Olembiwa na Mateyu
20 “Umwene waudimu uli ngati muthu unoyo an’na munda wa mpesa, unoyo abe-ile mamawa vinjinji dowa saela aganyo ira kadowe ka-inde chito m’mundae wa mphesa. 2 Angagwilizanile na athwayo ira unongowava-a ndalama ya dinari imo-i va dambo, oowatumiza umundae wa mpesa. 3 M’ma 9 koloko mamawa* oodowa nawili dowa saela athu amo-iwa, moi oowona athu amo-iwa anayo kakede imela vasika o-okaana vyoira. 4 Eno liye ooawandela ira, ‘Nanyen’ne teto dowani mwa-inde chito m’mundanga wa mpesa. Ndinoza ndiuliveleni mofwanelela.’ 5 Eno aluwa koodowa. M’ma 12 koloko na 3 koloko tana,* mwinyailo wa mundole oodowa nawili dowa saela aganyo amo-iwa. 6 Vogomi-eda viwa, m’ma 5 koloko mazulo* oodowa nawili dowa saela aganyo moi oofwanya amo-iwa anayo kali kangakede imela. Liye oowafuka ira, ‘Chifukwa n’ni mukede imela vano dambo letene oo-inda chito?’ 7 Aluwa koomusomeda ira, ‘Chifukwa kalivo muthu unoyo unilembile ganyo.’ Liye ooawandela ira, ‘Nanyen’ne teto dowani mwa-inde chito m’mundanga wa mpesa.’
8 Mazulo, mwinyailo wa mundole oomuwandela kapitawae ira, ‘Itana achitwale uwalivele, uwambeele alivela ogomi-eda, era eno uze umari-e na owambeela.’ 9 Athu anayo kaambeele inda chito 5 koloko mazulo kangafiile, uliwetene wa aluwa oowachela dinari imo-i. 10 Ndiye owambeelale kangafiile, kaganiza ira kanowachela ndalama dinjinji, koma naaluwene teto kaliveliwe dinari imo-i. 11 Kangaliveliwe, koowambeela mudandaulela mwinyailo wa munda wa mpesole 12 ira, ‘Ogomi-edala kakede inda chito ola limo-i loka, koma muwalivela mofwanafwana na iyo anayo ni-indile chito mwatindi vinjinji dambo letene vazuwa!’ 13 Koma vomusomeda m’mo-i mwa athwayo, mwinyailo wa mundoyo aongile ira, ‘Miyo kandiuchimwele. Kodi vale kanapanganile malipilo a dinari imo-i? 14 Keda tukula ndalamawo udowenga. Ndinafuna ndimuva-e ogomi-edola ndalama yofwanafwana na ineyo ndiuva-ile miyo. 15 Kodi kandin’na ufulu opanga vyevyo ndinafuna miyo na vyongo vyanga? Kapena kodi unapanga sanje chifukwa yoi ndipanga vyongo vyapama?’* 16 Eno ogomi-eda kanaza kakala owambeela teto owambeela kanaza kakala ogomi-eda.”
17 Vevo kadowaathu wu Yelusalemu, Yesu oowalandela vambali ofunjedae 12 noawandela ira: 18 “Sopano ndinadowa wu Yelusalemu moi Mwana wa muthu unodowa apelekiwe wa asembe alukulu na alembi. Aluwa kanodowa kamuweluze ira aphiwe 19 teto kanodowa kamupeleke wa athu a mitundu dimo-i ira kamupangele vyaibewe, muvaza nomupachika vatengo, koma va dambo lanaralu unoza avenyi-iwe.”
20 Vanduli viwa iyana wa Zebedayo oofiya wa Yesu na a-imae aalombwana ambin’li moi oomukokorela nomuvepa yongo imo-iwene. 21 Liye oomufuka iyanoyo ira: “Munafuna ndiupangeleni n’ni?” Iyanoyo oosomeda ira: “Lonjezani ira a-imanga aalombwana ambin’lala, kaze kakale limo-i na nyo mu Umweninyu. M’mo-i aze akale undanda linyu lodjana, m’mo-iwa undanda linyu lamazele.” 22 Yesu oosomeda ira: “Kamunaiziwa ineyo munavepa nyo. Kodi munokoza ng’wa vyevyo ndi-alile miyo vang’ono ng’wa?” Aluwa koosomeda ira: “Ee ninokoza ng’wa.” 23 Liye ooawandela ira: “Pivyoona ira munoza mung’we vyevyo ndi-alile miyo vang’ono ng’wa. Koma miyo kandili ofwanelela sakula muthu unoyo unaze akale undanda langa lodjana kapena lamazele. Babanga ngunoyo unaze apeleke mwai unola wa athu anayo uwasakulile liye.”
24 Ofunjeda 10 amo-iwale kangavwile vyevi, koolunduwa vinjinji na vyevyo alombwana ambin’li a vaibalala kapangileathu. 25 Koma Yesu oowaitana noawandela ira: “Nyo munoiziwa ira olamulela a muilambwela kanolamulela athu mwemo kanafunelaathu moi andimuwa andimuwa kano-indi-eda chito kopolo diwa vopondeleza athu. 26 Vyevi kavinafuneya ireyanga vaari vinyu. Koma muthu uliwetene unoyo unafuna kala mulukulu vaari vinyu unafuneya kala mtumikinyu 27 teto muthu uliwetene unoyo unafuna ira akale owambeela vaari vinyu unafuneya kala kapolwinyu. 28 Vyevi vinofwanafwana na vyevyo Mwana wa muthu apangile liye. Liye kaazile ira aze atumikeliwe koma azile za tumikela koma teto za peleka moywae dipo* ira aombole athu anjinji.”
29 Vevo kakumaathu mu mzinda wa Yeriko, gulu lilukulu la athu loomu-arela. 30 Ndiye alombwana ambin’li anayo kan’na vuto lo-oona koogarati mpepetele mwa sewu moi kangavwile ira Yesu unaavira, kookuwa ira: “Mbwiyeni, Mwana wa Davide, nipangeleni chifundo!” 31 Ndiye gulu la athulo loowanyanyuwela noawandela ira kamiyale. Koma pavevo aluwa kakuwileathu vinjinji ira: “Mbwiyeni, Mwana wa Davide, nipangeleni chifundo!” 32 Eno Yesu ooimela moi oowaitana nowafuka ira: “Munafuna ira ndiupangeleni n’ni?” 33 Aluwa koomusomeda ira: “Mbwiyeni, nikami-eni ira niambeele ona.” 34 Vowatonyi-eda chifundo, Yesu oo-inda m’maso mwiwa, moi thawi ineyo athwayo koowambeela ona teto koomu-arela.