Vyoira Vya Anamarumiwa
4 Vevo Petulo na Yohani kaongaathu na athwayo, asembe limo-i na oing’anela kachisi koma teto Asaduki koofiya. 2 Aluwa koolunduwa chifukwa yoi anamarumiwayo koofunji-a athu koma teto koolaleela vowela vyoi Yesu oovenyi-iwa. 3 Eno aluwa koowa-inda nowamanga moi koowa-eela mundende mpakana dambo lo-arela, chifukwa yoi unde wali ungadimbile wale. 4 Koma athu anjinji anayo kavuruwanile mawayo koororomela, moi alombwana anayo kali vevo kali otamangela 5 000.
5 Dambo lo-arela, olamulela na andimuwa koma teto alembi koosonkana wu Yelusalemu. 6 Vookala teto Anasi wasembe mulukulu, Kayafa, Yohani, Alekizanda koma teto abalae etene a wasembe mulukuluyo. 7 Ndiye aluwa koomuimecha Petulo na Yohani vaari viwa moi koowambeela afuka ira: “Kodi mupangile vyevi na kopolo da mbaani, kapena mupangile vyevi muzina la mbaani?” 8 Petulo angazaaliwe na zimu owela, oowasomeda ira:
“Nyo olamulela koma teto andimuwa, 9 akala peeno ninafukiwa va vyongo vyapama vyevyo nimupangele iyo muthu orangalola moi munofuna iziwa ira umuchili-ile mbaani, 10 etene nyen’ne limo-i na Aisaraeli etene, iziwani ira muthula uchili-iwa muzina la Yesu Kristu wawu Nazareti, unoyo mwamuphile nyo vomupachika vatengo, koma Mulungu oomuvenyi-a. 11 Yesu unola ti ‘libwe lelo nyo omanga nyumba mwalionile nyo ira kalin’na chito, koma vano likala libwe lofuneya vinjinji lavakona.’ 12 Koma teto kavali uliwetene vailambo yavati unoyo unanivulumuche, chifukwa kavali zina limo-iliwa vailambo yavati lelo lipelekiwe wa athu, lelo linanivulumuche.”
13 Aluwa kangaonile ira Petulo na Yohani kali athu oofunjeda* koma kanoonga molimba murima, koodabwa vinjinji. Moi koozindikila ira aluwa kooenda na Yesu. 14 Ndiye aluwa koosauwela yoonga, chifukwa yoi muthu unoyo achili-iweyo ali angaimelile vakwikwi na aluwa. 15 Eno koowalamula ira kakumemo Mukhoti Lilukulu la Ayudalo,* moi aluwa koowambeela kambilana 16 ira: “Niapangena avi athwala? Chifukwa onga vyoona, aluwa kopanga izindikilo ilukulu moi athu etene awu Yelusalemu koowona. Teto iyo kaninaruni-e vyevi. 17 Eno ira khanila kipitilize falikela wa athu amo-iwa, tiyemoni niawopopi-e ira ka-iye wandela athu amo-iwa vya zina leli.”
18 Kangapangile eno koowaitana moi koowalamula ira kationge yongo iliyetene kapena funji-a muthu uliwetene muzina la Yesu. 19 Koma Petulo na Yohani koowasomeda ira: “Weluzani ekinyu, akala vili vyofwanelela vamaso va Mulungu uvwelani nyo m’malo momuvwela Mulunguyo. 20 Koma iyo kanina-iya onga vya vyongo vyevyo navionile iyo na vyevyo navwile iyo.” 21 Eno kangaawopopi-ile nawili, koowamasula, voi katafwanyile chifukwa iliyetene yowava-ela ilango. Koma teto aluwa koowova athu, voi athu etene kootamanda Mulungu chifukwa ya vyongo vyevyo vyaireile. 22 Chifukwa muthu unoyo achili-iwe modabwi-oyo an’na chaka dokwaranya 40.
23 Petulo na Yohani kangamasuliwe koodowa wa ofunjeda afwiwa, moi koowafotokozela vyetene vyevyo kawandeliweathu na asembe alukulu na andimuwa. 24 Athu etene kangavwile vyevi, koopempela mokuwa wa Mulungu ira:
“Mbwiye Mulukulu Vinjinji, nyo ngunoyo mwapangile udimu na ilambo yavati, nyanja na vyongo vyetene vyevyo vili mwemo. 25 Vo-indi-eda chito zimwinyu owela, nyo moopangi-a ira mbwii-u Davide mtumikinyu aonge ira, ‘Chifukwa n’ni athu a mitundu dimo-i kanapanga ipolowe koma teto chifukwa n’ni mitundu da athu dinaganizela* vyongo vyookaana chito? 26 Mamwene a ilambo yavati koimela vamalwiwa, moi olamulela kosonkana mogwilizana ira kalimbane na Yehova* koma teto ozoziwae.’* 27 Vyevi vyooireya vevo Herodi, Pontiyo Pilato, athu a mitundu dimo-i koma teto athu a mu Isaraeli, kasonkanileathu mu mzindola nomuukela Yesu, mtumikinyu owela, unoyo mwamuzozile nyo. 28 Aluwa kosonkana ira kapange vyevyo mwaongile nyo wale. Vyevi vyooireya chifukwa yoi nyo mukaana kopolo koma teto chifukwa yoi vyali vyogwilizana na ifunelo inyu. 29 Koma sopano Yehova,* vuruwanani mwemo kananiwopopi-elaathu moi nikami-eni iyo atumikinyu ira nipitilize onga mawinyu molimba murima. 30 Pitilizani chili-a athu na ndanda linyu koma teto pitilizani kami-a ira vyodabwi-a vipitilize ireya muzina la Yesu, mtumikinyu owela.”
31 Kangamari-ile pempela mochondelela, malo anayo kasonkanileathu kootekenyeya. Vanduli viwa athu etene koozaaliwa na zimu owela moi koowambeela onga mawu a Mulungu molimba murima.
32 Koma teto, athu etene anayo karoromele kookaana maganizo ofwanafwana. Kavali muthu uliwetene unoyo aonga ira vyongo vyetene vyevyo an’na liye vyali vya liye ekave. Vyetene vyevyo uliwetene an’na liye, athu amo-iwa teto koovi-indi-eda chito. 33 Koma teto, anamarumiwayo koopitiliza pangela umboni mwakopolo vinjinji vyovenyi-iwa wa Mbwiye Yesu. Moi Mulungu oowatonyi-eda etene anayo oma murima ulukulu. 34 Teto kavali muthu uliwetene unoyo asauwela yongo. Etene anayo kan’na maminda kapena manyumba, koowaguli-a nozana ndalamado. 35 Moi koopeleka ndalamado wa anamarumiwa. Ndiye anamarumiwayo koogawa ndalamado wa muthu uliwetene mogwilizana na vyevyo afuneya liye. 36 Eno Yosefe, unoyo anamarumiwayo kamuva-ileathu zina loi Barnaba, tapulela ira “Mwana Omiyali-a,” unoyo teto ali Mulevi obaliwela wu Kupuro, 37 ookaana munda. Liye ooguli-a mundoyo moi oozana ndalamado za dipeleka wa anamarumiwa.