Olembiwa na Luka
10 Mbwiye angamari-ile onga vyevi, oowasakula athu 70 nowatumiza ambin’li ambin’li ira kasogole dowa mu mzinda na m’malo o-iyana-iyana wewo afuna liye ira aze adowewo. 2 Vanduli viwa ooawandela ira: “Onga vyoona, vikala vyongo vinjinji vyofuneya anda, koma achito mboyeva. Eno vepani Mwinyailo wa munda ira atumize achito oyi ka-ande. 3 Dowani! Miyo ndinautumizani monga khosa vaari va mimbulu. 4 Kamulande chikwama ya ndalama, thumba la yodja, kapena sapato, moi kamupeleke moni wa muthu uliwetene* vandila. 5 Mwafiya vande va muthu, yowambeela muongenga ira: ‘Murendele ukale vande vano.’ 6 Moi akala vandevo vali muthu oomeliwana murendele, murendelinyu unaza ukala va liye. Koma akala kalivo, murendelinyu unoza uwelele wa nyo. 7 Eno mukalenga vandevo moi mudjenga nong’wa vyevyo kauva-ileniathu, chifukwa wachito unafuneya wachela malipilwae. Kamuvenyengavo vande vevo mufiile nyo dowa unyumba imo-iwa.
8 Koma teto mwavolowa mu mzinda moi aluwa kauwachelani pama, mudowe mwadjenga vyevyo kauva-ileniathu, 9 muchili-enga teto athu obulela anayo kali mu mzinda unoyo koma teto muawandelenga ira: ‘Umwene wa Mulungu uli vakwikwi na nyo.’ 10 Koma mwavolowa mu mzinda unoyo katiuwachelileni paama, muvenyengamo dowa m’misewu dilukulu da mzinda unoyo noonga ira: 11 ‘Ninoutatelani tumbulu la mu mzindinyula, lelo lili umanyalwi-u monga umboni wa nyo. Komave iziwani ira Umwene wa Mulungu uwandamela.’ 12 Ndithu ndinaauwandelani, va dambo la iweluzo ilango ya mzindoyo inaza ikala yovoreya vinjinji kwaranya ya Sodomu.
13 Soka wa nyo athu awu Korazini! Soka wa nyo athu awu Betisaida! Chifukwa chito dakopolo dedo mwapangile nyo, aakale ira daireile wu Turo na wu Sidoni, athu kakala kangalapile wale, kangawarile viguduli nogarati vadora. 14 Vachifukwa inela va dambo la iweluzo ilango inyu inaza ikala yovoreya vinjinji kwaranya ya Turo na Sidoni. 15 Nanyen’ne teto athu awu Kaperenao, kodi mwina munoza mugweli-iwe udimu? Naari, koma munoza mutitele wu Manda.*
16 Muthu unoyo unauvuruwanani, unandivuruwana teto miyo. Unoyo unaunyalanyazani, unandinyalanyaza teto miyo moi unoyo unandinyalanyaza miyo, unamunyalanyaza teto Mulungu unoyo andirumile.”
17 Vanduli viwa athu okwakwana 70 kooza kasangalalanga moi koomuwandela Yesu ira: “Mbwiyeni, ngakale viwanda vyoonigonjela na-indi-eda chito zina linyu.” 18 Liye angavwile vyevi ooawandela ira: “Ndiambeela muona Satana angagwile wale ngati mwemo vyerima wa zongwe unapangelaathu kumela udimu. 19 Kaonani! Miyo ndiuva-ani ulamulilo ira muwandenga nyingalanyingala nyowa na awaluze. Koma teto ndiuva-ani ulamulilo ira muwandenga gonji-a kopolo detene da adani, moi kilivo yongo iliyetene ineyo inaze iuporecheni. 20 Koma kamusangalale chifukwa yoi mizimu diugonjelani, koma sangalalani chifukwa yoi mazininyu koolembiwa udimu.” 21 Vathawi ineyo Yesu oosangalala vinjinji moi angazaaliwe na zimu owela aongile ira: “Ndinoutamandani nyo Babani vamaso va athu etene, Mbwiye waudimu na ilambo yavati, chifukwa athu azelu na ozindikila muwabisela mosamala vyongo vyevi koma muviulula wa a-ima ang’onong’ono. Vyoona Babani, chifukwa nyo moosomedela ira vyevi viireye. 22 Babanga undiva-a vyongo vyetene moi kavali muthu unoyo unamuiziwa pama Mwana koma Baba eka. Koma teto kavali muthu unoyo unamuiziwa pama Baba koma Mwana eka na uliwetene unoyo Mwanoyo unafuna liye muululela vya Baboyo.”
