Vyoira Vya Anamarumiwa
3 Sopano Petulo na Yohani koodowa volowa mukachisi ira kapempele, moi thawi yali 3 koloko tana.* 2 Ndiye vookala muthu m’mo-iwa unoyo abaliwe angali orangala. Dambo lililetene koomutukula dowa mugarati-a vakwikwi na mulango wa kachisi oromoliwa ira Mulango Ulukulu Oriya, ira avepenga mphaso dachifundo wa athu anayo kavolowa mukachisimo. 3 Muthuyo angamuonile Petulo na Yohani kavolowanga mukachisimo, oowambeela vepa ira kamuva-e mphaso dachifundo. 4 Koma Petulo na Yohani, koomuing’anechecha moi koomuwandela ira: “Niing’ane.” 5 Liye oowaing’anechecha, dedi-edanga ira kanomuva-a yongo. 6 Koma Petulo aongile ira: “Siliva na golide kandin’na, koma ndinouva-a yongo ineyo ndin’na miyo: Muzina la Yesu Kristu wawu Nazareti, ambeela enda!” 7 Angapangile eno oomu-inda ndanda la muono odjana moi oomuimecha. Thawi ineyo manyalo na mendo dae doochila. 8 Liye oolupha noimela moi oowambeela enda. Liye oovolowa limo-i na aluwa mukachisimo, aendanga, luphalupha koma teto atamandanga Mulungu. 9 Athu etene koomuona aendanga koma teto atamandanga Mulungu. 10 Aluwa koomuzindikila ira ngu muthu unoyo akala va Mulango Ulukulu Oriya wa vakachisi vepanga mphaso dachifundo. Moi athwayo koodabwa vinjinji na vyevyo vyamuireele.
11 Vevo muthuyo apitiliza liye enda na Petulo na Yohani, gulu letene la athu lootamangela wa aluwa vamalo oromoliwa ira Likhonde la Solomo, lidabwanga vinjinji. 12 Petulo angaonile vyevi, ooawandela athwayo ira: “Nyo Aisaraeli, chifukwa n’ni munadabwa na vyevi? Chifukwa n’ni munaniing’anechecha kalanga ngati nimuendi-ile na kopolo di-u kapena chifukwa yovipeleka wi-u wa Mulungu? 13 Mulungu wa Aburahamu, wa Isaki na wa Yakobo, Mulungu wa makolwi-u awale, ngunoyo umulemekezile Mtumikae Yesu, unoyo mwamupelekile nyo koma teto mukoonda vamaso va Pilato, ngakale ira Pilatoyo oofuna mumasula. 14 Onga vyoona, nyo moomukoonda muthu owela na olungama, moi moovepa ira aumasuleleni muthu opha athu. 15 Moomupha Mtumiki Mulukulu wa moyo, koma Mulungu oomuvenyi-a moi iyo nili mboni da khani inela. 16 Muthu unoyo munamuona nyo koma teto muiziwa uchila chifukwa ya zina la Yesu, chifukwa yoi iyo ninororomela zina lae. Iroromelo ineyo nin’na iyo va Yesu chineyo ipangi-ile ira muthula achile monga mwemo munaonela nyo. 17 Abalanga, ndinoiziwa ira moopanga vyongo mo-oiziwa, ngati mwemo teto olamulelinyu kapangeleathu. 18 Mwandila inela, Mulungu ukwakwaneli-eda vyevyo aongile liye wale zela mwa anamaongela etene ira, Kristu unoza avuteye.
19 Eno lapani notembenuwa ira machimwinyu kakululukiwe, koma teto ira nyengo dosisimula dize kumela wa Yehova.* 20 Koma teto ira amutumize Yesu, unoyo ngu Kristu osakuliwa chifukwa ya nyo. 21 Liye unafuneya pitiliza kala udimu mpakana vathawi yosakaeda vyongo vyetene, ineyo Mulungu aongile liye zela mwa anamaongelae owela awale. 22 Moi Mose aongile ira, ‘Yehova* Mulungwinyu unoza auva-eni namaongela ngati miyo kumela vaari va abalinyu. Muze mumuvwele va vyongo vyetene vyevyo unaze liye auwandeleni. 23 Muthu uliwetene unoyo kanaza amuvwela namaongeloyo, Mulungu unoza amuphe ira kakale teto vaari va athu.’ 24 Moi anamaongela etene, ambeela va Samueli mpakana anamaongela etene anayo kazide munduli mwae, koowonga moovira m’mbali vya malambo anala. 25 Nyo muli a-ima a anamaongela na a-ima a pangano lelo Mulungu apanganile liye na makolwinyu awale. Liye oomuwandela Aburahamu ira: ‘Zela mwa a-imawo,* mabanja etene a vailambo yavati kanoza kadalisiwe.’ 26 Mulungu angamusakulile Mtumikae, yowambeela oomutumiza wa nyo, ira aze audaliseni nokami-a uliwetene wa nyo ira a-iye chito dae dotakala.”