Olembiwa na Luka

20 Dambo limo-iliwa Yesu afunji-anga athu mukachisi koma teto lengeza uthenga wapama, ooza asembe alukulu, alembi limo-i na andimuwa 2 noza mufuka ira: “Niwandeleni, kodi mukaana ulamulilo opangela vyongo vyevi? Kapena ngu mbaani unoyo auva-ileni ulamulilo unola?” 3 Yesu oowasomeda ira: “Namiyene teto ndinoufukani yofuka imo-i moi mundisomede: 4 Kodi ubatizo unoyo Yohani apanga liye wali okumela udimu kapena wa athu?” 5 Eno aluwa koowambeela kambilana ira: “Naonga ira, ‘Wakumele udimu,’ liye unonifuka ira, ‘Nanga chifukwa n’ni kamwamuroromele?’ 6 Koma naonga ira, ‘Wakumele wa athu,’ athu etene anala kanonivocha mabwe, chifukwa aluwa kanororomela na murima wetene ira Yohani ali namaongela.” 7 Eno koosomeda ira katinaiziwa wewo wakumeleathu. 8 Yesu ooawandela ira: “Namiyene teto kandinauwandelani unoyo andiva-ile ulamulilo unoyo ndinapangela miyo vyongo vyevi.”

9 Ndiye liye oowambeela awandela athwayo fanizo loi: “Muthu m’mo-iwa oolima munda wa mphesa moi oou-iya m’mandani mwa alimae dowa uilambo imo-iwa wewo akalilewo liye wathawi indendai. 10 Ndiye thawi yo-anda vipaso ingakwakwanile, liye oomuruma kapolwae wa alimayo ira kadowe kamuva-e vimo-i mwa vipaso vyae. Koma alimayo koomuvaza nomuweli-a ookaana yongo. 11 Koma liye oomuruma teto kapolo m’mo-iwa. Unola teto koomuvaza nomupangela vyaibewe,* moi koomuweli-a ookaana yongo. 12 Liye oomuruma teto kapolwae wanaralu. Unola teto koomuvaza nomutamangi-a. 13 Vanduli viwa mwinyailo wa munda wa mphesoyo aongile ira, ‘Ndipange n’ni sopano? Ndinomuruma mwananga oomeliwana. Mookaikela mwananga eka unola kanodowa kamulemekeze.’ 14 Alimayo kangamuonile koowambeela kambilana ira, ‘Eyaa, ula ngunoyo unaze awachele cholowa. Tiyemoni nimuphe ira choloweyo ikale yee-u.’ 15 Eno aluwa koomu-inda nomukumi-a m’munda wa mphesoyo moi koomupha. Ndiye kodi mwinyailo wa munda wa mphesoyo unaza apanga n’ni na alimayo? 16 Liye unoza aze nowapha alimayo moi munda wa mphesoyo unoza aupeleke wa athu amo-iwa.”

Athwayo kangavwile vyevi kaongile ira: “Naari kavikale eno!” 17 Koma liye oowaing’anechecha noonga ira: “Vale malemba kanaonga ira, ‘Libwe lelo omanga nyumba kalikoondileathu, likala libwe lavakona lofuneya vinjinji.’ Kodi mawu anala kanatapulela n’ni? 18 Muthu uliwetene unoyo unaze amorele valibwe leli unoza aphwanyeye. Moi muthu uliwetene unoyo libwe leli linazeathu limumorele, unoza anyenyeye.”

