Olembiwa na Maliko

10 Yesu angakumile wewo, oodowa umalile a Yudeya ukombela imo-iwa ya Yorodano. Wewo teto gulu la athu looza wa liye. Monga mwemo apangela liye thawi detene liye oowambeela afunji-a. 2 Ndiye Afarisi kooza wa liye na yolinga yoi kaze kamuyese. Aluwa koomufuka akala vyali vyololeya ira lombwana amu-iye iyanae. 3 Liye ooawafuka ira: “Kodi Mose aulamulileni n’ni?” 4 Aluwa koomusomeda ira: “Mose oolola ira lombwana alembenga kalata yomali-ela ukwati nomu-iya iyanoyo.” 5 Koma Yesu ooawandela ira: “Mose aulembeleni lamulo leli chifukwa youma murima winyu. 6 Koma vowambeela va ilengedwe, ‘Mulungu oomulenga lombwana na iyana. 7 Vachifukwa inela lombwana unoza amu-iye babae na m’mae, 8 moi ambin’layo kanoza kakale thuthu limo-i,’ aluwa katinakala athu ambin’li koma kanakala thuthu limo-i. 9 Eno ineyo Mulungu uimangile liye vamo-i, muthu kaimwalani-e.” 10 Angavolowile nawili m’mba, ofunjedae koowambeela mufuka vya khani inela. 11 Liye ooawandela ira: “Muthu uliwetene unoyo umu-iile iyanae notela iyana m’mo-iwa, upanga igololo moi umuchimwela iyanoyo. 12 Teto akala iyana umu-iile mamunae noteliwa na lombwana m’mo-iwa, upanga igololo.”

13 Sopano athu koowambeela muzelana a-ima ang’onong’ono ira aa-inde na mandae, koma ofunjedae koowanyanyuwela. 14 Koma Yesu angaonile vyevi oolunduwa vinjinji moi ooawandela ira: “A-iyeni a-imayo kaze wa miyo, kamuwakoondi-e. Chifukwa Umwene wa Mulungu ngwa athu ngati anala. 15 Ndithu ndinaauwandelani, muthu uliwetene o-owachela Umwene wa Mulungu ngati mwana n’ng’onong’ono kanaza avolowa ngakale vang’ono mu Umwenoyo.” 16 Ndiye liye oowatukula a-imayo m’mandani mwae moi oowa-inda na mandae nowambeela adalisa.

17 Vevo kakumaathu wewo, muthu m’mo-iwa oomutamangela nokokora vamaso vae. Ndiye oomufuka ira: “Mphunzisi wapama, kodi ndipange n’ni ira ndidowe ndafwanye moyo oomala?” 18 Yesu oomusomeda ira: “Chifukwa n’ni unandiromola ira wapama? Kavali wapama, koma Mulungu eka. 19 Weyo unoiziwa malamulo oyi: ‘Kamuphe* muthu, kamupange igololo, kamube, kamupeleke umboni onama, kamubele muthu mwachinyengo koma teto lamulo loi mulemekezenga babinyu na m’minyu.’” 20 Muthuyo oomusomeda ira: “Mphunzisi, ndikala ndi-arelanga malamulo etene anala ambeela ndingali mwana.” 21 Yesu oomuing’ana moi oomuomeliwana. Vanduli viwa oomuwandela ira: “Vikala yongo imo-i ineyo ina-alela mwa weyo. Dowa waguli-e vyongo vyetene vyevyo un’na we teto ndalama diwa udowe wava-e athu osauwa. Wera eno unoza ukaena chuma udimu, ndiye vanduli viwa uze ukale o-arelanga.” 22 Koma liye angavwile mawu anala ookumudwa moi oodowa waniwa angali wachisoni, chifukwa ookaana katundu oinjiva.

23 Yesu angaing’anile mbali na mbali, ooawandela ofunjedae ira: “Vinaza vikala vyorucha vinjinji ira athu a ndalama kaze kavolowe mu Umwene wa Mulungu!” 24 Ofunjedayo koodabwa na mawu anala. Ndiye Yesu ooawandela ira: “A-imanga, volowa mu Umwene wa Mulungu korucha vinjinji! 25 Kai vyorucha ira ngamila ivolowe va muli-a ung’onong’ono wa singano iyana noi muthu olemela avolowe mu Umwene wa Mulungu.” 26 Aluwa koodabwa vinjinji moi koomufuka* ira: “Akala chi eno, ndiye ngu mbaani unoyo unavulumuwe?” 27 Yesu oowaing’anechecha noawandela ira: “Wa athu vyongo vyevi kai vyowandeya, koma vyongo vyetene pivyowandeya wa Mulungu.” 28 Petulo oowambeela muwandela ira: “Kaonani! Iyo ni-iya vyongo vyetene nou-arelani.” 29 Yesu aongile ira: “Ndithu ndinaauwandelani, kavali muthu unoyo u-iile nyumba, achimwenae, arongolae, am’mae, ababae, a-ima kapena maminda chifukwa ya miyo koma teto chifukwa ya uthenga wapama, 30 unoyo vathawiila* kanaza afwanya vyongo vyoinjiva wilikiza maulendo 100. Liye unoza afwanye nyumba, achimwenae, arongolae, am’mae, a-ima na maminda, koma teto unoza azuzumi-iwe, moi usogolo unoza afwanye moyo oomala. 31 Koma anjinji anayo kali oowambeela kanaza kakala ogomi-eda teto ogomi-eda kanaza kakala oowambeela.”

