Olembiwa na Mateyu

25 “Umwene waudimu uli ngati anamwali 10 anayo katukulile nyale diwa nodowa muchingamela mkwati. 2 Anamwali 5 kali opuusa koma anamwali 5 amo-iwayo kali oenjela.* 3 Anamwali opuusayo kootukula nyale diwa koma katatukulile makura amo-iwa oenjedela. 4 Koma anamwali oenjelayo kootukula makura amo-iwa oenjedela m’mabotolo limo-i na nyale diwa. 5 Ndiye voi mkwati oodimbeliwa fiya, anamwali etene koowambeela ngwindima vanduli viwa koogona. 6 Vaari va ma-iyu oovweya mawu okuwa oonga ira: ‘Mkwatile ufiya! Kumani mwamuchingamele.’ 7 Thawi ineyo anamwali etene anayo koovenya nosakaeda nyale diwa. 8 Anamwali opuusale kooawandela anamwali oenjelale ira, ‘Nigawelewoni makurinyu, chifukwa nyale di-u dikede ala vang’ono tima.’ 9 Anamwali oenjelayo koosomeda ira: ‘Mwina katinanikwakwanela nagaana na nyo. Dowani mwagule eenyu.’ 10 Kangadowile ogula makura, mkwati oofiya. Anamwali anayo kali kangakozeilale koovolowa limo-i na liye m’mba mwemo mwali phwando laukwati moi isewo yoo-eiwa. 11 Vanduli viwa anamwali amo-iwale koofiya noonga ira, ‘Mbwiyeni, Mbwiyeni, ni-uleleni!’ 12 Liye oowasomeda ira, ‘Onga vyoona, kandinauiziwani.’

13 Eno pitilizani kala maso chifukwa kamunaiziwa dambo kapena thawiwa.

14 Umwene waudimu uli ngati muthu unoyo afuna dowa uilambo imo-iwa, moi ooitani-a akapolwae nowasungi-a chumae. 15 Kapolo owambeela amuva-ile ndalama dokwakwana matalenti* 5, kapolo wanambili amuva-ile matalenti men’li teto kapolo wanaralu amuva-ile talenti imo-i. Kapolo uliwetene oomuva-a mogwilizana na luso lae moi liye oodowa uilambo imo-iwa. 16 Thawi ineyo kapolo unoyo awachelile matalenti 5 oomaruwa dowa panga malonda na ndalameyo moi oopindula matalenti amo-iwa teto 5. 17 Chimozimozi na kapolo unoyo awachelile matalenti ambin’li, oopindula teto matalenti amo-iwa ambin’li. 18 Koma kapolo unoyo awachelile talenti imo-i oodowa timba vati noisunga ndalameyo.*

19 Vangavirile thawi yolapa, mbwiiwa ooza ira aone vyevyo kapangileathu na ndalama dile. 20 Eno kapolo unoyo awachelile matalenti 5 ooza na matalenti amo-iwa 5 oenjedela noonga ira, ‘Mbwiyeni, vale mwandiva-ile matalenti 5 koma konani, ndipindula matalenti amo-iwa teto 5.’ 21 Mbwiyaeyo oomusomeda ira: ‘Upanga pama vinjinji, uli kapolo wapama koma teto ororomeleya! Uroromeleya va vyongo vyoyeva, eno ndinou-ela ira uing’anelenga vyongo vinjinji. Sangalala limo-i na miyo mbwiyawo.’ 22 Vanduli viwa kapolo unoyo awachelile matalenti ambin’lile ooza noonga ira, ‘Mbwiyeni, vale mwandiva-ile matalenti ambin’li koma konani, ndipindula matalenti amo-iwa teto ambin’li.’ 23 Mbwiyaeyo oomusomeda ira: ‘Upanga pama vinjinji, uli kapolo wapama koma teto ororomeleya! Uroromeleya va vyongo vyoyeva, eno ndinou-ela ira uing’anelenga vyongo vinjinji. Sangalala limo-i na miyo mbwiyawo.’

