Olembiwa na Mateyu

21 Kanga-alile vang’ono fiya wu Yelusalemu koofiya wu Betefage va Mwango wa Maolivi. Ndiye Yesu ooruma ofunjedae ambin’li. 2 Liye ooawandela ira: “Dowani mudela lelo munaliona nyo. Wewo munodowa mwafwanye bulu kangam’mangelele limo-i na mwanae wapongo. Mudowe mwaamasule muwazena wa miyo. 3 Muthu aufukani muonge ira, ‘Mbwiye unaafuna.’ Thawi ineyo liye unoulolani ira muwazena uno.”

4 Vyevi vyooireya na yolinga yoi vyevyo Mulungu aongile liye zela mwa namaongela vikwakwaneli-ediwe. Liye aongile ira: 5 “Muwandeleni mwana wa-iyana wa Ziyoni* ira: ‘Kaona! Mwenawo unaaza wa weyo. Liye ngofaasa moi ugwela mwana wa bulu wapongo, mwana wa iweto yotukula katundu.’”

6 Eno ofunjedayo koodowa moi koopanga mogwilizana na vyevyo Yesu aawandelile liye. 7 Aluwa koomuzana bulule limo-i na mwanae wapongo. Vanduli viwa koo-ela malaiwa aunde vamithana da abulwayo moi liye oogwela vathana va mwana wa buluyo. 8 Athu anjinji anayo kali vevo kootandela malaiwa aunde musewu moi athu amo-iwa kookotola thambi da mitengo nodi-ela musewu. 9 Koma teto gulu la athu lelo lali usogolo wae na munduli mwae lali likuwanga ira: “Muvulumucheni Mwana wa Davide! Odalisiwa ngu liye unoyo unaza muzina la Yehova! Muvulumucheni nyo anayo muli udimu!”

10 Angavolowile mu mzinda wa Yelusalemu, athu etene a mu mzindoyo koodabwa moi amo-iwa koofuka ira: “Kodi unola ngu mbaani?” 11 Gulu la athulo loosomeda ira: “Unola ngu namaongela Yesu, okumela wu Nazareti, wu Galileya!”

12 Vanduli viwa Yesu oovolowa mukachisi notamangi-a athu etene anayo kaguli-a koma teto anayo kagula vyongo mukachisimo, teto oogubuducha matebulo a athu anayo kachenja ndalama koma teto mipando da athu anayo kaguli-a kangaiwa. 13 Liye ooawandela ira: “Malemba kani, ‘Nyumbanga inoza iromoliwe nyumba yopempelelamo,’ koma nyo muichenja kala malo ovitalelamo mambava.” 14 Vanduli viwa athu anayo kan’na vuto lo-oona koma teto athu orangala kooza wa liye mukachisi moi oowachili-a.

15 Asembe alukulu na alembi kangaonile vyodabwi-a vyevyo Yesu apangile liye koma teto kangaonile azombwe anayo kakuwa mukachisimo ira, “Muvulumucheni Mwana wa Davide!” koolunduwa vinjinji 16 moi koomufuka ira: “Kodi unovwa vyevyo athu kanaongaathuvi?” Yesu oowasomeda ira: “Ee ndinovwa. Kodi nyo kamuwelengilevo mawu oyi, ‘Mupangi-a ira muwano mwa a-ima na mwa a-ima okeda baliwa wene mukume mawu otamanda’?” 17 Vanduli viwa liye oovenyamo mu mzindoyo nodowa wu Betaniya moi oogona wewo.

18 Vevo awelela liye wu Yelusalemu mamawa vinjinji, ookaana ndala. 19 Vanduli viwa oowona tengo wa nankuyu m’mbali mwa sewu moi angadowile vevo, kaafwanyilemo ipaso iliyetene koma matakuru oka. Eno oowandela tengoyo ira: “Ambeela peeno kunaza ubala ipaso iliyetene.” Moi tengoyo oouma thawi ineyo. 20 Ofunjedale kangaonile vyevi, koodabwa noonga ira: “Viwandeile avi ira tengo wa nankuyula uume thawi inela?” 21 Yesu oowasomeda ira: “Ndithu ndinaauwandelani, akala mun’na iroromelo teto akala kamunakaikela, munoza mupange vyevyo ndipangile miyo na tengo wa nankuyula. Koma teto kwaranya veva, munoza muwande wandela mwangola ira, ‘Venyavo vano udowe wavivoche munyanja,’ moi vinoza viireye. 22 Vyongo vyetene vyevyo munaze nyo muvepe m’mapempelwinyu, munoza muwachele akala mun’na iroromelo.”

