Vyoira Vya Anamarumiwa
20 Ipoloweyo ingamalile, Paulo oowaitani-a ofunjeda. Moi angaalimbikisile nosazikana na aluwa, oomaruwa dowa wu Makedoniya. 2 Liye ooenda m’madela anjinji a wewo nowalimbikisa ofunjeda na mawu anjinji, vanduli viwa oofiya wu Girisi. 3 Angakalile wewo wa medi miralu, ooganiza vyowelela wu Makedoniya, chifukwa yoi Ayuda koofuna mupha. Vyevi vyaireile Paulo anga-alile vang’ono ambeela ulendwae wavanyanja odowa wu Siriya. 4 Va ulendola ali limo-i na Sopaturo mwana wa Puro wawu Bereya, Arisitako na Sekundo awu Tesalonika, Gayo wawu Debe na Timoteyu, koma okumela muigawo ya Asia ali Tukiko na Terofimo. 5 Athu anala koosogola dowa nidedi-anga wu Torowa. 6 Koma nookuma wu Filipi ulendo wavanyanja malambo a Mikate Dookaana Vyofufumi-a kangamalile. Moi noowafwanya wu Torowa vangavirile malambo 5. Nookala wewo wa malambo 7.
7 Va dambo lowambeela la mulungu, ningasonkanile vamo-i ira nidje, Paulo oowambeela akambela khani, chifukwa dambo lo-arela afuna ira amaruwe. Moi oowonga wathawi yolapa mpakana vaari va ma-iyu. 8 Musubi lamudimu lelo nasonkanilemo iyo, mookala nyale dinjinji. 9 Vathawi ineyo Paulo akamba liye khani, zombwe m’mo-iwa zina lae Utiko unoyo agaratile valiwindo, oowambeela gona. Vevo agona liye, oogwa kumela valiwindo la nyumba yanaralu yamudimu, moi athu kangadowile ira kamuone kamufwanyile angakhwile. 10 Koma Paulo ootita vati, moi oofiya vevo vali liye nomukumbarela. Vanduli viwa aongile ira: “Miyalani, chifukwa uli moyo.” 11 Vanduli viwa Paulo oowelela musubi lamudimu lelo ali liye moi oolanda mkate ambeela dja.* Eno oopitiliza kambilana na aluwa wathawi yolapa mpakana unga-alile vang’ono cha, moi vanduli viwa oomaruwa dowanga. 12 Eno aluwa koomulanda zombweyo, moi koosangalala vinjinji chifukwa yoi ali moyo.
13 Sopano iyo noosogola dowa gwela ngalawa ambeela ulendo odowa wu Aso. Koma Paulo aniwandelile ira nisogole moi ninodowa namulande wu Aso chifukwa liye afuna aende wavati. 14 Eno anganifwanyile wu Aso, noomugweli-a ngalawa dowa wu Mitilene. 15 Mamawa wa dambo lo-arela ningakumile wewo, noofiya vakwikwi na Kiyo. Koma dambo lanambili nooimela wu Samo, moi dambo lanaralu noofiya wu Mileto. 16 Paulo kaafunile imela wu Ifeso, chifukwa kaafuna tatila thawae muigawo ya Asia. Apangile vyevi chifukwa oombaraanya ira akala pivyowandeya, va dambo la Ikondwelelo ya Pentekosite akale angali wu Yelusalemu.
17 Koma angali wu Mileto ootumiza uthenga wa andimuwa a pingo wawu Ifeso ira kaze. 18 Andimuwayo kangafiile, liye ooawandela ira: “Nyo munoiziwa pama mwemo ndapangela miyo vyongo vathawi ineyo ndali miyo limo-i na nyo, kumela va dambo lelo ndafiile miyo kumela muigawo ya Asia. 19 Ndootumikela Mbwiye ngati kapolo moviyevi-a vinjinji, moi ndoomori-a misodi chifukwa ya vyongo vyotakala vyevyo Ayuda kandipangelaathu. 20 Koma kandiubiseleni vyongo vyevyo vili vyofuneya vinjinji moi kandi-iile ufunji-ani vagulu koma teto unyumba na nyumba. 21 Koma ndipangela umboni mokwakwanela wa Ayuda na wa Agiriki, ira kalape nowelela wa Mulungu koma teto ira kaambeele muroromela Mbwii-u Yesu. 22 Moi sopano, mosogoleliwa na zimu owela, ndinadowa wu Yelusalemu ngakale ira kandinaiziwa vyevyo vinafuna dowa ndiireela wewo. 23 Koma yongo ineyo ndinaiziwa miyo choi mu mzinda na mzinda, zimu owela undipangela umboni moweli-edaweli-eda ira ndinomangiwa koma teto ndinozuzumi-iwa. 24 Komave, moywanga kandinauona kala ofuneya* vinjinji wa miyo. Ineyo ndinafuna miyo choi ndimari-e tamanga va mpikisanola, koma teto ira ndimari-e utumiki unoyo ndawachelile miyo wa Mbwiye Yesu. Ndinafuna ndipangele umboni mokwakwanela vya uthenga wapama oonga vyooma murima ulukulu wa Mulungu.
25 Sopano kavuruwanani. Kavali uliwetene wa nyo unoyo ndamulaleele miyo vya Umwene wa Mulungu, unoyo unaze aone kovanga nawili. 26 Eno mukale mboni peeno, ira miyo kandin’na mulandu wa magazi a athu etene 27 chifukwa ndoouwandelani malangizo etene a Mulungu.* 28 Muviing’anelenga ekinyu koma teto samalela gulu letene la khosa, lelo zimu owela wauva-ileniathu ira muliing’anelenga, ira muwete pingo wa Mulungu, unoyo augulile liye na Magazi a Mwanae. 29 Ndinoiziwa ira miyo ndadowa, athu okala ngati mimbulu dauwali kanoza kafiye vaari vinyu moi katinaza kasamalela gulu la khosali mwachikondi. 30 Moi vaari vinyu athu amo-iwa kanoza kaambeele onga vyongo vyonama na yolinga yoi ka-oloche ofunjeda ira kaambeele a-arela.
31 Eno kalani maso, moi muumbuwelenga ira wachaka taaru tana na ma-iyu, kanda-iile chenjeza uliwetene wa nyo ndimori-anga misodi. 32 Koma sopano ndinau-iyani m’mandani mwa Mulungu ira autetezengani koma teto ndinou-iyedani mawu oonga vyooma murima wae ulukulu. Mawu anayo kanokoza ulimbikisani nouva-ani cholowa vaari va owela etene. 33 Kandisililile siliva, golide kapena yowara ya muthu. 34 Nyo munoiziwa ira ndoo-inda chito na mandangala ira ndifwanye vyofuneya vamoywanga koma teto vya athu anayo kali limo-i na miyo. 35 Va vyongo vyetene ndiutonyi-edani ira mwa-indanga chito mwatindi, mukami-enga ofooka moi muumbuwelenga mawu a Mbwiye Yesu. Vale liye aongile ira, ‘Va-a unonipangi-a ira nikalenga osangalala vinjinji kwaranya wachela.’”
36 Angaongile vyevi, liye limo-i na andimuwa etene kookokora nopempela. 37 Vanduli viwa etene kooula vinjinji. Eno koomukumbarela* Paulo nomukisa mwachikondi. 38 Aluwa kookaana chisoni vinjinji, chifukwa ya mawu anayo aongile liye oyi katinaza kaona nawili kovae. Vanduli viwa koomuveleela dowa gwela ngalawa.