Olembiwa na Luka

1 Athu anjinji kooesaesa lemba khani yofotokoza vyongo vyevyo vyaireile vyevyo etene iyene ninaviroromela iyo.* 2 Aluwa koolemba ndendende vyongo vyevyo nawandeliwe iyo na athu anayo kali mboni doona na maso ambeela vowambeela, koma teto athu anayo kali atumiki a uthengoyo. 3 Namiyene teto, voi ndisaela vyongo vyetene mosamala vinjinji kumela vowambeela, ndisimikiza ira ndiulembeleni mwasatanesatane, nyo olemekezeya vinjinji, a Teofilo. 4 Ndipangile vyevi ira muiziwe pamapama ira vyongo vyevyo kaufunji-ileniathu pivyororomeleya.

5 M’malambo a Herodi,* mwene wa Yudeya, vookala wasembe m’mo-iwa zina lae Zekariya wa gulu la asembe la Abiya. Iyanae ali okumela m’banja la Aroni moi zina lae ali Elizabeti. 6 Etene ambin’li kali olungama vamaso va Mulungu chifukwa yoi kooenda mororomeleya, mogwilizana na malamulo etene koma teto vyevyo Ilamulo ya Yehova* inafunaathu. 7 Koma aluwa katan’na mwana chifukwa yoi Elizabeti ali o-obala teto etene ambin’li kali okalamba.

8 Sopano vathawi ineyo Zekariya a-inda liye chito monga wasembe vamaso va Mulungu, voimelela gulu lae letene la asembe, 9 mogwilizana na vyevyo asembe kapangaathu thawi detene,* yali thawi yoi avolowe mu nyumba yopatuleya ya Yehova,* ira adowe apeleke sembe. 10 Vathawi yopeleka sembeyo, gulu letene la athu lapempela vande. 11 Ngelo wa Yehova* ooza wa liye, moi ooimela umbali ya ndanda lodjana la guwa la sembe. 12 Koma Zekariya angamuonile ngeloyo, oovuteya m’murimani mwae moi oowova vinjinji. 13 Ndiye ngeloyo oomuwandela ira: “Kuove Zekariya chifukwa Mulungu uvwa pempelo lawo lochondelela. Iyanawo Elizabeti unoza abale mwana walombwana moi uze umuva-e zina loi Yohani. 14 Unoza usangalale vinjinji moi athu anjinji kanoza kasangalale nobaliwa wa mwanoyo 15 chifukwa unoza akale mulukulu vamaso va Yehova.* Koma kaze ang’we vinyu ngakale vang’ono kapena yong’wa iliyetene yolezeli-a teto unoza azaaliwe na zimu owela aanabaliwe.* 16 Liye unoza akami-e Aisaraeli anjinji ira kalape nowambeela nawili muvwela Yehova* Mulungwiwa. 17 Koma teto unoza asogole monga osakaeda ndila wa Mulungu angali na zimu na kopolo ngati da Eliya. Liye unoza atembenuze mirima da ababa ira dikale ngati da a-ima koma teto athu o-ovwela unoza aatembenuzele wu zelu ya athu olungama. Unoza apange vyevi ira asonkani-e athu anayo kakozeile tumikela Yehova.”*

18 Ndiye Zekariya oomufuka ngeloyo ira: “Kodi ndinasimikize avi ira vyevi vinoza viireye? Miyo ndili okalamba teto naliyene iyananga ukaana chaka dinjinji.” 19 Ngeloyo oomusomeda ira: “Miyo ndili Gabulieli unoyo ndinakala vakwikwi na Mulungu moi liye undiruma ira ndize ndionge na weyo koma teto ira ndize ndilengeze uthenga wapamola wa weyo. 20 Ndiye kavuruwana! Unoza ukale o-oonga, mpakana dambo lelo vyongo vyevi vinazeathu viireye chifukwa yoi kuroromele mawanga anayo kanaze kakwakwaneli-ediwe vathawiwa ineyo ya-eliwe wale.” 21 Vathawi inela athu kali kamudedi-anga Zekariya moi koodabwa chifukwa yoi oodimbeliwamo vinjinji munyumba yopatuleya. 22 Angakumile kaakwakwani-ile onga na athwayo moi aluwa koozindikila ira uona vyongo vyodabwi-a* munyumba yopatuleyeyo. Liye aonga na athwayo vo-indi-eda chito manda, chifukwa kaakwakwani-a kumi-a mawu. 23 Malambwae opanga utumiki opatuleya* kangamalile, liye oodowa waniwa.

