Olembiwa na Yohani

6 Vanduli va vyevi, Yesu oolambuwela ukombela imo-iwa ya nyanja ya Galileya,* kapena ira nyanja ya Tiberiyo. 2 Moi gulu lilukulu la athu loomu-arela chifukwa loowona vizindikilo vyevyo apanga liye vochili-a athu obulela. 3 Eno Yesu oogwela wu mwango moi ookala wewo limo-i na ofunjedae. 4 Sopano ikondwelelo ya Ayuda ya Pasika yali ingaandamele. 5 Yesu angaonile ira gulu lilukulu la athu linaaza wa liye, oomufuka Filipo ira: “Kodi mikate dodji-a athu etene anala ninadowa nadigule waani?” 6 Koma liye aongile vyevi vofuna keda iziwa vyevyo Filipo aganiza liye. Koma Yesuyo ali angaiziwile wale vyevyo afuna liye panga. 7 Filipo oomusomeda ira: “Ndalama dokwakwana madinari 200* kadinakwakwanele gula mikate ira uliwetene adje vang’ono.” 8 Andreya m’mo-i wa ofunjedae, unoyo ali nchimwenae wa Simoni Petulo, aongile ira: 9 “Vano vikala zombwe unoyo un’na mikate 5 da balele na somba mbin’li. Koma nanga vyevi vinokoza kwakwanela gulu letene leli?”

10 Yesu aongile ira: “Awandeleni athwala ira kagarati.” Vamalovo vookala manachi anjinji. Eno alombwana otamangela 5 000 koogarati. 11 Ndiye Yesu oolanda mikate dile moi angapempelile, oowagawela athu etene anayo kali vamalovo. Oopanga teto chimozimozi na somba mbin’li dile moi uliwetene oodja mwemo afunela liye. 12 Athu etene anayo kangarumbalile, liye ooawandela ofunjedae ira: “Dodelani vyongo vyetene vyo-ala, ira kavitatiliwe yongo iliyetene.” 13 Eno koododela vyetene, moi vyoozaala madengo 12 kumela va mikate 5 dile, dedo athu etene kadjileathu mpakana dilepela.

14 Athwayo kangaonile izindikilo ineyo Yesu apangile liye, koowambeela onga ira: “Onga vyoona ula ngu namaongela unoyo aongiwe ira unoza aze vailambo.” 15 Vanduli viwa Yesu angaiziwile ira athu kanafuna kamu-inde ira kamu-ele kala mwene, oovenyavo dowa wu mwango ekave.

16 Vevo zuwa lavolowaathu, ofunjedae koodowa unyanja. 17 Aluwa koogwela ngalawa nowambeela lambuwa nyanja volowela wu Kaperenao. Vathawi inela unde wali ungadimbile moi Yesu ali aanazeve. 18 Koma teto vanyanjavo voowambeela mafunde chifukwa yoi ookala lipevo lakopolo. 19 Koma kangapalasile makilomita otamangela 5 kapena 6,* koomuona Yesu aendanga vanyanjavo nowandamela ngalaweyo moi aluwa koowova vinjinji. 20 Koma Yesu ooawandela ira: “Ngu miyo, kamuove!” 21 Vanduli viwa koomulola ira agwele mugalawamo, moi thawi ineyo ngalaweyo yoofiya wewo kadowaathu.

22 Dambo lo-arela, athu anayo kali ukombela imo-iwa ya nyanjeyo kafwanyile ira ngalawa ing’onong’ono ineyo yali vamalovo kilivo. Chifukwa yoi ofunjeda a Yesu kali kangagwelile ngalaweyo, koma Yesu kaagwelile ngalaweyo limo-i na aluwa vathawi ineyo kadowaathu. 23 Koma ngalawa dokumela wu Tiberiyo doofiya vakwikwi na vamalo anayo athwayo kadjelevoathu mikate, Yesu angapempelile. 24 Eno gulu la athulo lingaonile ira Yesu limo-i na ofunjedae katili wewo, loogwela ngalawa diwa dowa wu Kaperenao dowa musaela Yesu.

