KALATA YODOWA WA AKRISTU AWU ROMA

1 Miyo Paulo kapolo wa Kristu Yesu, ndooitaniwa ira ndikale namarumiwa koma teto ndoosakuliwa ira ndilaleele uthenga wapama wa Mulungu. 2 Liye oolonjeza uthenga unola wale vinjinji zela mwa anamaongelae m’Malemba owela. 3 Uthengoyo unaonga vya Mwanae, unoyo abaliwele mufuko* la Davide, 4 moi Mulungu oomuvenyi-a Mwanaeyo vo-indi-eda chito kopolwae ya zimu owela. Mwana unola ngu Yesu Kristu Mbwii-u. 5 Zela mwa liye, Mulungu oonitonyi-eda oma murima ulukulu moi oondisakula kala namarumiwa ira ndidowe ndakami-e athu a mitundu detene na yolinga yoi kakaena iroromelo, kakale ovwela koma teto ira kalemekeze zina lae. 6 Moi nyo mooitaniwa vaari va athu a mitundu dimo-i ira mukale o-arela a Yesu Kristu. 7 Kalatela ndinaulembelani nyo etene anayo muli wu Roma anayo munatonyi-ediwa chikondi na Mulungu, koma teto anayo mwaitaniwe ira mukale owela:

Mukale nooma murima ulukulu koma teto murendele okumela wa Mulungu Babi-u na Mbwii-u Yesu Kristu.

8 Yowambeela, ndinomuyamikela Mulungwanga zela mwa Yesu Kristu chifukwa ya etene nyen’ne, moi athu vailambo yetene kanoonga vya iroromelo inyu. 9 Thawi detene ndapempelanga ndinouromolani m’mapempelwanga, moi Mulungu unoyo ndinamupangela miyo utumiki opatuleya na murimanga wetene volaleela uthenga wapama oonga vya Mwanae, unondipangela umboni. 10 Ndinomuvepa Mulungu ira akala pivyowandeya koma teto akala pivyevyo unafuna liye, ulendo oka unola ndize wewo. 11 Chifukwa ndinofunechecha uonani ira ndiuva-eni mphaso yauzimu na yolinga yoi mukale olimba, 12 kapena ira ndize ndilimbikisiwe na iroromelo inyu, koma teto nyo muze mulimbikisiwe na iroromelo yanga.

13 Koma abali ndinafuna muiziwe ira wathawi indendai ndikala ndifunechechanga ira ndize wewo, koma vikala vilepeleyanga. Ndinafuna ira ndize ndione vyo-arelavo vyapama vya chitwi-u yolaleela ngati mwemo vililiathu vaari va athu a mitundu dimo-i. 14 Miyo ndikaana ngongole wa Agiriki na wa athu anayo kai Agiriki koma teto wa athu azelu na wa athu o-okaana zelu. 15 Eno ndinofunechecha za laleela uthenga wapama wa nyo anayo muli wu Roma. 16 Miyo kandinanyaswa na uthenga wapama. Onga vyoona, uthengoyo chindila yakopolo ineyo Mulungu unai-indi-eda liye chito vofuna vulumucha muthu uliwetene unoyo un’na iroromelo, yowambeela wa Ayuda vogomi-eda viwa wa Agiriki. 17 Zela mu uthenga wapamola, Mulungu unoulula chilungamwae wa athu anayo kan’na iroromelo. Vyera eno, iroromelo ya athwayo inolimba mogwilizana na vyevyo Malemba kanaongaathu ira: “Muthu olungama unoza akaena moyo chifukwa ya iroromelo yae.”

18 Kumela udimu, Mulungu unooni-a uwalae wa athu etene anayo katinamuova, wa anayo kanapanga vyotakala koma teto anayo kanapangi-a ira choonadi kiiziweye. 19 Vili eno chifukwa Mulungu uwava-a umboni okwakwanela owakami-a ira kamuiziwe. 20 Kumela vevo ilambo yalengiweathu, makalelo a Mulungu o-ooneya na maso kanooneela pama. Makalelo a Mulungu anala, ngakale teto kopolo dae doomala koma teto vyongo vyevyo vinapangi-a ira liye akale Mulungu, vinooneela pama mu vyongo vyevyo alengile liye moi athwayo katin’na chifukwa yowapangi-a ira katiroromele ira ukala Mulungu. 21 Ngakale ira koomuiziwa Mulungu, aluwa katamulemekezile monga Mulungu koma teto katamuyamikele. M’malomwiwa koowambeela ganizela vyongo vyookaana zelu moi mirima diwa dookaana zeludo kadavwechechile vyongo. 22 Ngakale kanoonga ira kokaana zelu, aluwa mbookaana zelu. 23 M’malo momulemekeza Mulungu unoyo kanakhwa, aluwa kanalemekeza vifanizilo vya athu anayo kanakhwa koma teto vifanizilo vya mbalame, vinyama vya mendo 4 koma teto vinyama vyowambaza.

