaekave nomufuka ira: “Niwandeleni, kodi vyongo vyevi vinaza viireya alini, teto izindikilo yokalavo* winyu na ya mapeto a thawiila* inaza ikala n’ni?”

4 Yesu oosomeda ira: “Samalani ira muthu kau-olocheni, 5 chifukwa athu anjinji kanoza kaze muzina langa noonga ira, ‘Kristule ngu miyo,’ moi kanoza ka-oloche athu anjinji. 6 Munoza muvwe khani dokuza khondo m’malo o-iyana-iyana. Koma kamuze muove, chifukwa vyongo vyevi vinafuneya ireya koma mapeto kanaza kakala kaanafiyeve.

7 Tundu unoza uukelane na tundu umo-iwa teto umwene unoza uukelane na umwene umo-iwa. Unoza ukale ndala na vivomelezi m’malo o-iyana-iyana. 8 Vyongo vyetene vyevi kuwambeela wa mavuto alukulu.*

9 Vanduli viwa athu kanoza kaupelekeni ira muzuzumi-iwe teto kanoza kaupheni. Athu a mitundu detene kanoza kaidane na nyo chifukwa ya zina langa. 10 Vathawi ineyo athu anjinji kanoza ka-iye roromela Mulungu teto kanoza kapelekane koma teto idana. 11 Unoza ukale anamaongela anjinji onama teto kanoza ka-oloche athu anjinji. 12 Chifukwa yoenjedeleya wa athu oovwela malamulo, chikondi ya athu anjinji inoza iyeve. 13 Koma muthu unoyo unaze avilele mpakana mapeto ngunoyo unaze avulumuwe. 14 Uthenga wapamola wa Umwene unoza ulaleiwe vailambo yetene yavati wewo uli athu, ira ukale umboni wa athu a mitundu detene, vanduli viwa mapeto kanoza kafiye.

15 Eno mwaza muona yongo yonyakavala yozi-a iwonongeko, ineyo namaongela Danieli aongile liye, ingaimelile m’malo owela (owelenga aze azindikile), 16 athu anayo kali mu Yudeya kaze katawele umimwango. 17 Teto muthu unoyo uli vadimu va nyumba kaze atite ira adowe atukule katundu m’mba mwae. 18 Muthu unoyo uli umunda kaze awelele waniwa ira adowe alande malayae aunde. 19 Soka wa a-iyana oembekezela koma teto anayo kanaze kaamwi-enga a-ima m’malambo anayo! 20 Pitilizani pempela ira kamuze mutawe munyengo yodidila kapena va dambo la Sabata. 21 Chifukwa vathawi ineyo unoza ukale isauso ilukulu ineyo kinaireyevo kumela vowambeela va ilambo mpakana peeno, moi kinaza iireya nawili. 22 Onga vyoona, aakale ira malambwayo katikwiivi-iwe, kavali muthu unoyo avulumuwe. Koma chifukwa ya athu osakuliwayo, malambwayo kanoza kakwiivi-iwe.

23 Eno muthu aza auwandelani ira, ‘Konani! Kristu uli uno,’ kapena ‘Uli ule!’ kamuze muroromele vyevyo. 24 Chifukwa unoza uze athu onamedela ira Kristu koma teto anamaongela onama moi kanoza kapange vizindikilo vyakopolo koma teto vyodabwi-a, ira akala pivyowandeya, kaze ka-oloche ngakale athu osakuliwa. 25 Konani! Miyo ndiuchenjezani vyevi vyaanaireye. 26 Eno athu kaza kauwandelani ira, ‘Konani! Uli muipululu,’ kamuze mudowewo. Kaza kaonga ira, ‘Konani! Uli m’mbamu,’ kamuze muroromele vyevyo. 27 Chifukwa mofwanafwana na mwemo mphezi inavyerimelaathu kumela umamawa mpakana dowa fiya umazulo, vinaza vikala teto eno noza* wa Mwana wa muthu. 28 Uliwetene wewo uli yongo yokhwa, viwombankhanga vinaza vifwanyeya wewo.