25 Kangamufwanyile ukombela imo-iwa ya nyanjeyo koomufuka ira: “Rabi, mufiile thawi n’ni uno.” 26 Yesu oowasomeda ira: “Kamunandisaela chifukwa yoi moowona vizindikilo, koma chifukwa yoi moodja mikate norumbala. 27 Kamukedenga inda chito ira mufwanye yodja ineyo inaonongeya, koma ira mufwanye yodja yo-oonongeya ineyo inazana moyo oomala. Mwana wa muthu unoza auva-eni yodja inela chifukwa Baba Mulungu umu-ela izindikilo yomusomedela.”

28 Eno athwayo koomufuka ira: “Kodi nipange n’ni ira nipangenga vyevyo Mulungu unafuna liye?” 29 Yesu oowasomeda ira: “Vyevyo Mulungu unafuna liye ira mupangenga pivyoi mumuroromelenga unoyo amurumile liye.” 30 Ndiye aluwa koomufuka ira: “Ndiye nyo munapanga izindikilo yoi avi ira iyo nione nouroromelani? Munapanga chito yoi avi? 31 Makolwi-u koodja mana muipululu, monga mwemo Malemba kanaongelaathu ira: ‘Oowava-a yodja yokumela udimu ira kadje.’” 32 Vanduli viwa Yesu aongile ira: “Ndithu ndinaauwandelani, Mose kauva-ileni yodja yokumela udimu, koma Babanga unouva-ani yodja yokumela udimu. 33 Chifukwa yodja ineyo Mulungu upelekile liye ngunoyo uzide kumela udimu za peleka moywae vailambo.” 34 Eno aluwa koomuwandela ira: “Mbwiyeni, muniva-enga yodja inela thawi detene.”

35 Ndiye Yesu ooawandela ira: “Miyo ndili yodja yova-a moyo.* Uliwetene oza wa miyo kanaza akaana ndala ngakale vang’ono, moi ondiroromela kanaza akaana thona. 36 Komave monga mwemo ndiuwandelileni miyo, nyo kamunaroromela ngakale ira mundiona. 37 Muthu uliwetene unoyo Babanga unaze liye andiva-e unoza aze wa miyo, moi uliwetene oza wa miyo kandinaza ndimutamangi-a. 38 Chifukwa ndooza kumela udimu za panga vyofuna vya unoyo andirumile, ookala vyofuna vyanga. 39 Unoyo andirumile unafuna ira, va athu etene anayo andiva-ile liye kandiluzevo ngakale muthu m’mo-i, koma ira ndize ndiavenyi-e va dambo lomari-a. 40 Vyevyo Babanga unafuna liye pivyoi uliwetene omusomedela Mwana koma teto muroromela akaena moyo oomala, moi miyo ndinoza ndimuvenyi-e va dambo lomari-a.”

41 Vanduli viwa, Ayudayo koowambeela ng’ung’uza chifukwa yoi liye aongile ira: “Miyo ndili yodja yokumela udimu.” 42 Aluwa koowambeela onga ira: “Kodi ula kai Yesu mwana wa Yosefe, unoyo babae na m’mae ninaaiziwa iyo? Nanga chifukwa n’ni unaonga ira, ‘Ndakumele udimu’?” 43 Yesu oosomeda ira: “Iyani ng’ung’uza. 44 Kavali muthu unoyo unaza wa miyo akala ira kakokiwe na Babanga unoyo andirumile moi miyo ndinoza ndimuvenyi-e va dambo lomari-a. 45 Anamaongela kalembile ira: ‘Athu etene kanoza kafunji-iwe na Yehova.’* Uliwetene unoyo uvuruwanile wa Babanga moi ufunjeda unoza wa miyo. 46 Kavali muthu unoyo amuonilevo Baba, koma Mwana eka unoyo akumele wa Mulungu, unola oomuona Baba. 47 Ndithu ndinaauwandelani, uliwetene ororomela unoza afwanye moyo oomala.

