Kalata Yodowa wa Akristu Awu Roma
8 Eno athu anayo kali ogwilizana na Kristu Yesu katin’na mulandu. 2 Chifukwa lamulo la zimu owela lelo linava-a moyo mogwilizana na Kristu Yesu liumasulani ulamulo la uchimo na ulamulo lokhwa. 3 Ilamulo kayan’na kopolo youmasulani chifukwa athu mbofooka koma teto mbochimwa. Koma Mulungu oomutumiza Mwanae, angan’na thuthu ngati la athu ochimwa ira aumasuleni uuchimo. Eno Mulungu oogonji-a uchimo vo-indi-eda chito thuthu. 4 Mulungu oopanga vyevi ira iyo anayo ninaenda mo-arela zimu owela, o-okala mo-arela vyofuna vya thuthu li-u, nikwakwaneli-ede vyongo vyolungama vyevyo IIamulo inafunaathu. 5 Chifukwa athu anayo kana-arela vyofuna vya thuthu, maganizwiwa etene kanakala va vyongo vya thuthu. Koma athu anayo kana-arela zimu owela, maganizwiwa etene kanakala va vyongo vya zimuyo. 6 Voi ganizela vinjinji vyongo vya thuthu unozi-a khwa, koma ganizela vinjinji vyongo vya zimu owela unozi-a moyo na murendele. 7 Chifukwa ganizela vinjinji vya thuthu unopangi-a athu kala vaudani na Mulungu voi thuthu kalinavwela lamulo la Mulungu, moi onga vyoona, kalinavwele lamulo. 8 Eno athu anayo kana-arela vyofuna vya thuthu katinawande musangalasa Mulungu.
9 Komave akala zimu wa Mulungu uli na nyo, muno-arela vyofuna vya zimuyo o-okala vyofuna vya thuthu. Akala m’mo-iwa kan’na zimu wa Kristu, muthu unoyo kai wa Kristu. 10 Koma akala muli ogwilizana na Kristu, zimu owela unopangi-a ira mukaena moyo chifukwa ya chilungamo ngakale ira thuthu linyu tilokhwa chifukwa ya uchimo. 11 Akala zimu wa Mulungu unoyo wamuvenyi-ile Yesu Kristu uli mwa nyo, liye unoza a-indi-ede chito zimuyo, vopangi-a ira mathuthwinyu okhwa kakaena moyo.
12 Eno abali, kanilole ira mathuthwi-u kanilamulelenga nopanganga vyongo vyevyo mathuthwayo kanafunaathu. 13 Chifukwa akala muna-arela vyofuna vya thuthu, mookaikela munoza mukhwe. Koma mwalola ira kopolo ya zimu owela iukami-eni ira muphe vilakolako vya thuthu, munoza mukaena moyo. 14 Etene anayo kanasogoleliwa na zimu wa Mulungu, mba a-ima a Mulungu. 15 Chifukwa kamuwachelile zimu wa ukapolo unoyo unapangi-a ira muovenga, koma moowachela zimu unoyo unapangi-a ira mukale a-ima a Mulungu, moi zimuyo unopangi-a ira niongenga mokuwa ira: “Abba,* Babani!” 16 Zimuyo unopangela umboni limo-i na zimwi-u ira nili a-ima a Mulungu. 17 Eno akala nili a-ima, nili teto owachela cholowa kumela wa Mulungu. Moi liye unoza aniva-e cholowa limo-i na Kristu, akala ninavuteya limo-i na liye ira nidowe nawachele ulemelelo.
