Vyoira Vya Anamarumiwa
11 Sopano anamarumiwa na abali amo-iwa awu Yudeya koovwa ira athu a mitundu dimo-i koowachela mawu a Mulungu. 2 Koma Petulo angadowile wu Yelusalemu, athu anayo kalimbikisa mdulidwe koowambeela muimba mulandu. 3 Aluwa kaonga ira: “Weyo oovolowa m’mba mwa athu o-oduliwa moi oodja limo-i na aluwa.” 4 Ndiye Petulo oowambeela afotokozela mwasatanesatane vyevyo vyaireile moi aongile ira:
5 “Ndipempelanga mu mzinda wa Yopa, ndoowona masomphenya. Ndoowona yongo yooneya ngati nguwo ilukulu ititanga kumela udimu. Yongweyo yoo-idediwa m’makona etene 4 moi yali ititi-eliwanga vevo ndali miyo. 6 Ndingaing’anechechile yongweyo, ndoowonavo vinyama vya mendo 4 vyavailambo yavati, vinyama vyaukokolani, vinyama vyowambaza koma teto mbalame damulengalenga. 7 Ndoovwa teto mawu oyi: ‘Petulo, maruwa uphe vyongo vyevi udje.’ 8 Koma miyo ndaongile ira, ‘Naari Mbwiyeni, miyo kandinadjevo yongo iliyetene yotakali-iwa koma teto yonyakavala.’ 9 Koma ndoovwa mawale ulendo wanambili ira: ‘Vyongo vyevyo Mulungu uvipangi-ile liye kala vyowela, u-iye onga ira pivyotakali-iwa.’ 10 Ndoovwa teto mawale ulendo wanaralu, moi vanduli viwa vyongo vile vyoolandiwa dowa udimu. 11 Thawi ineyo, athu aralu anayo karumiwe za wa miyo kumela wu Kaisareya kali kangaimelile vande vevo nakala iyo. 12 Vanduli viwa zimu owela oondiwandela ira ndidowe limo-i na aluwa, moi kandikaikele ngakale vang’ono. Abali 6 ala koodowa limo-i na miyo moi noodowa volowa m’mba mwa muthuyo.
13 Liye ooniwandela ira angali m’mba mwae oomuona ngelo angaimelile moi ngeloyo oomuwandela ira, ‘Tumiza athu wu Yopa ira kadowe kamuitane muthu m’mo-iwa zina lae Simoni oromoliwa teto ira Petulo. 14 Liye unoza auwandele vyongo vyevyo vinaukami-e weyo koma teto athu etene a m’banja lawo ira muvulumuwe.’ 15 Koma ndangaambeele onga, aluwa koowachela zimu owela ngati mwemo nawachelele iyo vowambeela vale. 16 Vingairile eno ndooumbuwela mawu anayo Mbwiye aomeliwa liye onga oyi, ‘Yohani oobatiza athu na ma-inje, koma nyo munoza mubatiziwe na zimu owela.’ 17 Eno akala Mulungu aava-ile mphaso yaulele ineyo teto aniva-ile liye iyo anayo ninaroromela mwa Mbwiye Yesu Kristu, miyo ndili mbaani ira ndimuruni-e Mulungu?”
18 Kangavwide vyevi, koo-iya muruni-a,* moi kootamanda Mulungu voonga ira: “Akala chi eno ndiye kuti Mulungu upeleka mwai wa athu a mitundu dimo-i ira naaluwene teto kalape ira kaze kafwanye moyo oomala.”
19 Athu anayo kabalaleile chifukwa ya mavuto anayo kazide chifukwa ya vyevyo vyamuireele Sitefano, koofiya mpakana wu Foinike, wu Kupuro na wu Antiokeya. Moi kakeda laleela wa Ayuda oka. 20 Koma amo-iwa mwa athwayo kali awu Kupuro na wu Kurene. Aluwa kangafiile wu Antiokeya koowambeela laleela uthenga wapama wa Mbwiye Yesu wa athu oonga Igiriki. 21 Ndanda la Yehova* loowakami-a moi athu anjinji koororomela koma teto koowambeela mu-arela Mbwiye.
22 Pingo wawu Yelusalemu oovwa vya athwala moi oomutumiza Barnaba ira adowe wu Antiokeya. 23 Barnaba angafiile wewo koma teto angaonile oma murima ulukulu wa Mulungu, oosangalala moi oowambeela alimbikisa athu etene ira kapitilize na murimiwa wetene kala ororomeleya wa Mbwiye. 24 Barnaba ali muthu wapama koma teto wa iroromelo yolimba. Liye oosogoleliwa vinjinji na zimu owela moi athu amo-iwa anjinji koororomela Mbwiye. 25 Vanduli viwa Barnaba oodowa wu Tariso dowa musaela Saulo. 26 Angamufwanyile oomuzana wu Antiokeya. Aluwa koosonkana na pingo wa wewo wachaka yathutha moi koofunji-a athu anjinji. Wu Antiokeya ku wewo ofunjedayo kaambeeleathu romoliwa ira Akristu, mosogoleliwa na Mulungu.
27 Vathawi inela, anamaongela okumela wu Yelusalemu koodowa wu Antiokeya. 28 Mokami-iwa na zimu wa Mulungu, m’mo-i wa aluwa zina lae Agabo, oolosela ira vailambo yetene vanoza vakale ndala ilukulu. Vyevi vyooireya muthawi ya Kalaudiyo. 29 Eno ofunjedayo koosimikiza murima ira katumize likami-edo wa abali awu Yudeya, muthu uliwetene mogwilizana na vyevyo akwakwani-e liye. 30 Aluwa koopanga vyevyo moi likami-edolo koomuva-edela Barnaba na Saulo ira kadowe kapeleke wa andimuwa.