23 Vanduli viwa Yesu oovolowa mukachisi moi vevo afunji-a liye, asembe alukulu koma teto andimuwa kooza wa liye nomufuka ira: “Kodi mukaana ulamulilo opangela vyongo vyevi? Nanga ngu mbaani unoyo auva-ileni ulamulilo unola?” 24 Yesu oowasomeda ira: “Namiyene teto ndinoufukani yongo imo-i. Mwandisomeda yongo ineyo, namiyene teto ndinouwandelani unoyo andiva-ile ulamulilo unoyo ndinapangela miyo vyevi: 25 Kodi ubatizo unoyo Yohani apanga liye wakumele waani? Wa Mulungu kapena wa athu?” Koma aluwa koowambeela kambilana ira: “Naonga ira, ‘Wakumele udimu,’ liye unonifuka ira, ‘Nanga chifukwa n’ni kamwamuroromele?’ 26 Koma teto kaninaonge ira, ‘Wakumele wa athu,’ chifukwa ninaova gulu la athuli, voi etene anala kanororomela ira Yohani ali namaongela.” 27 Eno aluwa koomusomeda Yesu ira: “Kaninaiziwa.” Naliyene teto ooawandela ira: “Namiyene teto kandinauwandelani unoyo andiva-ile ulamulilo unoyo ndinapangela miyo vyongo vyevi.

28 Kodi munaganiza avi? Muthu m’mo-iwa ookaana a-ima ambin’li. Ndiye oodowa wa mwana owambeela nomuwandela ira, ‘Mwananga, peeno udowe wa-inde chito umunda wa mphesa.’ 29 Liye oosomeda ira, ‘Kandinadowawo,’ koma vanduli viwa oochenja maganizo moi oodowawo. 30 Vanduli viwa oodowa wa mwanae wanambili nomuwandela teto chimozimozi. Liye oosomeda ira, ‘Ndinodowawo babani,’ koma kaadowilewo. 31 Liye oowafuka ira, ‘Ngu mbaani mwa a-ima ambin’lala unoyo apangile vyevyo babae afuna liye?’” Aluwa koomusomeda ira: “Mwana owambeeloyo.” Yesu ooawandela ira: “Ndithu ndinaauwandelani ira, okomi-a misonkho koma teto mahule kanou-iyani munduli dowa volowa mu Umwene wa Mulungu. 32 Chifukwa Yohani ooza wa nyo za ufunji-ani ndila yachilungamo, koma nyo kamwamuroromele. Koma okomi-a misonkho na mahule koomuroromela. Ngakale ira nyo moowona vyevi, kamwachenjile maganizwinyu nowambeela muroromela.

33 Vuruwanani fanizo limo-iliwa: Vookala muthu m’mo-iwa unoyo alimile munda wa mphesa nomanga mpanda rungunuwa mundoyo. Koma teto ootimba zenje lonyingalelamo mphesa nomanga sanja. Angapangile eno oou-iya mundoyo m’mandani mwa alimi nodowa uilambo imo-iwa. 34 Thawi yochosa vipaso ingafiile, liye ooruma akapolwae wa alimayo ira kadowe kalande vipaso vyae. 35 Koma alimayo koo-inda akapolwale moi m’mo-i mwa aluwa koomuvaza, m’mo-iwa koomupha, teto m’mo-iwa koomuvocha na mabwe. 36 Liye ooruma teto akapolo amo-iwa anjinji kwaranya owambeelale, koma anala teto koowapangela chimozimozi. 37 Vogomi-eda viwa liye oomuruma mwanae, noonga ira, ‘Mwananga eka unola kanodowa kamulemekeze.’ 38 Alimayo kangamuonile mwanoyo koowambeela kambilana ira, ‘Eyaa! ula ngunoyo unaze awachele cholowa. Zani, tiyemoni nimuphe era eno nitukule cholowae!’ 39 Eno aluwa koomu-inda nomukumi-a m’munda wa mphesoyo moi koomupha. 40 Ndiye kodi mwinyailo wa munda wa mphesoyo aza, unaza aapangana n’ni alimayo?” 41 Aluwa koosomeda ira: “Chifukwa yoi aluwa mbotakala, unoza aaononge etene moi munda wa mphesoyo unoza aupeleke wa alimi amo-iwa, anayo kanamuva-enga vipaso munyengwiwa.”

42 Ndiye Yesu ooawandela ira: “Vale Malemba kani, ‘Libwe lelo omanga nyumba kalikoondileathu likala libwe lavakona lofuneya vinjinji. Libwe leli tilokumela wa Yehova moi tilodabwi-a m’maso mwi-u. Kodi kamuwelengile vyevi’? 43 Vachifukwa inela ndinauwandelani ira, Umwene wa Mulungu unoza uchosiwe wa nyo noupeleka wa athu anayo kanapanga vyevyo unafuna liye. 44 Koma teto muthu unoyo unaze amorele valibwe leli unoza aphwanyeye. Moi muthu uliwetene unoyo libwe leli linazeathu limumorele, unoza anyenyeye.”

45 Asembe alukulu na Afarisi kangavwile mafanizo anala, koozindikila ira liye unaonga vya aluwa. 46 Komave ngakale ira aluwa koofuna mu-inda ira kam’mange, katapangile vyevi voova gulu la athu, chifukwa athwayo koororomela ira liye ali namaongela.