Vyoira Vya Anamarumiwa
15 Ndiye alombwana amo-iwa okumela wu Yudeya koowambeela afunji-a abali ira: “Akala kamunaduliwa mogwilizana na Ilamulo ya Mose, kamunaza muvulumuwa.” 2 Koma Paulo na Barnaba katagwilizanile na vyevyo moi koowaruni-a. Eno abalayo koomusakula Paulo, na Barnaba koma teto athu amo-iwa, ira kadowe wa anamarumiwa na andimuwa wu Yelusalemu dowa awandela vya khanila.
3 Abali a mupingo kangaaveleele, athu anala koopitiliza ulendwiwa vovirela wu Foinike na wu Samariya. Wewo aluwa koowafotokozela pama vyoi athu a mitundu dimo-i koowambeela lambela Mulungu, moi abali etene koosangalala vinjinji na vyevi. 4 Kangafiile wu Yelusalemu koowacheliwa pama na abali a mupingo, anamarumiwa koma teto andimuwa. Moi koowafotokozela vyongo vinjinji vyevyo Mulungu apangile liye zela mwa aluwa. 5 Koma ororomela amo-iwa, anayo wale kali mugulu la mpatuko la Afarisi, kooimela m’mipando diwa noonga ira: “Athu anala kanafuneya duliwa koma teto alamula ira ka-arelenga Ilamulo ya Mose.”
6 Eno anamarumiwa koma teto andimuwa koosonkana ira kakambilane vya khanila. 7 Kangaruni-anile vinjinji vya khanila, Petulo ooimela moi ooawandela ira: “Abalanga, nyo munoiziwa pama ira malambo owambeela Mulungu oondisakula miyo vaari vinyu, ira zela mwa miyo, athu a mitundu dimo-i kavwe mawu a uthenga wapama nowaroromela. 8 Moi Mulungu unoyo unaiziwa vya m’murimani, oopangela umboni vowava-a zimu owela ngati mwemo apangele liye na iyo. 9 Liye kaa-iyani-ile ngakale vang’ono vaari va iyo na aluwa, koma oopangi-a ira mirima diwa dikale dowela chifukwa ya iroromelo iwa. 10 Ndiye chifukwa n’ni munamuesa Mulungu vowatukuli-a ofunjeda katundu onyemela unoyo makolwi-u ngakale teto iyo kanawandile mutukula? 11 Koma iyo ninororomela ira ninoza nivulumuwe chifukwa yooma murima wa Mbwiye Yesu, mofwanafwana teto na athu anala.”
12 Vingairile eno gulu la athulo loomiyala, moi loowambeela vuruwana vevo Barnaba na Paulo kafotokozaathu vizindikilo na vyodabwi-a vinjinji vyevyo Mulungu apangile liye vaari va athu a mitundu dimo-i zela mwa aluwa. 13 Kangamari-ile onga, Yakobo oosomeda ira: “Abalanga, ndivuruwaneni. 14 Sumiyoni ufotokoza pama mwemo Mulungu asomedele liye athu a mitundu dimo-i wathawi yowambeela, ira vaari viwa alandevo athu oiziweya na zina lae. 15 Moi vyevi vinogwilizana na vyevyo anamaongela kalembileathu ira: 16 ‘Vyevi vyaza vimala, ndinoza ndize moi ndinoza ndimange nawili nyumba* ya Davide ineyo yagwile. Ndinoza ndimange nawili malo ogumuwa a nyumbeyo moi ndinoza ndiisakaede. 17 Ndinoza ndipange vyevi ira athu o-alayo kamusaele Yehova* na murimiwa wetene. Kamusaele limo-i na athu a mitundu detene, anayo kanaromoliwa na zina langa, uongile eno Yehova* unoyo unapanga vyongo vyevi, 18 vyevyo aongile liye wale vinjinji ira unoza avipange.’ 19 Eno maganizwanga* mboi, kaniavuti-e athu a mitundu dimo-i anayo kaambeele lambela Mulungu. 20 Koma tiyemoni nialembele ira kapewe vyongo vyopelekiwa sembe wa mafano, iwerewere,* nyama do-osiga* na magazi. 21 Chifukwa ambeela wale, athu kookala kalaleelanga m’mizinda detene mawu okumela m’mabuku a Mose, voi mabuku anala kanowelengiwa mogweli-a mawu m’masunagoge va dambo la sabata lililetene.”
