Olembiwa na Luka

9 Vanduli viwa Yesu oosonkani-a anamarumiwa 12 nowava-a kopolo ira kakumi-enga viwanda vyetene koma teto ira kachili-enga marenda. 2 Ndiye oowatumiza ira kadowe kalaleelenga vya Umwene wa Mulungu koma teto chili-a athu. 3 Liye ooawandela ira: “Kamulande yongo va ulendola, kaya imwiri, thumba la yodja, mkate, ndalama kapena malaya amo-iwa oenjedela. 4 Mwafiya vande va muthu, mukalenga vandevo mpakana thawi yodowa ingakwakwanile. 5 Uliwetene wewo athu katinauwachelani, mwakumanga mu mzindoyo mutatenga tumbulu umanyalwinyu ira ukale umboni wa aluwa.” 6 Eno aluwa kooenda m’madela etene nolengezanga uthenga wapama koma teto chili-a athu.

7 Sopano Herodi,* olamulela igawo ya Yudeya,* oovwa vyetene vyevyo vyaireya. Liye oomaliwa zelu chifukwa athu amo-iwa kaonga ira Yohani uvenyi-iwa. 8 Koma athu amo-iwa kaonga ira Eliya uoneela. Amo-iwa teto kaonga ira m’mo-i wa anamaongela awale uvenyi-iwa. 9 Ndiye Herodi aongile ira: “Yohani ndoomuphaza muru. Nanga ngu mbaani unoyo unapanga vyevyo ndinavwa miyovi?” Eno liye oofunechecha angamuonile.

10 Anamarumiwale kangawelilewo koomufotokozela Yesu vyongo vyetene vyevyo kapangileathu. Eno liye oowalanda adowana umalo aekiwa mu mzinda oromoliwa Betisaida. 11 Koma gulu la athu looiziwa vyevi moi loomu-arela. Yesu ooawachela pama nowambeela awandela vya Umwene wa Mulungu, moi oochili-a athu anayo kabulela. 12 Koma mazulo anamarumiwae 12 kooza wa liye moi kaongile ira: “Uno kuundendai na athu moi thawi imala, awandeleni athwala ira kamaruwe, kadowe manyumba avakwikwi ira kadowe kafwanye malo ogona koma teto ira kadowe kagule yodja yoi kadje.” 13 Koma liye oowasomeda ira: “Nyo muwava-e yodja.” Aluwa kaongile ira: “Iyo kanin’na yongo iliyetene koma nikede kaana mikate 5 na somba mbin’li doka. Kapena nidowe nagule yodja yokwakwanela athu etene anala.” 14 Vamalovo vookala alombwana otamangela 5 000 moi Yesu ooawandela ofunjedae ira: “Awandeleni athwala ira kagarati m’magulu a athu 50.” 15 Ofunjedayo koopanga vyevyo, moi athu etene koogarati. 16 Vanduli viwa liye oolanda mikate 5 na somba mbin’li dile moi ooing’ana udimu nopempela. Angapangile eno oomeyameya mikatedo nowava-a ofunjedae ira kaagawele athwayo. 17 Eno athu etene koodja norumbala, moi koododela madengo 12 ozaala a mikate dedo da-alile.

18 Vathawi imo-iwa vevo apempela liye vaekave, ofunjedae kooza wa liye. Ndiye liye oowafuka ira: “Kodi athu kanaonga ira ndili mbaani?” 19 Aluwa koomusomeda ira: “Athu amo-iwa kanaonga ira muli Yohani M’batizi, amo-iwa kanaonga ira muli Eliya, koma amo-iwa kanaonga ira muli m’mo-i wa anamaongela awale.” 20 Eno liye ooawafuka ira: “Nanga nyo munaganiza ira ndili mbaani?” Petulo oosomeda ira: “Muli Kristu wa Mulungu.” 21 Ndiye liye oowalangiza mwakopolo ira katimuwandele muthu uliwetene vyevyo. 22 Vanduli viwa liye aongile ira: “Mwana wa muthu unafuneya gumana na mavuto anjinji koma teto unafuneya koondiwa na andimuwa, asembe alukulu na alembi. Moi unoza aphiwe, koma va dambo lanaralu unoza avenyi-iwe.”

