Vyoira Vya Anamarumiwa

10 Wu Kaisareya ookala muthu m’mo-iwa zina lae Koneliyo, unoyo ali msogoleli wa gulu la asilikali* awu Itale.* 2 Liye ali muthu oomeliwa pempela moi oowova Mulungu limo-i na banja lae letene. Koma teto oova-a athu osauwa mphaso dachifundo dinjinji moi oopempela mochondelela wa Mulungu thawi detene. 3 Dambo limo-iliwa m’ma 3 koloko tana,* liye oowona masomphenya. Ngelo wa Mulungu ooza onga ira: “Koneliyo!” 4 Koneliyo oowova vinjinji moi oomuing’anechecha ngeloyo noonga ira: “Ongani Mbwiyeni.” Ngeloyo oomuwandela ira: “Mulungu uvwa mapempelwawo koma teto uona mphaso dachifundo dedo unapelekawe. 5 Eno tumiza athu wu Yopa ira kadowe kamuitane muthu m’mo-iwa zina lae Simoni, oromoliwa teto ira Petulo. 6 Muthu unola ngu mulendo waniwa wa Simoni m’mo-iwa ochosa maoya a vikopa, unoyo nyumbae ili m’mbali mwa nyanja.” 7 Ngelo unoyo aonga na liye angadowile, Koneliyo oowaitana atumikae ambin’li koma teto msilikalae m’mo-iwa unoyo aova Mulungu. 8 Liye oowafotokozela vyetene moi oowaruma wu Yopa.

9 Dambo lo-arela, vevo kapitilizaathu ulendoyo koma teto kangaandamele fiya mu mzindoyo, Petulo oogwela vadimu va nyumba dowa pempela thawi ingali m’ma 12 koloko tana.* 10 Koma ookaana ndala vinjinji moi oofuna dja. Vevo yodja yapiiwaathu, Petulo oowambeela ona masomphenya. 11 M’masomphenyayo liye oowona udimu unga-uleile, yongo imo-iwa yooneya ngati nguwo ilukulu ititanga. Yongweyo yoo-idediwa m’makona etene 4 moi yali ititi-eliwanga vailambo yavati. 12 Vanguwovo vookala mitundu detene da vinyama vya mendo 4, vinyama vyowambaza vailambo yavati koma teto mbalame damulengalenga. 13 Vanduli viwa oovwa mawu oyi: “Petulo, maruwa uphe vyongo vyevi udje.” 14 Koma Petulo aongile ira: “Naari Mbwiyeni, miyo kandinadjevo yongo iliyetene yotakali-iwa koma teto yonyakavala.” 15 Oovwa mawale ulendo wanambili ira: “Vyongo vyevyo Mulungu uvipangi-ile liye kala vyowela, u-iye onga ira pivyotakali-iwa.” 16 Oovwa teto mawale ulendo wanaralu, moi thawi ineyo yongo yooneya ngati nguwele yoolandiwa dowa udimu.

17 Petulo oomaliwa zelu chifukwa yoi kaavwechechile vyevyo masomphenyayo katapulelaathu. Vevo vyongo vyevi vyaireyaathu athu anayo Koneliyo aarumile liye kali kangali vamulango ulukulu kafukedanga waniwa wa Simoni. 18 Aluwa koomufuka mwinyailo wa vandevo mokuwa akala vali mulendo zina lae Simoni oromoliwa teto ira Petulo. 19 Vevo Petulo apitiliza liye ganizela vya masomphenyayo, zimu wa Mulungu oomuwandela ira: “Petulo! Vikala athu aralu anayo kanaufuna. 20 Ndiye kozeya, utite ira udowe limo-i na aluwa. Kukaikele, chifukwa uwarumile ngu miyo.” 21 Eno Petulo ootita dowa gumana na athwayo moi aongile ira: “Muthu unoyo munamufuna nyo ngu miyo. Ndiukami-eni avi?” 22 Aluwa kaongile ira: “Iyo nirumiwe na Koneliyo, msogoleli wa asilikali. Liye ngu muthu olungama koma teto oova Mulungu moi tundu wetene wa Ayuda unomuyamikela. Mulungu ooruma ngelwae owela za muwandela ira arume athu ira kaze kaulandeni na yolinga yoi mudowe waniwa, ira adowe avwe vyevyo munaonge nyo.” 23 Ndiye ooawachela pama m’mba mwae moi oowasamalela monga alendwae.

