Olembiwa na Maliko

16 Dambo la Sabata lingavirile, Mariya wawu Magadala, Mariya m’mae wa Yakobo na Salome koogula vyonukeli-a ira kadowe kazoli-e thuthu la Yesu. 2 Mamawa vinjinji va dambo lowambeela la mulunguyo, aluwa koofiya umandawo* zuwa lingakumile. 3 Aluwa koofukana ira: “Mbaani unoyo unadowe anichosele libwe va mulango wa mandale?” 4 Koma kangaing’anechechile, koowona ira libwelo loochosiwavo wale ngakale ira lali lilukulu vinjinji. 5 Kangavolowile m’mandamo, koomuona zombwe angagaratile umbali ya undanda lodjana, angawarile mkanjo owela moi aluwa koodabwa vinjinji. 6 Liye ooawandela ira: “Kamudabwe. Ndinoiziwa ira munamusaela Yesu Mnazareti, unoyo aphiwe vopachikiwa vatengo. Liye uvenyi-iwa wa okhwa, moi muno kalimo. Kaonani vevo agonati-iwe liye. 7 Eno nyo dowani mwaawandele ofunjedae koma teto Petulo ira, ‘Liye usogola dowa wu Galileya. Munodowa mwamuone wewo mogwilizana na vyevyo auwandelileni liye.’” 8 Aluwa kangakumile m’mandamo koowambeela tawa kangurumedanga koma teto kaovanga vinjinji. Moi katawandelile muthu uliwetene vyevyo vyaireile chifukwa yoi koowova vinjinji.*