Olembiwa na Luka
14 Vathawi imo-iwa, Yesu oodowa dja unyumba ya m’mo-i wa asogoleli a Afarisi va dambo la Sabata moi athu anayo kali m’mbamo koomuing’anechecha. 2 Vasogolo vae vookala muthu unoyo abulela marenda ozimba manda na mendo.* 3 Yesu angamuonile muthuyo, oowafuka athu oiziwa Ilamulo koma teto Afarisayo ira: “Kodi pivyololeya muchili-a muthu obulela va dambo la Sabata?” 4 Koma aluwa katamusomedile iliyetene. Vingairile eno liye oomu-inda muthuyo nomuchili-a moi oomuwandela ira adowenga waniwa. 5 Ndiye Yesu oowafuka ira: “Mbaani wa nyo unoyo mwanae kapena ng’ombae ingamorele mu isime va dambo la Sabata, kanaichosemo thawi ineyo?” 6 Koma aluwa katamusomedile iliyetene.
7 Yesu angaonile ira athu anayo kaitaniwe kanasakula malo olemekezeya vinjinji, liye ooawandela fanizo loi: 8 “Muthu auitanela uphwando la ukwati, kugarati vamalo olemekezeya vinjinji. Mwina muthu unoyo uuitanileyo umuitana teto muthu m’mo-iwa olemekezeya vinjinji ukwaranya weyo. 9 Ndiye muthu unoyo uuitanileyo unokoza za uwandela ira, ‘Venyavo veva ira ndimuwola agarativo.’ Vyera eno unovenyavo mwa manyazi dowa garati munduli vinjinji. 10 Koma waitaniwa uphwando, udowe wagaratinga munduli vinjinji, ira muthu unoyo uuitanileyo afiya aze auwandele ira, ‘Fwangawe garati vamalo olemekezeyala.’ Vyera eno unoza ulemekezeye vinjinji vamaso va athu etene anayo kaitaniwe va phwandolo. 11 Chifukwa muthu uliwetene unoyo unavikuza unoza atiti-iwe, koma uliwetene unoyo unaviyevi-a unoza agweli-iwe.”
12 Vanduli viwa Yesu oomuwandela muthu unoyo amuitanile ira: “Wapanga phwando, kuitanenga afwawo, achimwenawo, kapena abalawo, kapena athu olemela anayo kanakala vakwikwi na weyo. Mwina thawi imo-iwa aluwa kanoza kauitane moi kanaza kakala ngati kanaauweli-eda vyevyo waapangelewe. 13 Koma wapanga phwando, uitanenga athu osauwa, orangala, na o-oona. 14 Wapanga eno unoza ukale osangalala chifukwa aluwa katin’na yongo ira kaze kauweli-ede. Koma weyo Mulungu unoza auweli-ede athu olungama kaza kavenyi-iwanga.”
15 Angavwile vyevi, m’mo-i wa alendo afwae oomuwandela ira: “Osangalala ngu muthu unoyo unaze adje yodja* mu Umwene wa Mulungu.”
16 Yesu oomuwandela ira: “Muthu m’mo-iwa oopanga phwando lilukulu la yodja ya mazulo moi ooitana athu anjinji. 17 Thawi yodja ingakwakwanile, oomuruma kapolwae dowa awandela athu anayo kaitaniwayo ira, ‘Tiyemoni, chifukwa vyongo vyetene vimala sakaediwa.’ 18 Koma etene koowambeela peleka vifukwa vyokoondela. Owambeela oomuwandela ira, ‘Miyo ndigula munda moi ndinafuna ndidowe ndauone. Pepani kandinakwakwani-a dowawo.’ 19 M’mo-iwa aongile ira, ‘Miyo ndigula ng’ombe 10 moi ndinafuna ndidowe ndaone mwemo dina-indelengaathu chito. Pepani kandinakwakwani-a dowawo.’ 20 Koma teto m’mo-iwa aongile ira, ‘Miyo ndikede tela wene, eno kandinakwakwani-a dowawo.’ 21 Eno kapoloyo oowela dowa onga vyevi wa mbwiyae. Ndiye mbwiyaeyo angavwile vyevi oolunduwa vinjinji moi oomuwandela kapolwaeyo ira, ‘Dowa mombaraanya m’misewu dilukulu na ding’onong’ono da mu mzindola, udowe waaitane athu osauwa, o-oona koma teto orangala, nowazana uno.’ 22 Kapoloyo angafiile aongile ira, ‘Mbwiyeni, ndipanga vyetene vyevyo mwandiwandelile nyo, komave malo ko-ala,’ 23 Ndiye mbwiyaeyo oomuwandela ira, ‘Dowa m’misewu da mu mzindola moi udowe waalimbikise athu ira kaze uno na yolinga yoi nyumbangela izaale na athu. 24 Chifukwa ndinauwandelani ira, kavali ngakale muthu m’mo-i mwa athu anayo kaitaniwale unoyo unaze alawe yodja yanga ya mazulo.’”
25 Gulu lilukulu la athu laenda limo-i na Yesu moi liye ootembenuwa noawandela ira: 26 “Muthu unoyo unafuna kala o-arelanga unafuneya ndiomeliwana vinjinji kwaranya babae, m’mae, iyanae, a-imae, achimwenae koma teto arongolae, ngakale teto moywae. 27 Muthu uliwetene o-otukula tengwae ozuzumelavo* nondi-arela kanakale ofunjedanga. 28 Mwaisazo, ngu mbaani wa nyo unoyo afunanga manga sanja kanaambeela garati nowelengela ndalama dedo unaze liye aononge, ira aone akala un’na ndalama dokwakwanela mari-ana sanjeyo? 29 Akala kanapange eno, liye unokoza ambeela imanga koma lepela imari-a moi athu etene anayo kaonile vyevi kanokoza ambeela muteya 30 noonganga ira: ‘Muthula oowambeela manga pamapama, koma ulepela imari-a.’ 31 Kapena ngu mwene uuvi, unoyo afunanga dowa ukondo dowa limbana na mwene m’mo-iwa, kanaambeela ganizela mofaasa akala asilikalae 10 000 kanawande limbana na asilikali 20 000? 32 Koma aona ira kanakwakwani-a, mombaraanya unotumiza osogolelae wa mweneyo aanafiye vakwikwi, dowa garati-a murendele. 33 Mofwanafwana na vyevi, muthu kanakale ofunjedanga, akala kana-iye vyongo vyae vyetene.
34 Onga vyoona, mwinyu ngwapama. Koma akala mwinyuyo umalile kopolo, kodi kopolwiwa inaweli-ediwe avi? 35 Kai ofwanelela u-ela muteya kapena m’manyowa. Athu kanoutatila unde. Muthu unoyo un’na mabaru, avwe.”