23 Ndiye Yesu na ofunjedae kangali umalo aekiwa, ooawandela ira: “Osangalala mbaathu anayo kanaona vyongo vyevyo munaviona nyo. 24 Chifukwa ndithu ndinaauwandelani, anamaongela anjinji koma teto athu olungama koolakalaka ira kaone vyongo vyevyo munaviona nyo koma kativionile, koma teto ira kavwe vyongo vyevyo munavwa nyo koma kativivwile.”
25 Vanduli viwa muthu m’mo-iwa oiziwa Ilamulo ooimela ira amuyese moi oomufuka ira: “Mphunzisi, kodi ndipangenga n’ni ira ndize ndifwanye moyo oomala?” 26 Yesu oomufuka ira: “Kodi mu Ilamulo mwalembiwe n’ni? Nanga unawelengamo vyoi avi?” 27 Liye asomedile ira: “‘Umuomeliwengana Yehova* Mulungwawo na murimawo wetene, moywawo wetene, kopolo dawo detene na maganizwawo etene.’ Koma teto ‘umuomeliwengana fwawo monga mwemo unaviomeliwanawe weka.’” 28 Yesu oomuwandela ira: “Usomeda molondola. Pitiliza panga vyevi moi unoza ufwanye moyo.”
29 Koma vofuna vioni-eda ira ngolungama, muthuyo oomufuka Yesu ira: “Nanga fwanga unoyo ndinafuneya miyo muomeliwana mbaani kwenikweni?” 30 Yesu oosomeda ira: “Muthu m’mo-iwa, akumela wu Yelusalemu dowa wu Yeriko moi oogumana na achifamba anayo kamukurulile vyowara vyae nomuvaza vinjinji. Moi koomu-iya anga-alile vang’ono khwa. 31 Ndiye vyaireile pivyoi wasembe m’mo-iwa avira sewu unoyo, koma angamuonile, akede mulambalala. 32 Chimozimozi teto Mulevi m’mo-iwa, angafiile vamalovo nomuona, akede mulambalala. 33 Koma voofiya Msamariya m’mo-iwa unoyo avira. Moi angamuonile muthuyo, oomuvwela chisoni. 34 Eno oofiya vevo vali muthuyo moi oo-ela makura koma teto vinyu m’mabalae nowamanga. Vanduli viwa oomugweli-a va bulwae nomudowana unyumba ya alendo ira kamusamalelenga. 35 Dambo lo-arela liye ookumi-a madinari* men’li nowapeleka wa mwinyailo wa nyumba ya alendweyo moi oomuwandela ira: ‘Musamaleleni pama, mwaononga ndalama dimo-idiwa doenjedela, ndinoza ndiuweli-edeni ndaza.’ 36 Mbaani va athu aralu anala unoyo unaona we ira oomuomeliwana muthu unoyo agumanile na achifambola?” 37 Liye oosomeda ira: “Ngunoyo amupangele chifundoyo.” Ndiye Yesu oomuwandela ira: “Dowa, nawen’ne teto wapangenga vyevi.”
38 Ndiye aluwa koopitiliza ulendwiwa moi koovolowa mu mzinda umo-iwa. Wewo iyana m’mo-iwa zina lae Marta oomuwachela m’mba mwae monga mulendo. 39 Liye ookaana balae zina lae Mariya, unoyo agaratile vakwikwi na Yesu novuruwananga vyevyo aonga liye.* 40 Koma Marta ootanganisiwa na chito dinjinji. Eno oofiya vevo vali Yesu moi aongile ira: “Mbwiyeni, kodi kamunaona ira dimbilangola undi-iyeda mekave chito? Kamuwandeleni ira aze andikami-e.” 41 Yesu oomusomeda ira: “Marta, Marta, unaakumbanya koma teto tanganisiwa na vyongo vinjinji. 42 Koma vyongo vyofuneya pivyoyeva, mwina teto yongo imo-i ba-i. Koma Mariya, usakula yongo yapama vinjinji moi kanaza awakiwa yongo inela.”