23 Vanduli viwa ooawandela athu etene ira: “Akala muthu unafuna ndi-arela, avikoonde ekave teto atukule tengwae ozuzumelavo* moi apitilize ndi-arela dambo na dambo. 24 Chifukwa muthu uliwetene unoyo unafuna vulumucha moywae unoza autatile, koma uliwetene unoyo unatatila moywae chifukwa ya miyo unoza aufwanye. 25 Kodi muthu unapindule n’ni akala unafwanye vyongo vyetene vya muilambwela koma tatila moywae kapena viporecha? 26 Chifukwa muthu uliwetene opanga manyazi na miyo koma teto mawanga, Mwana wa muthu teto unoza apange manyazi na liye aza azanga mu ulemelelwae, wa Babae na wa angelo owela. 27 Koma ndithu ndinaauwandelani ira, amo-iwa mwa athu anayo kaimelile vano katinaza kakhwa mpakana yowambeela kangaonile Umwene wa Mulungu.”

28 Vangavirile malambo otamangela 8 kumela vevo aongile liye mawu anala, liye oomulanda Petulo, Yohani na Yakobo agwelana m’mwango dowa pempela. 29 Vevo apempela liye, kovae yoochenja moi vyowara vyae vyoowela vinjinji koma teto vyoojerimela. 30 Ndiye voowoneya Mose na Eliya kakambilananga na liye. 31 Aluwa koowoneela na ulemelelo moi koowambeela kambilana vya mwemo Yesu unaze liye avenyelevo vailambwela, vyongo vyevyo vyali vinga-alile vang’ono ireela wu Yelusalemu. 32 Vathawi ineyo vyevi vyaireyaathu Petulo na afwae kali kagonanga. Koma kangarurumuwile, koowona ulemelelo wa Yesu koma teto koowona alombwana ambin’li anayo kaimelile limo-i na liye. 33 Ndiye vevo alombwanala kadowaathu, Petulo oomuwandela Yesu ira: “Mphunzisi, vinokala pama ira iyo nikalenga vano. Tiyemoni nimange matenti maralu vano, imo-i yeenyu, imo-iwa ya Mose na imo-iwa ya Eliya.” Koma vathawi ineyo Petulo aonga liye mawu anala kaazindikila vyevyo aonga liye. 34 Vevo aonga liye mawu anala, ooza murambo unoyo waapimbile. Muramboyo ungaapimbile, aluwa koowova vinjinji. 35 Ndiye voovweya mawu kumela m’murambomo oyi: “Ula ngu Mwananga, unoyo ndamusakulile miyo. Mumuvwelenga.” 36 Vevo mawayo kavweyaathu, aluwa koowona ira Yesu uli ekave. Koma aluwa kataongile iliyetene moi katamuwandelile muthu uliwetene vyevyo kaonileathu.

37 Dambo lo-arela, kangatitile m’mwangomo, gulu la athu loomuchingamela. 38 Muthu m’mo-iwa unoyo ali mugululo ookuwa ira: “Mphunzisi, ndinauvepani ira mudowe mwamukami-e mwananga walombwana, chifukwa ndin’na mwana m’mo-ive unoyo. 39 Zimu wamu-inda, liye unowambeela kuwa, moi vanduli viwa unomupangi-a ira aphuphe akumi-anga lipweru muwano. Zimula unomuporecha vinjinji moi vinorucha ira umu-iye. 40 Ndoowavepa ofunjedinyu ira kakumi-e zimuyo koma koolepela.” 41 Yesu oosomeda ira: “Nyo athu otakala na ookaana iroromelo, kodi ndinakalave na nyo mpakana alini? Ndipitilizeve uvilelani mpakana alini? Muzenani uno mwaninyuyo.” 42 Koma vevo kamuzanaathu zombweyo, iwandeyo yoomupangi-a ira agwe vati koma teto yoopangi-a ira aphuphe mwakopolo. Yesu oonyanyuwela zimu otakaloyo nomuchili-a zombweyo moi oomupeleka wa babae. 43 Athu etene koodabwa na kopolo dodabwi-a da Mulungu.