22 Vanduli viwa anamarumiwa na andimuwa limo-i na pingo wetene, koogwilizana ira kasakule alombwana vaari viwa, ira kaatumize wu Antiokeya limo-i na Paulo na Barnaba. Eno koomusakula Yudasi oromoliwa Barasaba na Sila, anayo kaasogolela abali. 23 Ndiye koolemba kalata nowava-eda moi mu kalatamo kalembilemo ira:
“Iyo abalinyu anamarumiwa, vamo-i na andimuwa ninoulembelani nyo abali okumela m’mitundu dimo-idiwa, anayo muli wu Antiokeya, wu Siriya na wu Kilikiya: Wachelani moni! 24 Nivwa ira abali amo-iwa okumela vaari vi-u kookala kauvuti-angani voonga vyongo vyousokonezani, ngakale ira iyo kaniava-ile malangizo alietene. 25 Eno etene nigwilizana vyoi niasakule alombwana ira niatumize vamo-i na abali anayo ninaaomeliwana iyo, Barnaba na Paulo. 26 Athu anala koo-ela moywiwa vangozi chifukwa ya zina la Mbwiye Yesu Kristu. 27 Eno ninomutumiza Yudasi na Sila, ira naaluwene teto kaze kaufotokozeleni vyongo vyevi vamaso na vamaso. 28 Chifukwa zimu owela koma teto iyo niona ira chipama ira kaniutukuli-eni katundu onyemela, patulavo vyongo vyofuneya vyoka, vyevyo vili 29 pitiliza pewa vyongo vyopelekiwa sembe wa mafano, magazi, nyama do-osiga* na iwerewere.* Mwapewanga vyongo vyevi mosamala vinjinji, vyongo vinoza viuendeleni pama. Ninoufunelani vyapama vyetene!”*
30 Alombwana anala koomaruwa dowa wu Antiokeya. Wewo koosonkani-a gulu letene la athu moi koowava-a kalateyo. 31 Kangawelengile kalateyo, koosangalala vinjinji chifukwa ya mawu olimbikisayo. 32 Voi Yudasi na Sila kali anamaongela, koowakambela abalayo khani dinjinji moi koowalimbikisa. 33 Kangakalile wewo wa malambo oyeva, abalayo koowaveleela moi Yudasi na Sila koowelela mwamurendele wa anayo kaarumile. 34* —— 35 Koma Paulo na Barnaba koo-ala wu Antiokeya. Aluwa limo-i na athu amo-iwa anjinji koofunji-a koma teto lengeza uthenga wa mawu a Yehova.*
36 Vangavirile malambo oyeva, Paulo oomuwandela Barnaba ira: “Tiyemoni niwelele wu mizinda detene wewo nalaleela iyo mawu a Yehova* ira nidowe naawaledele abali koma teto nidowe naawone ira kali avi.” 37 Barnaba oofunechecha ira amulande Yohani, unoyo aromoliwa teto ira Maliko. 38 Koma Paulo aona ira kai paama mulanda chifukwa va ulendo umo-iwa Yohani oowa-iya wu Pamfuliya moi kaafunile dowa limo-i na aluwa dowa inda chito yolaleela. 39 Vingairile eno Paulo na Barnaba kookangana vinjinji mpakana koo-iyana. Barnaba oomulanda Maliko moi kooenda ulendo wavanyanja dowa wu Kupuro. 40 Koma Paulo oomusakula Sila, moi abali kangamupempelele Pauloyo ira Yehova* amutonyi-ede oma murima ulukulu, oomaruwa. 41 Liye avirele wu Siriya na wu Kilikiya moi oolimbikisa mipingo.