24 Vangavirile malambo oyeva, iyanae Elizabeti ookala oembekezela moi ookala waekave wa medi 5. Ndiye Elizabetiyo aongile ira: 25 “Yehova* undipangela vyongo vyevi malambo anala. Liye undiumbuwela ira achose nyozeya wanga vamaso va athu.”

26 Elizabeti angali oembekezela wa medi 6, Mulungu oomutumiza ngelo Gabulieli mu mzinda umo-iwa wawu Galileya, oromoliwa ira Nazareti. 27 Oomutumiza wa namwali unoyo lombwana m’mo-iwa zina lae Yosefe, wa m’banja la Davide, amulonjezile* liye ira unoza amutele. Namwali unola zina lae ali Mariya. 28 Ngelole angafiile wa Mariya aongile ira: “Ucheliwe avi, we odalisiwa vinjinji we, Yehova* uli na weyo.” 29 Koma mawu anala koomudabwi-a vinjinji moi oowambeela ganizela vya moni wa tundu unola. 30 Eno ngeloyo oomuwandela ira: “Kuove Mariya, chifukwa Mulungu uuomela murima. 31 Sopano kavuruwana! Unoza ukale oembekezela teto unoza ubale mwana walombwana moi uze umuva-e zina loi Yesu. 32 Unola unoza akale mulukulu moi unoza aromoliwe Mwana wa Wamudimu Vinjinji. Yehova* Mulungu unoza amuva-e pando wa umwene wa Davide babae. 33 Liye unoza alamulele monga Mwene va nyumba ya Yakobo mpakana walewale moi Umwenae kunaza umala.”

34 Koma Mariya oomufuka ngeloyo ira: “Vyevi vinaza viwandeya avi, chifukwa miyo kandinagonevo na lombwana.” 35 Ngeloyo oomusomeda Mariya ira: “Zimu owela unoza ufiye va weyo moi kopolo ya Wamudimu Vinjinji inoza iupimbe. Vachifukwa inela mwana unoyo unaze abaliweyo unoza aromoliwe owela, Mwana wa Mulungu. 36 Teto balawo Elizabeti, unoyo athu kamuongaathu ira iyana o-obala, naliyene teto ngoembekezela moi unoza abale mwana walombwana angali okalambene, moi ula ngu mwedae wa 6. 37 Vyevi viireya chifukwa vyevyo Mulungu uongile liye kavinalepeleya.”* 38 Ndiye Mariya aongile ira: “Ndili kapolo wa Yehova!* Vyevyo muongile nyo viireye ndithu wa miyo.” Angapangile eno ngeloyo oodowa.

39 Eno m’malambo anayo, Mariya oomaruwa mombaraanya vinjinji dowa udela la umimwango, mu mzinda umo-iwa muilambo ya fuko la Yuda. 40 Wewo liye oovolowa m’mba mwa Zekariya nopeleka moni wa Elizabeti. 41 Ndiye Elizabeti angavwile moni wa Mariya, mwana unoyo ali m’mbani mwaeyo oolupa moi Elizabetiyo oozaaliwa na zimu owela. 42 Eno ookuwa mwakopolo ira: “Uli odalisiwa mwa a-iyana etene moi mwana unoyo uli m’mbani mwawo naliyene teto ngodalisiwa! 43 Koma viwandeile avi ira ndikaena mwai unola, ira m’mae wa Mbwiyanga aze wa miyo? 44 Ndangavwile mawu a monawo, mwana unoyo uli m’mbani mwangamu, ulupa mosangalala. 45 Moi weyo uli osangalala chifukwa yoi oororomela, moi vyetene vyevyo wawandeliwe we vyokumela wa Yehova* vinoza vikwakwaneli-ediwe.”

