Vyoira Vya Anamarumiwa
5 Muthu m’mo-iwa zina lae Hananiya, na iyanae Safira, kooguli-a mundiwa. 2 Koma koochosavo ndalama dimo-i moi koodisunga. Ndiye koolanda ndalama do-alado dowa dipeleka wa anamarumiwa. 3 Koma Petulo oomufuka ira: “Hananiya, chifukwa n’ni ulolile ira Satana aupusi-e ira unami-e zimu owela we sunga ndalama dimo-i da mundoyo? 4 Kodi mundoyo kawali wawo waanauguli-e? Moi ungauguli-ile, kodi ndalamado kawawande pangana iliyetene ineyo wafunawe? Ndiye chifukwa n’ni waganizile ira upange vyongo vyevi? Veva kuwanami-ile athu, koma umunami-ile Mulungu.” 5 Hananiya angavwile mawu anala oogwa vati moi ookhwa. Athu etene anayo kavwile vyevi koowova vinjinji. 6 Ndiye azombwe kooza mupota na nguwo moi koodowa mu-ela m’manda.
7 Vangavirile maola maralu iyanae oovolowa moi kaaiziwa vyevyo vyaireile. 8 Ndiye Petulo oomufuka ira: “Kandiwandele, kodi ndalama detene dedo mufwanyile nyo mungaguli-ile mundinyu tidedi?” Liye oosomeda ira: “Ee, tidedi.” 9 Ndiye Petulo oomufuka ira: “Chifukwa n’ni mwagwilizanile ira munami-e zimu wa Yehova?* Kaona, athu anayo kamutukulile mamunawo dowa mu-ela m’manda kali vamulango. Moi nawen’ne teto kanoutukula ukumana vande.” 10 Thawi ineyo Safira oogwa vati vakwikwi na manyalo a Petulo moi ookhwa. Vevo azombwale kavolowaathu kamufwanyile angakhwile wale. Eno koomutukula mukumana vande moi koodowa mu-ela m’manda vakwikwi na mamunae. 11 Vanduli viwa pingo wetene koma teto athu etene anayo kavwile vyevi koowova vinjinji.
12 Anamarumiwayo koopitiliza panga vizindikilo koma teto vyodabwi-a vinjinji vaari va athu. Moi ofunjeda etene koosonkana va Likhonde la Solomo. 13 Pivyoona ira kavali muthu uliwetene unoyo alimbile murima kala va mgwilizano na ofunjedayo, komave athu koowonga vyapama vyokuza aluwa. 14 Koma teto athu anayo kamuroromela Mbwiye koopitiliza enjedeleya, moi alombwana na a-iyana anjinji kookala ofunjeda. 15 Athwayo koowazana athu obulela m’misewu nowagonati-a vamabedi ang’onong’ono koma teto va-uli ira Petulo aviranga, fulae ufiye vevo vali athu obulelayo. 16 Koma teto athu anjinji anayo kakala vakwikwi na mzinda wa Yelusalemu koodowa wewo limo-i na athu obulela koma teto limo-i na athu anayo kazuzumi-iwa na mizimu dotakala. Moi athu etene anayo koochili-iwa.
17 Koma ndimuwa wa asembe limo-i na athu etene, anayo kali mugulu la mpatuko la Asaduki, koowambeela apangela sanje. 18 Eno aluwa koowamanga anamarumiwayo nowa-eela mundende. 19 Koma vaari va ma-iyu, ngelo wa Yehova* oo-ula visewo vya ndendeyo nowakumi-a, moi ooawandela ira: 20 “Dowani mukachisi mwapitilize wandela athu vyokuza moyo oomala unoyo unaza usogolo.” 21 Aluwa kangavwile vyevi, koovolowa mukachisi mamawa vinjinji moi koowambeela funji-a.
