Olembiwa na Maliko

4 Yesu oowambeela funji-a mpepetele mwa nyanja moi gulu la athu looza vakwikwi na liye. Eno liye oogwela mungalawa nogarati mungalawamo vandendai vang’ono na athwayo, koma gulu letene la athulo loogarati mpepetele mwa nyanjeyo. 2 Teto oowambeela afunji-a vyongo vinjinji vo-indi-eda chito mafanizo. Vowafunji-avo liye aawandela ira: 3 “Kavuruwanani! Muthu m’mo-iwa oodowa fesa mbewu. 4 Vevo afesa liye mbewudo, mbewu dimo-i doomorela m’mbali mwa sewu moi mbalame dooza nodidja. 5 Mbewu dimo-i doomorela vamabwe vevo vakede kala theya yoyeva moi chifukwa ya vyevi mbewudo doomela mombaraanya. 6 Koma ungazide zuwa, mbewudo doonyala moi vogomi-eda viwa doouma chifukwa yoi michichidiwa kadavolowile vati. 7 Mbewu dimo-i doomorela vaminga moi mingado doolepeli-a ira mbewudo diulukule moi kadabalile ipaso iliyetene. 8 Koma mbewu dimo-i doomorela vatheya yapama moi dingamelile noulukula, doowambeela bala vipaso. Mbewu imo-i yoobala vipaso 30, imo-iwa 60 teto imo-iwa 100.” 9 Vanduli viwa oopitiliza onga ira: “Muthu unoyo un’na mabaru, avwe.”

10 Sopano vevo Yesu ali liye vaekave, athu amo-iwa anayo kali vakwikwi na liye limo-i na anamarumiwa 12, koowambeela mufuka vyokuza mafanizo anayo aongile liye. 11 Liye ooawandela ira: “Nyo muva-iwa mwai oyi muvwecheche isisi yopatuleya ya Umwene wa Mulungu. Koma athu amo-iwa kanowandeliwa vyongo vyetene vo-indi-eda chito mafanizo 12 ira kaing’anenga, koma kationenga. Kavwenga, koma katizindikilenga vyevyo vinatapulelaathu. Koma teto ira katichenje nokululukiwa.” 13 Liye ooawandela teto ira: “Akala fanizoli kamunalivwechecha, ndiye munavwecheche avi mafanizo amo-iwa etene?

14 Muthu ofesa mbewu unofesa mawu a Mulungu. 15 Eno mbewu dedo dinamorela m’mbali mwa sewu mbaathu anayo kanavwa mawu a Mulungu, koma mombaraanya Satana unoza nochosamo mawu anayo kafesiwe m’murimani mwiwa. 16 Mofwanafwana na vyevi, mbewu dedo dafesiwe vamabwe mbaathu anayo kanavwa mawu a Mulungu, moi kanoawachela mosangalala. 17 Koma aluwa katinakaana michichi m’mirimani mwiwa moi kanodowa vasogolo wathawi yoyeva. Ndiye kaambeela vuteya kapena zuzumi-iwa chifukwa ya mawayo, kanofooka. 18 Ndiye vikala teto mbewu dimo-i dedo dinafesiwa vaminga. Anala mbaathu anayo kanavwa mawu a Mulungu, 19 koma nkhawa da moyo wa muthawiila,* chinyengo yakopolo ya chuma koma teto lakalaka vyongo vimo-i, vinovolowa m’murimani mwiwa nolepeli-a mawu a Mulungu ulukula moi katinabala vipaso. 20 Vogomi-eda viwa, mbewu dedo dafesiwe vatheya yapama mbaathu anayo kanavuruwana mawu a Mulungu moi kanoawachela pama koma teto kanobala vipaso, m’mo-i vipaso 30, m’mo-iwa 60 teto m’mo-iwa 100.”

21 Liye ooawandela teto ira: “Kodi athu kakari-a nyale kanoikuneela na dengo kapena i-ela vati va bedi? Ndesanga kanoi-ela vamalo o-elavo nyale? 22 Chifukwa kavali yongo yobiseya ineyo kinaze iululeya, moi kavali yongo ineyo inasungiwa mwaisisi vinjinji ineyo kinaza iululeya. 23 Muthu unoyo un’na mabaru, avwe.”

24 Liye oopitiliza awandela ira: “Vuruwanani mosamala vyevyo ndinaonga miyo. Mulingo unoyo munalingelana nyo athu amo-iwa, naaluwene teto kanaza kaulingelani unoyo.* Kanoza kauenjedeleni vyongo vyoinjiva. 25 Chifukwa muthu unoyo un’na vyongo unoza ava-iwe vyoinjiva, koma muthu unoyo kan’na yongo, unoza awakiwe ngakale vyevyo un’na liye.”

26 Liye oopitiliza onga ira: “Umwene wa Mulungu uli ngati mwemo muthu unafesela liye mbewu vatheya. 27 Muthuyo unogona ma-iyu moi unde wacha unovenya. Mbewudo dinomela noulukula, koma mwemo vyevi vinaireelaathu, mwinyailoyo kanaiziwa. 28 Vang’ono na vang’ono, mbewu dile dinoulukula nobala vipaso. Yowambeela tirigu unoulukula, vanduli viwa unokumi-a njere, vogomi-eda viwa tirigu owaraala unooneela. 29 Koma mbewudo dawaraala, liye unodimweta na ikwakwa chifukwa thawi yo-anda ikwakwana.”

30 Liye oopitiliza awandela ira: “Kodi Umwene wa Mulungu niufwanafwani-ede na n’ni, kapena ni-indi-ede chito fanizo liivi vofotokoza vya Umwenola? 31 Uli ngati kongolo ya mpilu,* ineyo vathawi yofesa inakala ing’onong’ono vinjinji kwaranya kongolo detene da vailambo yavati. 32 Koma yazaliwa, inomela noulukula kwaranya mbewu detene daudimba moi inokaana thambi dilukulu, teto mbalame damulengalenga dinomangamo thunji diwa.”

33 Liye ooawandela mawu a Mulungu vo-indi-eda chito mafanizo anjinji ofwanafwana na anala, malinga na vyevyo aluwa kakwakwani-eathu vivwechecha. 34 Thawi detene, liye oowonga na aluwa vo-indi-eda chito mafanizo, koma umbali oowafotokozela ofunjedae vyevyo mafanizwayo kanatapulelaathu.

35 Dambo lelo mazulo, liye ooawandela ofunjedae ira: “Tiyemoni nilambuwele ukombela imo-iwa ya nyanja.” 36 Eno angawandelile gulu la athulo ira lidowenga, ofunjedae koomaruwa limo-i na liye mungalawa, koma vamalovo vookala teto ngalawa dimo-i diwa. 37 Vanduli viwa vanyanjavo voowambeela lipevo lakopolo, teto mafunde koovaza ngalaweyo moi yakede ala vang’ono bwina. 38 Koma Yesu ali agonanga unduli wa ngalaweyo, angasamele pilo. Eno aluwa koomuvenyi-a nomufuka ira: “Mphunzisi, kodi kamunaona ira ninokhwa?” 39 Yesu angavwile vyevi oovenya nosumulula lipevolo koma teto oowandela nyanjeyo ira: “Imela! Garateya!” Angapangile eno lipevolo looimela moi nyanjeyo yoogarateya. 40 Ndiye liye oowafuka ira: “Chifukwa n’ni munaova eni? Kodi kamun’na iroromelo?” 41 Koma aluwa koowova vinjinji moi koowambeela fukana ira: “Kodi muthu unola ngu mbaani kwenikweni? Ngakale lipevo na nyanja vinomuvwela.”