46 Ndiye Mariya aongile ira: “Moywanga unolemekeza Yehova,* 47 moi murimanga unosangalala mwa Mulungu, Mpulumusanga, 48 chifukwa uona makalelo oviyevi-a mwa kapolwae wa-iyana. Moi kaonani! ambeela vano dowa usogolo mibado detene dinoza dindiromole ira ndili osangalala. 49 Chifukwa Mulungu wakopolo detene undipangela vyongo vilukulu moi zina lae ti lowela. 50 Umibadomibado liye unopangela chifundo athu anayo kanamuova. 51 Liye upanga vyakopolo na ndanda lae, moi ubalalechela undendai athu a mirima dovikuza. 52 Utiti-a athu akopolo vamipando da umwene teto uwagweli-a athu onyozeya. 53 Athu andala uwarumbali-a na vyongo vyapama koma anayo kan’na chuma uwatamangi-a o-okaana yongo. 54 Liye umukami-a mtumikae Isaraeli voumbuwela lonjezo lae loi unoza atonyi-ede chifundo mpakana walewale, 55 mogwilizana na vyevyo awandelile liye makolwi-u awale, Aburahamu na a-imae.”* 56 Mariya ookalave na Elizabeti wa medi dotamangela miralu vanduli viwa oowelela waniwa.

57 Sopano thawi yoi Elizabeti abale yookwakwana moi oobala mwana walombwana. 58 Athu owandamanana koma teto abalae koovwa ira Yehova* umupangela chifundo ilukulu moi koosangalala limo-i na liye. 59 Va dambo la 8, aluwa kooza za panga mdulidwe wa mwanoyo koma teto kafuna kamuva-e zina la babae, loi Zekariya. 60 Koma m’mae wa mwanoyo oosomeda ira: “Lelo iyai! Zina lae unakala Yohani.” 61 Angaongile vyevi, aluwa koomuwandela ira: “Kavali balawo uliwetene unoyo unaiziweyana zina leli.” 62 Vanduli viwa aluwa koomufuka babae, voonga na manda, zina lelo unafuna liye muva-a mwanoyo. 63 Eno liye oovepa tabwa ling’onong’ono moi oolembavo ira: “Zina lae ngu Yohani.” Athu etene kangaonile vyevi koodabwa vinjinji. 64 Thawi ineyo vamulomo vae voo-uleya teto lumi lae loomasuwa moi oowambeela onga notamanda Mulungu. 65 Athu etene anayo kakala mudelalo koowova vinjinji moi khani inela yoofala mudela letene la umimwango wu Yudeya. 66 Athu etene anayo kavwide vyevi koovisunga m’murimani mwiwa moi kaonga ira: “Kodi mwana unola unaza akala oyi avi?” Chifukwa ndanda la Yehova* lali va liye.

67 Ndiye Zekariya, babae wa mwanoyo, oozaaliwa na zimu owela moi oowonga ira: 68 “Atamandeye Yehova* Mulungu wa Isaraeli, chifukwa uumbuwela athwae nowazelana ipulumuso. 69 Liye upangi-a ira va nyumba ya mtumikae Davide vaoneye ipulumuso* yakopolo, 70 mogwilizana na vyevyo aongile liye zela mwa anamaongelae owela awale, 71 ira unoza anivulumuche wa adani-u koma teto m’mandani mwa athu etene anayo kanaidana na iyo. 72 Liye unoza akwakwaneli-ede vyevyo alonjezile liye makolwi-u awale moi unoza aatonyi-ede chifundo. Unoza aumbuwele pangano lae lowela, 73 lumbilo lelo alumbele liye wa mbwii-u Aburahamu, 74 ira vanduli voi nivulumuchiwa m’mandani mwa adani, aniva-e mwai opanga utumiki opatuleya wa liye mo-oova, 75 mororomeleya koma teto mwachilungamo vamaso vae malambo etene. 76 Koma voonga vya mwana n’ng’onong’onowe, unoza uromoliwe ira namaongela wa Wamudimu Vinjinji, chifukwa unoza usogole vamaso va Yehova* ira udowe wasakaede ndila dae. 77 Ira udowe wakami-e athu iziwa vya ipulumuso ineyo inaze iwandeye machimwiwa kaza kakululukiwa, 78 chifukwa ya chifundo ilukulu ya Mulungwi-u. Na chifundo inela, wala wa mamawa unoza unifiyele kumela udimu, 79 moi wala wewu unoza umoneele athu anayo kanakala mudima koma teto mufuli okhwa nosogolela manyalwi-u vandila ya murendele.”

80 Eno mwanole ooulukula moi oolimba mwauzimu. Liye oopitiliza kala muipululu mpakana dambo lelo avioni-ile liye vowela wa Aisaraeli.