Unde ungachile, oomaruwa limo-i na aluwa moi abali amo-iwa awu Yopa koodowa limo-i na liye. 24 Dambo lo-arela koofiya wu Kaisareya moi Koneliyo era aembekezela. Liye oosonkani-a abalae na afwae avamurima. 25 Vevo Petulo avolowa liye, Koneliyo oodowa gumana na liye moi ookokora votonyi-eda mulambela. 26 Koma Petulo oomuvenyi-a nomuwandela ira: “Imela, namiyene teto ndili muthu ngati weyo.” 27 Ndiye vevo Petulo akambilana liye na Koneliyo, koovolowa m’mba moi koofwanya athu anjinji kangasonkanile. 28 Ndiye Petulo ooawandela ira: “Nyo munoiziwa pama ira kai vyololeya ira Muyuda awaledenga na muthu wa tundu umo-iwa kapena muwandamela. Koma Mulungu undiwandela ira kandinafuneya muromola muthu uliwetene ira ngotakali-iwa kapena onyakavala. 29 Mbaona kandikoondile za uno mungatumizile athu ira kaze kandiitane. Eno ndiwandeleni ineyo mundiitanele nyo.”

30 Ndiye Koneliyo aongile ira: “Malambo 4 kavirilayo, miyo ndipempelanga m’mba mwanga m’ma 3 koloko tana,* ndoowona muthu owara vyowara vyowela vinjinji angaimelile usogolo wanga. 31 Muthuyo oondiwandela ira, ‘Koneliyo, Mulungu uvwa pempelo lawo koma teto uona mphaso dachifundo dedo unapelekawe. 32 Eno tumiza athu wu Yopa ira kadowe kamuitane muthu m’mo-iwa zina lae Simoni oromoliwa teto ira Petulo. Muthu unola ngu mulendo waniwa wa Simoni m’mo-iwa ochosa maoya a vikopa, unoyo nyumbae ili m’mbali mwa nyanja.’ 33 Thawi ineyo ndootumiza athu ira kaze kauitaneni moi zawinyu uno munditonyi-eda oma murima ulukulu. Eno etene nili vano vamaso va Mulungu, ira nivwe vyetene vyevyo Yehova* uulamulileni liye ira muniwandele.”

34 Petulo angavwide vyevi, oowambeela onga ira: “Sopano ndizindikila ira Mulungu kan’na sakulo. 35 Liye unowachela muthu wa tundu uliwetene, unoyo unamuova koma teto unoyo unapanga vyongo mwachilungamo. 36 Mulungu ootumiza mawu wa Aisaraeli koma teto oolengeza uthenga wapama wa murendele zela mwa Yesu Kristu unoyo uli Mbwiye wa athu etene. 37 Nyo munoiziwa vya khani ineyo yafalile vinjinji ambeela wu Galileya mpakana wu Yudeya wetene, vanduli va ubatizo unoyo Yohani alaleela liye. 38 Khaniwa yali yoonga vya Yesu wawu Nazareti, unoyo Mulungu amuzozile liye na zimu owela koma teto muva-a kopolo. Voi Mulungu ali na liye, ooenda muilambo yetene moi oopanga vyapama koma teto oochili-a athu etene anayo kazuzumi-iwa na Mdjelekezi. 39 Moi iyo nili mboni va vyongo vyetene vyevyo apangile liye muilambo ya Ayuda na wu Yelusalemu. Koma Aisaraeli koomupha vomupachika vatengo. 40 Mulungu oomuvenyi-a va dambo lanaralu ira athu kamuone, 41 kai athu etene, koma mboni dedo Mulungu adisakulile liye wale, moi mbonido ngu iyo, anayo nadjile koma teto nang’wile limo-i na liye angavenyi-iwe. 42 Koma teto, oonilamula ira nilaleele wa athu koma teto nipeleke umboni okwakwanela oyi liye ngunoyo asakuliwe na Mulungu ira aweluzenga athu amoyo na okhwa. 43 Anamaongela etene kanopangela umboni vya Yesu ira uliwetene omuroromela, machimwae kanokululukiwa muzina lae.”

44 Vevo Petulo aonga liye vyevi, athu etene anayo kavuruwana mawayo koowachela zimu owela. 45 Moi ofunjeda anayo kazide limo-i na Petulo, anayo teto kali oduliwa, koodabwa vinjinji. Aluwa koodabwa chifukwa mphaso yaulele ya zimu owela yoopelekiwa wa athu a mitundu dimo-i. 46 Chifukwa yoi koowavwa kaonganga viongelo vimo-i* koma teto kalemekezanga Mulungu. Ndiye Petulo aongile ira: 47 “Athwala koowachela zimu owela ngati mwemo nawachelele iyo. Mbaani unoyo unaruni-e ira katibatiziwe m’ma-inje?” 48 Vanduli viwa oowalamula ira kabatiziwe muzina la Yesu Kristu. Ndiye athwayo koomuvepa ira akaleve limo-i na aluwa wa malambo mangasene.