Koma ndimuwa wa asembe limo-i na athu etene anayo kali limo-i na liye koosonkani-a Khoti Lilukulu la Ayuda koma teto andimuwa etene a Isaraeli. Vanduli viwa kooruma alonda undende ule ira kadowe kaalande anamarumiwa kaazena. 22 Koma alondayo kangafiile undende ule, kataafwanyilemo anamarumiwayo. Eno koowela dowa onga vyevi. 23 Aluwa kaongile ira: “Nifwanyile mundende mwangali mofunga mwene, moi alonda kali vamulango vevo. Koma ninga-ulile kanifwanyilemo muthu uliwetene.” 24 Oing’anela kachisi koma teto asembe alukulu kangavwile vyevi, koomaliwa zelu moi kataiziwa ira vyevi vinamala avi. 25 Koma voofiya muthu m’mo-iwa moi ooawandela ira: “Athu anayo mwaa-elile nyo mundendale kali mukachisi, moi kanaafunji-a athu.” 26 Ndiye oing’anela kachisiyo oomaruwa limo-i na alondae dowa alanda. Koma kataalandile mwakopolo, chifukwa kaova vochiwa mabwe na athu.
27 Eno koowazana Mukhoti Lilukulu la Ayuda. Moi ndimuwa wa asembe aongile ira: 28 “Nooulamulani mwakopolo ira kamuze mufunji-e nawili muzina leli. Koma muzaali-a mu Yelusalemu mwetene makundo anayo munafunji-a nyo moi munafuna ira iyo nikale na mulandu wa magazi a muthu unola.” 29 Petulo na anamarumiwa amo-iwayo koosomeda ira: “Iyo ninafuneya vwela Mulungu monga olamulela, o-okala athu. 30 Mulungu wa makolwi-u oomuvenyi-a Yesu, unoyo mwamuphile nyo vomupachika vatengo. 31 Moi Mulungu oomu-ela undanda lae lodjana monga Namarumiwa Mulukulu koma teto Mpulumusi. Oopanga vyevi ira Aisaraeli kalape koma teto ira machimwiwa kakululukiwe. 32 Moi iyo nili mboni va vyongo vyevi, teto zimu owela, unoyo Mulungu upelekile liye wa athu anayo kanamuvwela monga olamulela unopangela umboni.”
33 Aluwa kangavwile vyevi, koolunduwa vinjinji moi koofuna apha. 34 Koma Mfarisi m’mo-iwa zina lae Gamaliyeli ooimela vaari va Khoti Lilukulu la Ayuda. Liye ali mphunzisi wa Ilamulo olemekeziwa na athu etene. Ndiye oolamula ira anamarumiwayo kakumi-iwe wathawi yoyeva. 35 Vanduli viwa ooawandela ira: “Nyo Aisaraeli, musamale na vyevyo munafuna nyo apangela athwala. 36 Chifukwa m’malambo amundulimu, mookala muthu m’mo-iwa unoyo aromoliwa ira Teuda unoyo avichuki-ile vinjinji moi athu otamangela 400 koovolowa mugulu lae. Koma oophiwa, moi athu etene anayo kamu-arela koobalaleya. 37 Vanduli viwa ooza Yudasi wawu Galileya m’malambo a kalembela. Athu anjinji kookopeya na liye moi koomu-arela. Koma naliyene teto ookhwa, moi athu etene anayo kamu-arela koobalaleya. 38 Eno chifukwa ya mwemo vyongo vililiathu veva, ndinauwandelani ira a-iyeni athwala kamuwalimbanena. Chifukwa akala vyolinga viwa kapena chito inela inakumela wa athu, kinadowa vasogolo. 39 Koma akala inakumela wa Mulungu, kamunawande aruni-a. Moi akala munapitilize panga vyevi munakala ira munalimbana na Mulungu.” 40 Aluwa koovwela malangizwayo teto koowaitani-a anamarumiwayo. Ndiye kakede avaza moi koowalamula ira ka-iye onga vya zina la Yesu, vanduli viwa koowamasula.
41 Vingairile eno anamarumiwayo koovenyamo Mukhoti Lilukulu la Ayuda. Aluwa kali osangalala chifukwa Mulungu oowaona ira kali ofwanelela pangeliwa vyaibewe chifukwa ya zina la Yesu. 42 Moi dambo lililetene aluwa koopitiliza funji-a mwatindi mukachisi, unyumba na nyumba koma teto koopitiliza lengeza uthenga wapama oonga vya Kristu Yesu.