48 Miyo ndili yodja yova-a moyo. 49 Makolwinyu koodja mana muipululu koma kookhwa. 50 Ila chiyodja yokumela udimu, yoi uliwetene adje ira kakhwe. 51 Miyo ndili yodja yova-a moyo yokumela udimu. Akala muthu unadje yodja inela unoza akaena moyo oomala. Moi yodja ineyo ndinaze miyo ndipeleke ira ilambwela ifwanye moyo, ti thuthu langa.”

52 Vanduli viwa Ayudayo koowambeela runi-ana ekiwa ira: “Kodi muthu unola unaniva-e avi thuthu lae ira nidje?” 53 Eno Yesu ooawandela ira: “Ndithu ndinaauwandelani, akala kamunadja thuthu la Mwana wa muthu nong’wa magazae, kamunaza mufwanya moyo. 54 Muthu uliwetene unoyo unadja thuthu langa nong’wa magazanga unoza afwanye moyo oomala, moi ndinoza ndimuvenyi-e va dambo lomari-a. 55 Chifukwa thuthu langa chiyodja moi magazanga chiyong’wa. 56 Muthu uliwetene unoyo unadja thuthu langa nong’wa magazanga, liye na miyo ninokala ogwilizana. 57 Baba wa moyo oondiruma miyo, moi ndikaana moyo chifukwa ya Baba. Mofwanafwana na vyevi, unoyo unadja thuthu langa unoza akaena moyo chifukwa ya miyo. 58 Inela chiyodja ineyo yakumele udimu. Chiyo-iyana na ineyo makolwinyu kadjileathu koma kookhwa. Uliwetene odja yodja inela unoza akaena moyo oomala.” 59 Yesu aongile vyevi vevo afunji-a liye musunagoge* wu Kaperenao.

60 Ofunjedae anjinji kangavwide vyevi, kaongile ira: “Mawu anala mborucha avwechecha. Mbaani unoyo unavuruwane vyevi?” 61 Koma Yesu angaiziwile ira ofunjedae kanaang’ung’uza chifukwa ya mawu anayo aongile liye, oowafuka ira: “Kodi mukumudwa chifukwa ya mawu anala? 62 Ndiye vinaza vikala avi mwaza mumuona Mwana wa Muthu awelelanga udimu wewo ali liye vowambeela? 63 Zimu ngunoyo unava-a moyo koma thuthu kalin’na chito iliyetene. Mawu anayo ndiuwandelileni miyo ngu zimu koma teto moyo. 64 Koma vaari vinyu vikala amo-iwa oyi katinaroromela.” Kumela vowambeela, Yesu oowaiziwa athu anayo katinamuroromela koma teto oomuiziwa muthu unoyo unaze amupeleke. 65 Liye oopitiliza onga ira: “Mbaona ndauwandelileni ira, kavali muthu unoyo unaze wa miyo akala ira kaloliwe na Babanga.”

66 Chifukwa ya vyevi, ofunjedae anjinji koomu-iya nowelela uvyongo vyevyo kapangaathu vowambeela moi kataendile nawili na liye. 67 Ndiye Yesu oowafuka ofunjedae 12 ira: “Kodi nanyen’ne teto munofuna dowa?” 68 Simoni Petulo oosomeda ira: “Mbwiyeni, ninadowe teto wa mbaani? Nyo ngunoyo mun’na mawu okami-a ira muthu aze afwanye moyo oomala. 69 Iyo niroromela moi niiziwa ira muli owela unoyo atumiziwe na Mulungu.” 70 Yesu ooawandela ira: “Miyo ndoousakulani nyo 12, kai eno? Koma m’mo-i wa nyo uli ngati Mdjelekezi.” 71 Veva liye aonga vya Yudasi mwana wa Simoni Isikariyoti, chifukwa yoi liye ngunoyo afuna za mupeleka, ngakale ira ali m’mo-i wa ofunjeda 12.