Vevo athwayo kadabwaathu na vyongo vyetene vyevyo Yesu apanga liye, liye ooawandela ofunjedae ira: 44 “Vuruwanani mosamala teto muumbuwelenga mawu ala: Mwana wa muthu unoza apelekiwe m’mandani mwa athu.” 45 Koma ofunjedayo katavwechechile vyevyo aawandelile liye. Tapulela wa mawayo wali obiseya wa aluwa ira katizindikile moi aluwa koowova mufuka tapulela wa mawu anala.

46 Vanduli viwa ofunjedayo koowambeela kangana vyokuza unoyo ali mulukulu vaari viwa. 47 Yesu angaiziwile vyevyo kaganizaathu m’murimani mwiwa, oomulanda mwana n’ng’onong’ono nomuimecha vaari viwa. 48 Ndiye ooawandela ira: “Muthu uliwetene unoyo umuwachelile mwana n’ng’onong’ono ngati unola muzina langa undiwachela teto miyo. Moi uliwetene unoyo undiwachelile miyo umuwachela teto unoyo andirumile. Chifukwa uliwetene unoyo unapanga vyongo ngati mwana n’ng’onong’ono unola vaari vinyu ngunoyo uli mulukulu.”

49 Vanduli viwa Yohani oomuwandela Yesu ira: “Mphunzisi, iyo noomuona muthu m’mo-iwa akumi-anga viwanda muzina linyu ndiye noomuwandela ira a-iye, chifukwa yoi kanaenda na iyo.” 50 Koma Yesu oomuwandela ira: “Kamumuruni-e chifukwa muthu unoyo kanaruni-ana na nyo, uli umbalinyu.”

51 Malambo oyi Yesu adowe udimu kangaandamele,* liye oosimikiza m’murimani mwae ira adowe wu Yelusalemu. 52 Eno liye ooruma ofunjedae ira kasogole. Aluwa koovolowa mu mzinda wa Samariya ira kadowe kasakaede malo oyi afiyelevo. 53 Koma Asamariya katamuwachelile paama chifukwa oosimikiza m’murimani mwae ira adowe wu Yelusalemu. 54 Yakobo na Yohani kangaonile vyevi, kaongile ira: “Mbwiyeni, kodi munafuna ira niaitanele mulo kumela udimu ira uwatumeye?” 55 Koma liye ootembenuwa nowasumulula. 56 Eno Yesu na ofunjedae koodowa udela limo-iliwa.

57 Ndiye kangali vaulendoyo, muthu m’mo-iwa oomuwandela Yesu ira: “Ndinou-arelani uliwetene wewo munadowe nyo.” 58 Koma Yesu oomuwandela ira: “Akhandwe kookaana maphangiwa okala, teto mbalame damulengalenga dikaana thunji diwa, koma Mwana wa muthu kan’na nyumbae.” 59 Vanduli viwa oomuwandela muthu m’mo-iwa ira: “Ukale o-arelanga.” Koma muthuyo aongile ira: “Mbwiyeni, ndiloleni ira ndiambeele dowa nda-ele malilo a babanga.” 60 Yesu oomuwandela ira: “Uwa-iye okhwa, ka-ele okhwa afwiwa, koma weyo udowe walengeze vyokuza Umwene wa Mulungu uliwetene.” 61 Muthu m’mo-iwa teto aongile ira: “Mbwiyeni, miyo ndinou-arelani koma mundilole ira ndiambeele dowa ndaasazike athu am’banja langa.” 62 Yesu oomuwandela ira: “Muthu uliwetene o-inda imba ya pulawo noing’ananga vyongo vya munduli kanafwanelela Umwene wa Mulungu.”