Vyoira Vya Anamarumiwa
24 Vangavirile malambo 5, ndimuwa wa asembe Hananiya ooza limo-i na andimuwa amo-iwa, koma teto limo-i na muthu m’mo-iwa ooiziwa onga,* zina lae Teritulo. Aluwa koowambeela fotokoza vyokuza mulandu wa Paulo wa bwanamkubwa Felike. 2 Teritulo angava-iwe mwai ira aongevo, oowambeela onga vyomunamedela Paulo ira:
“Iyo nili vamurendele chifukwa ya nyo, koma teto vyongo vichenja vaari vi-u chifukwa yoi munolamulela mwazelu. 3 Nyo Olemekezeya a Felike, iyo thawi detene koma teto uliwetene, ninoona zelu dinyu moi ninoyamikela vinjinji. 4 Koma ira kandiutatili-eni thawi, ndinavepa ira muniomele murima moi muvuruwane vang’ono mawu anayo ninafuna iyo uwandelani. 5 Iyo nifwanyile ira muthula unowambeeli-a isokonezo, moi unolimbikisa Ayuda vailambo yetene ira kaukelenga boma. Koma teto ngu msogoleli wa gulu la mpatuko la athu awu Nazareti. 6 Koma teto muthula oofuna takali-a kachisi moi iyo noomu-inda. 7* —— 8 Mwamufuka, munokoza simikizela ira vyongo vyetene vyevyo ninaonga iyovi pivyoona.”
9 Naaluwene teto Ayuda koovolowelavo moi koowonga mosimikiza ira vyevi pivyoona. 10 Bwanamkuboyo oomuva-a Paulo ufulu oyi aongevo, moi Pauloyo aongile ira:
“Ndinoiziwa ira nyo mukala oweluza wa tundu unola wachaka dinjinji. Eno ndili osangalala onga voviteteza va vyevyo athwala kanandinamedelaathu. 11 Akala munasaele munokoza fwanya umboni oyi kavavirile malambo 12 kumela vevo ndadowile miyo wu Yelusalemu dowa lambela Mulungu. 12 Moi athwala katinandifwanyevo mukachisi ndiruni-ananga na muthu uliwetene. Teto katinandifwanyevo ndiambeeli-anga ipolowe m’masunagoge kapena valivetene mu mzindola. 13 Moi vathawiila katinawande peleka umboni wa vyevyo kanandinamedelaathuvi. 14 Koma yongo ineyo ndinasomedela miyo wa nyo choi: Ndila yolambelela ineyo aluwa kanairomolaathu ira ‘gulu la mpatuko,’ chineyo ndinai-arela miyo votumikela Mulungu wa makolwanga. Chifukwa ndinororomela vyetene vyevyo vili mu Ilamulo koma teto vyetene vyevyo anamaongela kalembileathu. 15 Moi miyo ndikaana idedi-edo yofwanafwana na ineyo athwala kan’naathu, ira Mulungu unoza avenyi-e athu olungama koma teto o-olungama. 16 Chifukwa ya vyevi, ndinoesaesa mwatindi ira ndikaena ikumbumtima yapama wa Mulungu koma teto wa athu. 17 Ndiye vangavirile chaka dinjinji, ndooza wu Yelusalemu ira ndize ndipeleke mphaso dachifundo wa athu a tundwanga koma teto ira ndize ndipeleke sembe. 18 Vevo ndapanga miyo vyevi, aluwa koondifwanya mukachisi ndingali owela mogwilizana na vyevyo Ilamulo yaongaathu. Aluwa katandifwanyile na gulu la athu, kapena ndiambeeli-anga isokonezo koma vakede kala Ayuda amo-iwa okumela muigawo ya Asia. 19 Aakale ira Ayuda anayo koondifwanyana mulandu, mbanayo kafuneya za wa nyo ira kaze kandiimbe mulandu. 20 Kapena muwafuke athu anayo kali vevala, ira kafotokoze ekiwa akala kandifwanyilena mulandu uliwetene vevo ndaimelile miyo vamaso va Khoti Lilukulu la Ayuda. 21 Mawu amo-i oka anayo ndaongile miyo, vevo ndaimelile miyo vaari viwa mboi, ‘Miyo peeno ndinaweluziwa chifukwa yoi ndinororomela vyoi okhwa kanoza kavenyi-iwe!’”
22 Voi Felike ooiziwa pama khani yokuza Ndila ya Mbwiye inela, ooimecha mulanduyo moi aongile ira: “Ndinoza ndigamule mulandula Lusiya ndimuwa wa asilikali aza afiya.” 23 Liye oomulamula msogoleli wa asilikali ira amu-eele Paulo mundende, koma amuva-e ufulu moi alolenga ira athu a tundwae kaze kamukami-enga.
24 Vangavirile malambo mangasene, Felike oofiya limo-i na iyanae Durusila, unoyo ali Muyuda. Ndiye Felike oomuitani-a Paulo moi oovuruwana vevo afotokoza liye vyokuza roromela Kristu Yesu. 25 Koma vevo afotokoza liye vyokuza chilungamo, viruni-a koma teto iweluzo ineyo inaza usogolo, Felike oowova, moi oomuwandela Paulo ira: “Ba-i vathawiila ambeela dowa, ndaza ndifwanya thawi ndinoza ndiuitane.” 26 Vathawi imo-ive ineyo Felike aganiza ira Paulo unomuva-a ndalama. Eno oomuitani-a vakwikwi vakwikwi kambilananga na liye. 27 Vangavirile chaka mbin’li, Porikiyo Fesito ookala mwene m’malo mwa Felike. Koma voi Felike oofuna ira Ayuda kamuomeliwengana, oomu-iyave Paulo mundende.