32 Sopano koopitiliza ulendwiwa odowa wu Yelusalemu moi Yesu ali vasogolo viwa. Ofunjedayo koodabwa vinjinji moi athu anayo kamu-arela koowambeela ova. Veva teto Yesu oolandela vambali ofunjedae 12 nowambeela awandela vyongo vyevyo vya-alile vang’ono muireela. Aongile ira: 33 “Sopano ninadowa wu Yelusalemu moi Mwana wa muthu unodowa apelekiwe wa asembe alukulu na alembi. Aluwa kanodowa kamuweluze ira aphiwe teto kanodowa kamupeleke wa athu a mitundu dimo-i. 34 Aluwa kanodowa kamupangele vyaibewe, mutapeda, muvaza nomupha, koma vaza vavira malambo maralu, unoza avenyi-iwe.”

35 Ndiye Yakobo na Yohani, a-ima a Zebedayo, koodowa wa liye nomuwandela ira: “Mphunzisi, ninafuna ira munipangele yongo iliyetene ineyo ninauvepeni iyo.” 36 Liye oowafuka ira: “Munafuna ndiupangeleni n’ni?” 37 Aluwa koomusomeda ira: “Munilole ira m’mo-i wa iyo aze akale undanda linyu lodjana teto m’mo-iwa aze akale umazele winyu mu Umweninyu.” 38 Yesu ooawandela ira: “Kamunaiziwa ineyo munavepa nyo. Kodi munokoza ng’wa vyevyo ndinang’wa miyo kapena munokoza batiziwa ubatizo unoyo ndinabatiziwa miyo?” 39 Aluwa koomusomeda ira: “Ee ninokoza panga vyevyo.” Ndiye Yesu ooawandela ira: “Vyevyo ndinang’wa miyo munoza mung’we, teto munoza mubatiziwe ubatizo unoyo ndinabatiziwa miyo. 40 Koma miyo kandili ofwanelela sakula muthu unoyo unaze akale undanda langa lodjana kapena lamazele. Koma Babanga ngunoyo unaze apeleke mwai unola wa athu anayo aasakulile liye.”

41 Ofunjeda 10 amo-iwale kangavwile vyevi, koowalunduwela vinjinji Yakobo koma teto Yohani. 42 Koma Yesu oowaitana noawandela ira: “Nyo munoiziwa ira olamulela a muilambwela kanolamulela athu mwemo kanafunelaathu, moi andimuwa andimuwa kano-indi-eda chito kopolo diwa vopondeleza athu. 43 Vyevi kavinafuneya ireyanga vaari vinyu. Koma muthu uliwetene unoyo unafuna kala mulukulu vaari vinyu unafuneya kala mtumikinyu 44 teto muthu unoyo unafuna kala owambeela vaari vinyu unafuneya kala kapolo wa athu etene. 45 Chifukwa ngakale Mwana wa muthu kaazide ira aze atumikeliwe koma azide za tumikela koma teto za peleka moywae dipo* ira aombole athu anjinji.”

46 Vanduli viwa koofiya wu Yeriko. Koma vevo liye limo-i na ofunjedae koma teto gulu lilukulu la athu kakumaathu mu Yeriko, Batimeyu (mwana wa Timeyu) unoyo ali ovepavepa koma teto o-oona, ali angagaratile mpepetele mwa sewu. 47 Batimeyu angavwile ira Yesu Mnazareti unaavira, ookuwa ira: “Yesu, mwana wa Davide, ndipangeleni chifundo!” 48 Angapangile eno athu anjinji koowambeela musumulula nomuwandela ira amiyale. Koma vevo kamuwandelaathu vyevi pavevo asimbwa liye kuwa ira: “Mwana wa Davide, ndipangeleni chifundo!” 49 Eno Yesu ooimela noonga ira: “Muwandeleni aze uno.” Aluwa koomuitana muthu o-oonoyo nomuwandela ira: “Limba murima, venya udowe, liye unaauitana.” 50 Eno liye ootatila malayae aunde moi ooimela mombaraanya dowa wa Yesu. 51 Ndiye Yesu oomufuka ira: “Unafuna ira ndiupangele n’ni?” Muthu unoyo an’na vuto lo-oonoyo oomusomeda ira: “Rab·boʹni,* ndikami-eni ira ndiambeele ona.” 52 Yesu oomuwandela ira: “Dowa. Iroromelwawo iuchili-a.” Thawi ineyo oowambeela ona, moi oowambeela mu-arela Yesu.