Olembiwa na Yohani
10 “Ndithu ndinaauwandelani, muthu ovolowa mukhola la khosa moira gwela vamalo amo-iwene, o-okala virela vamulango, unoyo ngoba koma teto owaka vyongo vya athu amo-iwa. 2 Koma unoyo unavolowela vamulango, ngu m’busa wa khosado. 3 Mulonda wa vamulango unomu-ulela moi khosa dinovwela mawae. Khosa daedo unodiromola mazina nodisogolela. 4 Akumi-a khosa dae detene unde, unodisogolela moi khosado dinomu-arela, chifukwa dinoiziwa mawae. 5 Khosado kadinaza dimu-arela muthu wailendo koma dinoza dimutawe, chifukwa kadinaiziwa mawu a alendo.” 6 Yesu oowonga fanizo leli wa aluwa, koma aluwa katavwechechile vyevyo atapulela liye.
7 Eno Yesu ooawandela ira: “Ndithu ndinaauwandelani, miyo ndili mulango unoyo khosa dinaviravoathu. 8 Etene anayo kazide noonganga ira mba abusa, mboba koma teto owaka vyongo vya athu amo-iwa moi khosa kadiavwele. 9 Miyo ndili mulango. Uliwetene ovolowa zela mwa miyo unoza avulumuwe moi unoza avolowenga nokuma dowa fwanya yodja. 10 Oba unoza na yolinga yofuna za ba, pha noononga. Koma miyo ndiza ira khosa dikaena moyo mpakana walewale. 11 Miyo ndili m’busa wapama. M’busa wapama unopeleka moywae ira avulumuche khosa dae. 12 Muthu waganyo, unoyo kai m’busa moi khosado kai dae, aona m’mbulu uzanga uno-iya khosado notawa. Ndiye m’mbuluyo uno-inda khosa dimo-i koma dimo-i unodibalalecha. 13 Liye unotawa chifukwa yoi ngwaganyo moi kanatamaala vya khosado. 14 Miyo ndili m’busa wapama. Khosa danga ndinodiiziwa teto khosado dinondiiziwa, 15 ngati mwemo vililiathu ira Baba unondiiziwa moi miyo teto ndinomuiziwa Baba. Eno ndinopeleka moywanga ira ndivulumuche khosado.
16 Ndikaana khosa dimo-i dedo kai damukola leli. Khosa dedi teto ndinafuneya dizana moi dinoza divwe mawanga. Dinoza dikale gulu limo-i moi m’busiwa unaza akala m’mo-i. 17 Babanga unondiomeliwana chifukwa ndinopeleka moywanga ira ndidowe ndauwachele nawili. 18 Kavali muthu unoyo unachosa moywanga, koma ndinoupeleka mofuna mwanga. Ndikaana kopolo doupeleka koma teto ndikaana kopolo douwachela nawili. Babanga ngunoyo andilamulile ira ndipange vyevi.”*
19 Chifukwa ya mawu anayo aongile liye Ayudayo koogawaneya nawili. 20 Athu anjinji kaonga ira: “Unola ukaana iwanda moi ngwamisala. Chifukwa n’ni munamuvuruwana?” 21 Athu amo-iwa kaongile ira: “Anala kai mawu a muthu o-indiwa na iwanda. Kodi iwanda inokoza ula maso a athu o-oona?”
22 Vathawi ineyo mu Yelusalemu mooireya Ikondwelelo Yopeleka Kachisi wa Mulungu. Inela yali thawi yodidila vinjinji 23 moi Yesu aenda mukachisimo vamalo oromoliwa ira likhonde la Solomo. 24 Vanduli viwa Ayuda koomurungunuwa nowambeela muwandela ira: “Chifukwa n’ni kunafuna niwandela vyoona viwa vyokuza weyo? Akala uli Kristu, niwandele moovira m’mbali.” 25 Yesu oowasomeda ira: “Ndiuwandelani wale, koma nyo kamunaroromela. Chito dedo ndinapanga miyo muzina la Babanga, dinondipangela umboni. 26 Koma nyo kamunaroromela, chifukwa kamuli khosa danga. 27 Khosa danga dinovwa mawanga. Miyo ndinodiiziwa moi khosado dinondi-arela. 28 Ndinoza ndidiva-e moyo oomala moi kadinaza dionongeya koma teto kavali muthu unoyo unaze andiwake m’mandani mwanga. 29 Khosa dedo Babanga undiva-ile liye tidofuneya vinjinji kwaranya vyongo vyetene, moi kavali muthu unoyo unawande muwaka Babanga. 30 Miyo na Babanga nili ogwilizana.”
31 Veva teto Ayudayo koododa mabwe ira kamuvazena. 32 Yesu ooawandela ira: “Ndiuwoni-ani chito dinjinji dapama dokumela wa Baba. Ndiye munafuna mundivaze chifukwa ya chito iivi?” 33 Ayudayo koomusomeda ira: “Kaninafuna uvaza chifukwa ya chito dapama, koma chifukwa yoi unyoza Mulungu. Weyo unaviona ngati mulungu koma wangali muthu.” 34 Yesu oowafuka ira: “Kodi mu Ilamulo inyu katilembilemo ira, ‘Miyo ndaongile ira: “Nyo muli milungu”’?* 35 Akala athu anayo karuni-iwe na mawu a Mulungu anayo katinamala kopolo, kaaromolile ira ‘milungu,’ 36 kodi nyo munandiwandela miyo unoyo ndaweli-iwe na Baba koma teto nditumiza muilambo ira, ‘Unonyoza Mulungu,’ chifukwa yoi ndiongile ira, ‘Ndili Mwana wa Mulungu’? 37 Akala kandinapanga chito da Babanga, kamundiroromele. 38 Koma akala ndinadipanga, ngakale ira kamunandiroromela, roromelani chitodo, ira muiziwe nopitilizave iziwa ira Baba na miyo nili ogwilizana.” 39 Eno koofuna ira kamu-inde, koma liye oowazemba.
40 Liye oolambuwa Yorodano dowa umalo wewo Yohani abatiza liye athu vowambeela moi ookala wewo. 41 Athu anjinji kooza wa liye nowambeela onga ira: “Yohani kaapangile izindikilo iliyetene, koma vyetene vyevyo aongile liye vyokuza muthu unola vyali vyoona.” 42 Eno athu anjinji wewo koomuroromela Yesu.