Olembiwa na Mateyu
15 Vanduli viwa, Afarisi na alembi okumela wu Yelusalemu koodowa wa Yesu nomufuka ira: 2 “Chifukwa n’ni ofunjedinyu katina-arela miyambo da makolwi-u awale? Mwaisazo, katina-amba m’mandani* kafunanga dja.”
3 Koma liye oowasomeda ira: “Chifukwa n’ni nyo kamuna-arela malamulo a Mulungu chifukwa ya miyambo dinyu? 4 Mwaisazo, Mulungu aongile ira, ‘Mulemekezenga ababinyu na am’minyu.’ Koma teto aongile ira, ‘Muthu uliwetene omuongela babae kapena m’mae mawu aibewe unafuneya phiwa.’ 5 Koma nyo munaonga ira, ‘Muthu uliwetene omuwandela babae kapena m’mae ira: “Yongo iliyetene ineyo ndin’na miyo, ineyo ndafuneya miyo ukami-anani chi mphaso yoi ndipeleke wa Mulungu,” 6 kanafuneya kami-a babae.’ Eno mupangi-a ira mawu a Mulungu kakale o-okaana chito chifukwa ya miyambo dinyu. 7 Athu achinyengo nyo! Yesaya oolosela movweya pama vyokuza nyo vevo aongile liye ira: 8 ‘Athwala kanandilemekeza na milomo doka, koma mirima diwa dili undendai vinjinji na miyo. 9 Iliyetene ineyo kanapangaathu vondilambela chiyo-okaana chito, chifukwa kanofunji-a malamulo a athu kalanga ngati mba malamulo a Mulungu.’” 10 Angaongile vyevi, ooitana gulu la athulo ira lize vakwikwi moi ooawandela ira: “Vuruwanani teto muzindikile vyevyo vinatapulelaathu: 11 Yongo ineyo inavolowa muwano mwa muthu kai ineyo inamutakali-a, koma ineyo inakuma muwanoni mwae chineyo inamutakali-a.”
12 Ndiye ofunjedae kooza nomufuka ira: “Kodi munoiziwa ira Afarisi kookumudwa na vyevyo muongile nyo?” 13 Koma liye oowasomeda ira: “Mbewu iliyetene ineyo kizaliwe na Babanga waudimu inoza iduliwe. 14 A-iyeni anayo. Aluwa mbaasogoleli o-oona. Eno akala muthu o-oona unamusogolela muthu o-oona fwae, etene ambin’li kanoza kamorele muzenje.” 15 Ndiye Petulo oomuvepa ira: “Nitapuleleni fanizo lelo mwaongile nyo.” 16 Yesu oowafuka ira: “Kodi nanyen’ne kamulivwechechile? 17 Kodi kamunaiziwa ira yongo iliyetene ineyo ivolowile muwano inovira fiya m’mbani era eno inodowa tatiliwa uchimbuzi? 18 Koma yongo iliyetene ineyo inakuma vamulomo va muthu inakumela m’murimani moi vyongo vyevi pivyevyo vinamutakali-a muthu. 19 Mwaisazo, m’murimani munokumela maganizo otakala ala: maganizo opha athu, aigololo, aiwerewere,* oba, maumboni onama koma teto nyoza Mulungu. 20 Vyongo vyevi pivyevyo vinamutakali-a muthu, koma dja oo-amba* m’mandani kunamutakali-a muthu.”
21 Yesu angakumile wewo oodowa muvigawo vya Turo na Sidoni. 22 Ndiye iyana m’mo-iwa wawu Foinike ooza kumela muvigawo vyevi moi oomuvepa mokuwa ira: “Ndipangeleni chifundo Mbwiyeni, Mwana wa Davide. Mwananga wa-iyana unozuzumi-iwa vinjinji na iwanda.” 23 Koma liye kamusomedile iliyetene. Eno ofunjedae koomuwandela ira: “Muwandeleni ira adowenga, chifukwa unaapitilizave kuwa munduli mwi-umu.” 24 Liye oowasomeda ira: “Miyo kandirumiwe wa muthu uliwetene koma ndirumiwe wa khosa do-olowa da nyumba ya Isaraeli.” 25 Iyanole ooza vakwikwi nomukokorela noonga ira: “Mbwiyeni, ndikami-eni!” 26 Liye oomusomeda ira: “Kai paama landa yodja ya a-ima vocheda anambwa ang’onong’ono.” 27 Iyanoyo aongile ira: “Pivyoona Mbwiyeni, koma anambwa ang’onong’ono kanodja vinyenyeswa vyevyo vinamora vatebulo va ambwiiwa.” 28 Ndiye Yesu oomusomeda ira: “M’mani, iroromelo inyu chiilukulu. Vyevyo munafuna nyo viireye wa nyo.” Moi thawi ineyo mwanae oochila.
29 Yesu angakumile wewo, oodowa vakwikwi na nyanja ya Galileya moi oogwela umwangoni dowa garati wewo. 30 Vanduli viwa athu anjinji kooza wa liye. Athwayo koomuzelana athu orangala, okotowa viwalo, a vuto lo-oona, a vuto lo-oonga, na athu amo-iwa anjinji o-iyana-iyana. Aluwa koowagarati-a athwayo vakwikwi na manyalwae moi liye oowachili-a. 31 Eno gulu la athulo loodabwa ona athu o-oonga kaonganga, orangala kaendanga koma teto athu o-oona kaonanga moi kootamanda Mulungu wa Isaraeli.
32 Koma Yesu ooitana ofunjedae noawandela ira: “Gulu la athuli linondivwi-a chisoni, chifukwa athwala kookala na miyo wa malambo maralu moi katin’na yodja. Kandinafuna awandela ira kadowenga na ndala* chifukwa kanokoza komuwa vandila.” 33 Koma ofunjedayo koomusomeda ira: “Uno kuundendai na athu, nanga yodja yokwakwanela gulu letene leli ninaifwanye waani?” 34 Ndiye Yesu oowafuka ira: “Mun’na mikate dingasi?” Aluwa koosomeda ira: “Nin’na mikate 7 na somba doyeva.” 35 Eno ooawandela athwayo ira kagarati. 36 Ndiye oolanda mikate 7 na somba dile nopempela. Vanduli viwa oodimeyameya nowava-a ofunjedae moi aluwa koogawela gulu la athulo. 37 Athu etene anayo koodja norumbala, moi vyo-ala vyevyo kadodelileathu vyoozaala madengo alukulu alukulu 7. 38 Athu anayo kadjile kali alombwana 4 000, o-owelengela a-iyana na a-ima ang’onong’ono. 39 Vanduli viwa, angawandelile athwayo ira kadowenga waniwa, liye oogwela ngalawa nodowa fiya muigawo ya Magadani.