24 Vogomi-eda viwa kapolo unoyo awachelile talenti imo-ile, ooza moi aongile ira: ‘Mbwiyeni, ndooiziwa ira nyo muli muthu orucha. Muno-anda mwaanafese, teto munotukula tirigu mwaana-inde chito iliyetene. 25 Eno chifukwa yoova ndooisunga talentile vati. Ndalaminyu chila, iwacheleni.’ 26 Mbwiyaeyo oomusomeda ira: ‘Kapolo otakala na waulesiwe! Unaonga ira ooiziwa ira miyo ndino-anda ndaanafese, teto ndinotukula tirigu koma ndaana-inde chito iliyetene? 27 Ndiye vyookala pama aakale ira oosungi-a ndalamangeyo* wa osunga ndalama, chifukwa vevo ndizile miyo ndoowachela ndalameyo limo-i na ndalama imo-iwa yoenjedela.

28 Eno muwakeni talentiyo noipeleka wa kapolo unoyo un’na matalenti 10. 29 Chifukwa uliwetene unoyo un’na vyongo, unoza ava-iwe vyongo vimo-i vinjinji moi unoza akaena vyoinjiva. Koma unoyo kan’na yongo unoza awakiwe ngakale vyevyo un’na liye. 30 Muvochedeni kapolo otakaloyo unde udima. Wewo liye unodowa aule nokukuta mano.’

31 Mwana wa muthu aza afiya mu ulemelelwae, limo-i na angelwae etene, unoza agarati vapandwae waumwene waulemelelo. 32 Athu a mitundu detene kanoza kasonkani-iwe wa liye moi unoza amwalani-e athu, mofwanafwana na mwemo m’busa unamwalani-ela liye khosa na budi. 33 Liye unoza a-ele khosa undanda lae lodjana koma budi unoza adi-ele undanda lae lamazele.

34 Vanduli viwa Mwene unoza awandele athu anayo kali undanda lae lodjana ira: ‘Zani, nyo anayo mudalisiwe na Babanga. Volowani mu Umwene unoyo kaukozeleniathu kumela vowambeela vailambo yavati.* 35 Chifukwa ndookaana ndala koma nyo moondiva-a yodja. Ndookaana thona koma nyo moondiva-a yong’wa. Ndali mulendo koma nyo moondiwachela pama. 36 Kandan’na yowara* koma nyo moondiwari-a. Ndoobulela koma nyo moondisamalela. Ndali mundende koma nyo mooza za ndiona.’ 37 Ndiye olungamayo kanoza kamusomede ira: ‘Mbwiyeni, iyo nauwonileni alini mungan’na ndala iyo udji-ani, kapena mungan’na thona iyo uva-ani yong’wa? 38 Nauwonileni alini mungali mulendo iyo uwachelani pama, kapena mwa-an’na yowara iyo uwari-ani? 39 Nauwonileni alini mubulelanga kapena nazile alini za uonani mwangali mundende?’ 40 Koma Mwenoyo unoza aasomede ira, ‘Ndithu ndinaauwandelani, iliyetene ineyo mwamupangelenyo m’mo-i mwa abalanga ang’onong’ono anala, mwandipangele teto miyo.’

41 Vanduli viwa unoza aawandele anayo kali undanda lae lamazele ira, ‘Venyavoni vamaso vanga athu otembeleliwa nyo. Dowani umulo oomala unoyo wathumbanyeliwe Mdjelekezi na angelwae. 42 Chifukwa ndookaana ndala koma nyo kamwandiva-ile yodja. Ndookaana thona koma nyo kamwandiva-ile yong’wa. 43 Ndali mulendo koma nyo kamwandiwachelile paama. Kandan’na yowara koma nyo kamwandiwari-ile. Ndoobulela koma teto ndookala mundende koma nyo kamwandisamalele.’ 44 Aluwa kanoza kamusomede ira: ‘Mbwiyeni, nauwonileni alini mungan’na ndala kapena mungan’na thona kapena mungali mulendo kapena mwa-an’na yowara kapena mubulelanga kapena mungali mundende koma iyo lepela ukami-ani?’ 45 Koma liye unoza aasomede ira: ‘Ndithu ndinaauwandelani, vyongo vyevyo mwalepelile nyo mupangela m’mo-i mwa abalanga ang’onong’ono anala , mwalepelile teto ndipangela miyo.’ 46 Athu anala kanoza kadowe uchiwonongeko yo-omala,* koma olungama kanoza kadowe umoyo oomala.”