Vyoira Vya Anamarumiwa
18 Vanduli viwa Paulo ookuma wu Atene dowa wu Korinto. 2 Moi wewo oomufwanya Muyuda m’mo-iwa zina lae Akula, wawu Ponto. Liye limo-i na iyanae Purisila, kali kangakede fiya wene kumela wu Itale, chifukwa Kalaudiyo ali angalamulile ira Ayuda etene kavenyewo wu Roma. Eno Paulo oodowa waniwa. 3 Voi etene chitwiwa yali imo-i, liye ookala waniwawo. Aluwa ka-indela chito limo-i, chifukwa etene kali opanga matenti. 4 Paulo ookamba khani musunagoge dambo la sabata lililetene moi Ayuda na Agiriki koororomela uthengae.
5 Sila na Timoteyu kangafiile kumela wu Makedoniya, Paulo oowambeela tanganisiwa vinjinji na chito yolaleela mawu a Mulungu. Liye oopangela umboni wa Ayuda koma teto asimikizela ira Yesu ngu Kristu. 6 Koma aluwa kangapitilizile muruni-a koma teto munyoza, liye ootata vyowara vyae noawandela ira: “Mulandu wa magazinyu ukale vamuru vinyu. Miyo kandin’na mulandu. Ambeela vano ndinadowenga wa athu a mitundu dimo-i.” 7 Vingairile eno, liye oovenyawo wu sunagoge dowa wu nyumba ya muthu m’mo-iwa zina lae Titiyo Yusito. Muthu unola ali olambela Mulungu moi nyumbae yali yowandamana na sunagoge. 8 Koma Kirisipo msogoleli wa sunagoge, oororomela Mbwiye limo-i na athu etene a m’banja lae. Moi athu anjinji awu Korinto, anayo kavwide uthenga wapama, koowambeela roromela moi koobatiziwa. 9 Koma teto ma-iyu, Mbwiye oomuwandela Paulo m’masomphenya ira: “Kuove, pitiliza onga. Kumiyale, 10 chifukwa miyo ndili na weyo. Kavali muthu unoyo unaze auzuzumi-e kapena uporecha, chifukwa miyo ndikaana athu anjinji mu mzindola.” 11 Eno liye ookala wewo chaka na medi 6, aafunji-anga mawu a Mulungu.
12 Vevo Galiyo ali liye bwanamkubwa* wawu Akaya, Ayuda koomaruwa mogwilizana nomuukela Paulo moi koomulanda mudowana umalo oweluzela milandu. 13 Wewo aluwa kaongile ira: “Muthula unofunji-a athu ira kalambelenga Mulungu mundila yo-ogwilizana na ilamulo.” 14 Koma vevo Paulo afuna liye ira aongenga, Galiyo ooawandela Ayudayo ira: “Nyo Ayuda, aakale ira muthula upanga yongo yotakala kapena mulandu ulukulu, miyo ndooleza murima moi ndoouvuruwanani. 15 Koma akala munakangana chifukwa ya mawu, mazina na ilamulo inyu, vyevyo mulimbanena ekinyu. Miyo kandinafuna ira ndikale oweluza vakhani ngati dedi.” 16 Vingairile eno liye oowachosa vamalo oweluzela milandwayo. 17 Vanduli viwa, etene koomu-inda Sositene, msogoleli wa sunagoge nowambeela muvaza vakwikwi na malo oweluzela milandwayo. Koma vyevi kavyamukuzile Galiyo ngakale vang’ono.
18 Paulo angakalile wewo wa malambo anjinji, oosazikana na abalayo moi oopitiliza ulendwae wavanyanja volowela wu Siriya. Va ulendo unola oodowa limo-i na Purisila na Akula. Paulo ooinga sisi lae wu Kenkereya chifukwa ya lonjezo lelo apangile liye. 19 Eno etene koofiya wu Ifeso, moi afwae oowa-iya wewo. Koma liye ekave oovolowa musunagoge nowambeela funji-a Ayuda. 20 Ngakale ira koomuvepa moweli-edaweli-eda ira akale wewo wa malambo anjinji, liye kaalolile. 21 M’malomwiwa, oosazikana na abalayo noawandela ira: “Yehova* alola ndinoza ndize nawili za uonani.” Eno oomaruwa wu Ifeso va ulendo wavanyanja. 22 Moi oofiya wu Kaisareya. Vanduli viwa oodowa wu Yelusalemu dowa peleka moni wa abali wu pingo moi vingairile eno oodowa wu Antiokeya.
23 Angakalile wewo wa malambo mangasene, oomaruwa moi oowambeela enda m’malo o-iyana-iyana muigawo ya Galatiya na Fulugiya teto oolimbikisa ofunjeda etene.
24 Sopano Muyuda m’mo-iwa zina lae Apolo, wawu Alekizandiriya, unoyo aonga mwaluso, oofiya wu Ifeso. Liye ooiziwa pama Malemba. 25 Muthu unola oofunji-iwa ndila ya Yehova.* Liye ali ovipeleka vinjinji chifukwa yoi ookaana zimu owela, moi oowonga nofunji-a molondola ndila ya Yesu. Koma akeda iziwa vya ubatizo wa Yohani oka. 26 Liye oowambeela onga molimba murima musunagoge. Ndiye Purisila na Akula kangamuvuruwanile, koomulanda nomufotokozela ndila ya Mulungu molondola. 27 Voi Apolo oofunechecha dowa wu Akaya, abali koowalembela kalata ofunjeda a wewo. Koowalimbikisa ira kamuwachele pama. Eno liye angafiile wewo, oowakami-a vinjinji athu anayo kali kangaroromele chifukwa yooma murima ulukulu wa Mulungu. 28 Liye oowasimikizela Ayuda vowela koma teto mwakopolo ira kali olakwa, moi oo-indi-eda chito Malemba votonyi-eda ira Yesu ngu Kristu.