18 Ndinaona ira mavuto anayo ninagumanana iyo vathawiila mba ang’onong’ono voelekezela na ulemelelo unoyo Mulungu unaze liye aniva-e usogolo. 19 Chifukwa ilengedwe inoembekezela mwachidwi thawi ineyo ulemelelo wa a-ima a Mulungu unazeathu uoneele. 20 Voi ilengedwe yetene yooweluziwa ira ikale yookaana chito, o-okala mofuna mwiwa koma Mulungu ngunoyo apangi-ile ira ikale yookaana chito. Moi oopeleka teto idedi-edo 21 yoi ilengedweyo inoza imasuliwe uukapolo wa uchimo nokhwa moi inoza ikaena ufulu wa ulemelelo wa a-ima a Mulungu. 22 Chifukwa ninoiziwa ira ilengedwe yetene inaadumbela vamo-i koma teto vwa voreya mpakana vano. 23 Koma teto kai vyokaaevi. Iyo anayo nin’na vipaso vyowambeela vya zimu, ninodumbela m’murimani mwi-u vevo ninaembekezela iyo na murima wetene ira Mulungu anilande kala a-imae, koma teto ira aze animasule wu mathuthwi-u vo-indi-eda chito dipo.* 24 Chifukwa noovulumuchiwa ira nikaena idedi-edo inela, koma yongo ineyo muthu unaidedi-eda liye yawandeya kanaidedi-edave. Kodi ineyo muthu aidedi-eda liye yaireya, unopitilizave idedi-eda? 25 Koma akala vyongo vyevyo ninadedi-eda iyo kavinaireye, ninopitilizave dedi-eda movilela.
26 Mofwanafwana na vyevi, zimu owela unonikami-a va vyongo vyevyo ninalepela iyo vipanga. Chifukwa vuto tiloi kaninaiziwa vyevyo ninafuna iyo romola vopempela, koma zimu owela unochondelela m’malo mwa iyo va vyongo vyoi kaninawande vifotokoza. 27 Koma Mulungu unoyo unaiziwa vyevyo vili m’murimani mwi-u unoiziwa vyevyo zimu owela unafunaathu, chifukwa unochondelela m’malo mwa owela mogwilizana na ifunelo yae.
28 Ninoiziwa ira Mulungu unogwilizani-a vyoira vyae vyetene vofuna kami-a athu anayo kanamuomeliwana, anayo kali oitaniwa mogwilizana na yolinga yae. 29 Unopanga vyevi chifukwa athu anayo aaiziwile liye wale oowasakula ira kaze kakale ofwanafwana na Mwanae, ira Mwanoyo akale owambeela baliwa vaari va abalae anjinji. 30 Koma teto anayo aasakulile liye wale mbanayo aaitanile liye. Anayo aaitanileliyayo mbanayo teto unaaona liye ira mbolungama. Moi anayo unaaona liye ira mbolungamayo mbanayo teto aava-ile liye ulemelelo.
31 Ndiye nionge n’ni veva? Akala Mulungu uli umbali-u, mbaani unaze aruni-ane na iyo? 32 Voi umupeleka Mwanae mofunechecha m’malo mwa etene iyene, unalepele avi niva-a mooma murima vyongo vyetene vamo-i na Mwanae? 33 Mbaani unoyo unaze aimbe mulandu athu a Mulungu osakuliwa? Voi Mulungu ngunoyo unaona ira mbolungama, 34 mbaani unoyo unaze aaruni-e? Kristu Yesu ngunoyo akhwile koma teto ngunoyo avenyi-iwe. Liye uli wu ndanda lodjana la Mulungu, moi unoonga mochondelela m’malo mwa iyo.
35 Mbaani unoyo unaze animwalani-e na chikondi ya Kristu? Kodi mba mavuto, vyongo vyovoreya, zuzumi-iwa, ndala, usiwa, vyongo vyoopi-a kapena supada? 36 Malemba kanaonga ira: “Chifukwa ya nyo, iyo ninophiwa thawi detene. Nili ngati khosa dedo dinadowa ophiwa.” 37 Koma ninogonji-a vyongo vyetene vyevi mokami-iwa na unoyo aniomeliwilena. 38 Chifukwa ndisimikiza murima ira khwa, moyo, angelo, olamulela, vyongo vyevyo vilivo vathawiila, vyongo vyevyo vinaza usogolo, kopolo, 39 usinkhu, dii-a kapena yolengiwa iliyetene, kavinaza viwanda nimwalani-a na chikondi ya Mulungu ineyo ili mwa Kristu Yesu Mbwii-u.