19 Alembi na asembe alukulu kangavwile fanizo leli, koozindikila ira fanizolo linaonga vya aluwa, eno kooesaesa fwanya mpata ira kamu-inde vathawi ineyo, koma kaova athu. 20 Ndiye kangaonile mwemo Yesu mwapangela liye vyongo, koowaruma aganyo mwaisisi ira kavioni-e ngati olungama, na yolinga yoi kamufwanyele vifukwa va vyevyo unaonge liye, ira kadowe kamupeleke uboma na wa bwanamkubwa. 21 Eno aluwa koomufuka ira: “Mphunzisi, ninoiziwa ira vyevyo munaonga nyo nofunji-a pivyolondola moi kamun’na sakulo, koma munofunji-a mundila ya Mulungu mogwilizana na choonadi. 22 Kodi pivyololeya* ira iyo nipelekenga sonkho wa Kaisara kapena kanipelekenga?” 23 Koma Yesu oozindikila chinyengo iwa moi ooawandela ira: 24 “Ndioni-eni ndalama ya dinari.* Kodi kove na mawu anayo kali vevala pi vya mbaani?” Aluwa koosomeda ira: “Pi vya Kaisara.” 25 Liye ooawandela ira: “Eno pelekani vyongo vya Kaisara wa Kaisara, koma vya Mulungu vipelekeni wa Mulungu.” 26 Aluwa koolepela mufwanyela vifukwa va vyevyo aongile liye vamaso va athu, koma koodabwa na mwemo mwasomedele liye moi koosauwela yoonga.

27 Koma Asaduki amo-iwa, anayo kataroromela ira okhwa kanoza kavenyi-iwe, kooza wa Yesu nomufuka ira: 28 “Mphunzisi, Mose oonilembela ira, ‘Akala lombwana ukhwile nomu-iya iyanae aanamubalele a-ima, nchimwenae wa lombwanoyo unafuneya mutela iyana wamasiyeyo nomubalela a-ima nchimwenae unoyo ukhwileyo.’ 29 Ndiye vookala alombwana 7 avaibali. Owambeela ootela iyana, koma liye ookhwa aanabale a-ima na iyanoyo. 30 Lombwana wanambili teto oomutela koma ookhwa aanabale a-ima. 31 Vanduli viwa wanaralu oomutela. Vyooireya teto chimozimozi wa alombwana etene 7, etene kookhwa kaanabale a-ima na iyanoyo. 32 Vogomi-eda viwa naliyene teto iyanoyo ookhwa. 33 Kodi alombwanala, kaza kavenyi-iwa iyanola unaza akala wa mbaani? Voi etene 7 koomutela.”

34 Yesu oowasomeda ira: “A-ima amuthawiila* kanotela noteliwa. 35 Koma athu anayo kaoniwe ira mbofwanelela za fwanya moyo vathawi ineyo noza venyi-iwa wa okhwa katinaza katela kapena teliwa. 36 Koma teto aluwa katinaza kakhwa, chifukwa kanaza kakala ngati angelo. Aluwa kanoza kakale a-ima a Mulungu chifukwa yoi kovenyi-iwa wa okhwa. 37 Koma vyoi okhwa kanovenyi-iwa ngakale Mose oofotokoza mukhani ya takuru la minga, vevo aongile liye ira Yehova* ngu ‘Mulungu wa Aburahamu, Mulungu wa Isaki na Mulungu wa Yakobo.’ 38 Liye ngu Mulungu wa athu amoyo, o-okala okhwa, chifukwa wa liye* etene kokaana moyo.” 39 Vosomeda, amo-iwa mwa alembayo kaongile ira: “Mphunzisi, muonga pama.” 40 Aluwa kaongile vyevi chifukwa katawandile teto limba murima ira kamufuke yofuka imo-iwa.

41 Ndiye Yesu oowafuka ira: “Chifukwa n’ni athu kanaonga ira Kristu ngu mwana wa Davide? 42 Chifukwa Davideyo aongile ekave m’buku la Masalimo ira, ‘Yehova* oomuwandela Mbwiyanga ira: “Kala undanda langa lodjana 43 mpakana ndinga-elile adanawo vati va manyalwawo.”’ 44 Eno Davide oomuromola ira Mbwiye. Ndiye vinawandeya avi ira akale mwanae?”

45 Vathawi ineyo athu etene kamuvuruwanaathu, liye ooawandela ofunjedae ira: 46 “Enjelani na alembi anayo kanaomeliwa endaenda kangawarile mikanjo koma teto kanoomeliwa va-iwa moni m’misika. M’masunagoge aluwa kanoomeliwa garati m’mipando dausogolo* koma teto m’maphwando aluwa konoomeliwa garati vamalo olemekezeya vinjinji. 47 Aluwa kanowaka chuma ya a-iyana amasiye teto kanopeleka mapempelo olapa vinjinji vofuna ira athu kaaone.* Athu anala kanoza kawachele ilango yovoreya vinjinji.”*