29 Isauso ya malambo anayo yaza imala, zuwa linoza litime teto mwedi kunaza uoni-a wala uwa. Nyenyedi dinoza dimore kumela udimu teto kopolo da udimu dinoza ditekenyeye. 30 Vanduli viwa izindikilo ya Mwana wa muthu inoza ioneele udimu moi mafuko etene a vailambo yavati kanoza kavivaze vamirimani viwa chifukwa ya chisoni. Aluwa kanoza kamuone Mwana wa muthu azanga m’mirambo da udimu na kopolo koma teto ulemelelo ulukulu. 31 Liye unoza atumize angelwae noula wakopolo wa lipenga moi aluwa kanoza kasonkani-e athu osakuliwa kumela umbali 4 da lipevo, kumela umagomelo ailambo yavati mpakana umagomelo amo-iwa a ilambo.

32 Sopano funjedani vyokuza tengo wa nankuyu kumela va fanizoli: Tambiwa yapuwa nokaana matakuru, munoiziwa ira ilimwe ili vakwikwi. 33 Nanyen’ne teto chimozimozi, mwaza muona vyongo vyetene vyevi, muze muiziwe ira liye uli vakwikwi, uli vamulango. 34 Ndithu ndinauwandelani ira athu a m’bado ula katinaza kamala khwa etene, mpakana kangaonile vyongo vyetene vyevi vingaireile. 35 Udimu na ilambo yavati vinoza vimale, koma mawanga kanoza kakalevo mpakana walewale.

36 Onga vya dambolo na thawiwa, kalivo unoyo unaiziwa, ngakale angelo audimu kapena teto Mwana, koma Baba eka ngunoyo unaiziwa. 37 Chifukwa mofwanafwana na mwemo malambo a Nowa kaliliathu, pumwemo teto vinazeathu vikalele noza* wa Mwana wa muthu. 38 M’malambo anayo Igumula yaanafiye, athu koodja nong’wa. Alombwana kootela teto a-iyana kooteliwa mpakana dambo lelo Nowa avolowile liye muingalawa. 39 Athu koonyalanyaza vyevyo vyaireya mpakana igumula yoofiya nowaononga athu etene. Vinaza vikala teto eno noza wa Mwana wa muthu. 40 Vathawi ineyo, alombwana ambin’li kanaza kakala kangali umunda. M’mo-i unoza atukuliwe teto m’mo-iwoyo unoza a-iiwe. 41 A-iyana ambin’li kanaza kakala kachilanga vachilo. M’mo-i unoza atukuliwe teto m’mo-iwoyo unoza a-iiwe. 42 Eno pitilizanive kala maso chifukwa kamunaiziwa dambo lelo Mbwiinyu unaze liye.

43 Koma iziwani vi: Akala mwinyailo wa nyumba unaiziwe thawi ineyo oba unaze liye, kanagona moi kanalole ira oboyo akotole novolowa m’mba mwae. 44 Vachifukwa inela, nanyen’ne teto kalani okozeya, chifukwa Mwana wa muthu unaza afiya vathawi ineyo kamunaiganizela.

45 Kodi ngu mbaani kwenikweni unoyo uli kapolo ororomeleya koma teto wazelu unoyo mbwiyae amu-elile liye ira aing’anelenga achitwae avande, nowava-anga yodja vathawi yofwanelela? 46 Kapolo unola unoza akale osangalala, akala mbwiyae voza unaze amufwanye apanganga vyongo vyevi! 47 Ndithu ndinaauwandelani, liye unoza amu-ele ira aing’anelenga vyongo vyae vyetene.

48 Koma akala kapolo unola unatonyi-ede ira ngotakala nowambeela onga m’murimani mwae ira, ‘Mbwiyanga unaadimbeliwa,’ 49 nowambeela avaza akapolo afwae koma teto dja nong’wa limo-i na vidakwa, 50 mbwiyae wa kapoloyo unoza aze vadambo loi liye kanaliganizela na vathawi ineyo liye kanaiiziwa. 51 Eno unoza amuva-e ilango yovoreya vinjinji moi unoza amuvokede wewo uli athu achinyengo. Wewo liye unoza aule nokukuta mano.”