Olembiwa na Maliko
3 Yesu oovolowa nawili musunagoge moi mwemo mookala muthu orangala ndanda. 2 Ndiye Afarisi koowambeela muing’anechecha Yesu ira kaone akala unamuchili-e muthuyo va dambo la Sabata na yolinga yoi kamuimbe mulandu. 3 Ndiye Yesu oomuwandela muthu orangala ndandoyo ira: “Venya, kaza vaariva.” 4 Vanduli viwa oowafuka ira: “Kodi malamulo kanalola panga n’ni va dambo la Sabata, panga yongo yapama kapena yotakala? Vulumucha moyo kapena pha?” Koma katasomedile iliyetene. 5 Yesu oowaing’anechecha molunduwa moi oovwa chisoni vinjinji chifukwa youma murima uwa. Vanduli viwa oomuwandela muthuyo ira: “Tapula ndanda lawo.” Liye oolitapula moi ndandalo lookala pama. 6 Afarisayo kangaonile vyevi kookuma vande dowa kambilana na athu anayo kamu-arela Herodi ira kamuphe Yesu.
7 Koma Yesu limo-i na ofunjedae koovenyawo wewo dowa unyanja moi athu anjinji okumela wu Galileya na wu Yudeya koomu-arela. 8 Ngakale teto athu anjinji okumela wu Yelusalemu, wu Idumeya, ukombela imo-iwa ya nyanja ya Yorodano koma teto okumela m’madela a wu Turo na Sidoni, koovwa vyetene vyevyo apanga liye moi kooza wa liye. 9 Moi liye ooawandela ofunjedae ira kazena ngalawa ing’onong’ono ira agwelemo na yolinga yoi athwayo katimupanikize. 10 Voi ali angachili-ile athu anjinji, athu etene anayo kan’na marenda alukulu kooza wa liye ira kakede mu-inda. 11 Ngakale teto athu anayo kan’na mizimu dotakala kamuona, koogwa vamaso vae moi mizimudo daonga ira: “Nyo muli Mwana wa Mulungu.” 12 Koma moweli-edaweli-eda liye oolamula mwakopolo mizimu dotakalado ira kadimuulule.
13 Vanduli viwa oogwela umwango nowaitana athu anayo aafuna liye moi aluwa koodowa wa liye. 14 Ndiye oosakula athu 12, anayo aava-ile liye zina loi anamarumiwa, ira kaendenga limo-i na liye thawi detene koma teto ira aarumenga dowa laleela 15 moi oowava-a kopolo ira kakumi-enga viwanda.
16 Va athu 12 anayo aasakulile liye vookala Simoni, unoyo amuva-ile liye zina loi Petulo, 17 Yakobo mwana wa Zebedayo na Yohani nchimwenae wa Yakobo (athu ambin’li anala oowava-a teto zina loi Boanege, lelo linatapulela “A-ima a Bingu”), 18 Andreya, Filipo, Batolomeyo, Mateyu, Tomasi, Yakobo mwana wa Alifeyo, Tadeyo, Simoni Kananiya,* 19 na Yudasi Isikariyoti unoyo vanduli viwa amupelekile Yesu.
Vanduli viwa Yesu oovolowa m’mba. 20 Wewo teto ooza athu anjinji, moi Yesu na ofunjedae katafwanyile thawi ira kadje. 21 Koma abalae kangavwile vyevi, koodowa ira kamu-inde chifukwa aluwa kaonga ira: “Upenga misala.” 22 Koma teto alembi anayo kakumele wu Yelusalemu kaonga ira: “Ukaana Belezebule,* moi unakumi-a viwanda na kopolo da olamulela viwanda.” 23 Eno angaaitanile athwayo, oowonga na aluwa vo-indi-eda chito mafanizo ira: “Kodi Satana unamukumi-e avi Satana? 24 Akala umwene ugawaneile, umwenoyo kunakalevo wathawi indendai. 25 Koma teto akala nyumba igawaneile, inogumuwa. 26 Mofwanafwana na vyevi, akala Satana uviukele ekave moi ugawaneya, kanakalevo wathawi yolapa, koma ukede ala vang’ono mala. 27 Onga vyoona, kalivo unoyo unavolowe m’mba mwa muthu wakopolo noba katundwae, akala yowambeela kanamumanga muthu wakopoloyo. Era eno pavevo unawande liye tukula katundu m’mbamo. 28 Ndithu ndinaauwandelani, a-ima a athu kanoza kakululukeliwe vyongo vyetene, kaya machimo anayo kapangileathu kapena mawu onyoza anayo kaongileathu. 29 Koma muthu uliwetene unoyo unyozile zimu owela kanaza akululukeliwa mpakana walewale, koma unoza akaena mulandu wa chimo lo-omala.” 30 Yesu oowonga vyevi chifukwa aluwa kaonga ira: “Ukaana zimu otakala.”
31 Sopano m’mae na achimwenae kooza noimela vande moi koomuruma muthu ira adowe amuitane. 32 Gulu la athu loogarati momurungunuwa moi athwayo koomuwandela ira: “M’minyu na achimweninyu kali vandeva kanaaufunani.” 33 Koma liye oowasomeda ira: “Kodi m’manga na achimwenanga mbaani?” 34 Vanduli viwa ooing’ana athu etene anayo kagaratile momurungunuwa noonga ira: “Kaonani! M’manga na achimwenanga mbala. 35 Muthu uliwetene unoyo unapanga vyevyo Mulungu unafuna liye, unoyo ngu nchimwenanga, murongolanga koma teto m’manga.”