24 Eno mogwilizana na vilakolako vya m’murimani mwiwa, Mulungu oowa-iya ira kapange vyonyakavala, na yolinga yoi kapange vyongo vyonyaswi-a mathuthwiwa. 25 Choonadi yoonga vya Mulungu kooichenjani-a na vyonama, moi kanolambela koma teto tumikela ilengedwe m’malo motumikela Mulengi unoyo unafuna tamandiwa mpakana walewale. Ame. 26 Va chifukwa inela, Mulungu oowa-iya ira ka-arele vilakolako vyo-olamuleleya vyogonana, voi a-iyana a vaari viwa koo-iya ndila yobaliwana ya mathuthwiwa moi koowambeela panga vyongo vyosemphana na ndila yobaliwana. 27 Naaluwene teto alombwana, koo-iya ndila yobaliwana yofuna a-iyana moi kanosililana alombwana oka. Aluwa kanopanga vyongo vyonyaswi-a moi chifukwa ya vyevi, kanowachela wale mphotwiwa yofwanelela lakwa uwa.

28 Voi aluwa kaona ira kai vyofuneya muiziwa Mulungu molondola, liye oowa-iya ira kapitilize ganizela vyongo vyotakala koma teto ira kapangenga vyongo vyo-ofwanelela. 29 Moi koopanga vyongo vyoolungama vya tundu uliwetene, takala wetene, silila, koma teto vyongo vyetene vyotakala. M’murimani mwiwa moozaala na sanje, pha athu, khondo, chinyengo koma teto pangela athu vyongo vyotakala, moi koowomeliwa teto miseche, 30 koma teto namedela afwiwa. Kooidana na Mulungu, kali aibewe, ovikuza, onyada, aiwembu, koma teto o-ovwela makolo, 31 o-ozindikila, o-okwakwaneli-eda vyevyo kalonjezileathu, o-okaana chikondi koma teto o-okaana chifundo. 32 Ngakale ira athwala kanoliiziwa pama lamulo lolungama la Mulungu, loi muthu unoyo unapanga vyongo vyevi unafuneya khwa, aluwa kanopitilizave vipanga. Enjedela vevo, kanogwilizana teto na athu anayo kanapanga vyongo vyevi.

2 Eno akala unaweluza athu amo-iwa, kun’na chifukwa yovweya yoi uvipangi-enga kala olungama. Voi waweluzanga athu amo-iwa, unakala uviweluzanga wekave, chifukwa yoi nawen’ne teto unapanga vyevyo. 2 Ninoiziwa ira Mulungu aweluzanga athu anayo kanapanga vyevi ira mbofwanelela wachela ilango, unowaweluza mogwilizana na choonadi.

3 Koma weyo waweluzanga athu anayo kanapanga vyongo vyevyo weyo unapangawe, kodi unaganiza ira unoza uvitaale va dambo la iweluzo ya Mulungu? 4 Kodi kunaiziwa ira Mulungu unautonyi-eda oma murima wae ulukulu, o-olunduwa mombaraanya na yolinga yoi ulape? 5 Koma chifukwa yoi kunafuna chenja, moi unopitiliza tonyi-eda murima o-olapa, Mulungu unoza aulange va dambo la uwalae vevo unaze liye apeleke iweluzwae yolungama. 6 Liye unoza aweluze muthu uliwetene mogwilizana na vyevyo unapanga liye. 7 Liye unoza apeleke moyo oomala, wa athu anayo kanapitiliza panga vyapama. Athu anala kanoesaesa fwanya ulemelelo, ulemu koma teto moyo o-oonongeya. 8 Koma athu anayo kanaomeliwa mikangano, koma teto anayo katina-arela choonadi moi kanopanga vyongo vyoolungama, Mulungu unoza aatonyi-ede uwalae. 9 Muthu uliwetene opanga vyongo vyotakala, kaya ngu Muyuda kapena Mgiriki, unoza agumane na mavuto koma teto vyongo vyoopi-a. 10 Koma muthu uliwetene opanga vyapama unoza awachele ulemelelo, ulemu na murendele, yowambeela Muyuda vanduli viwa Mgiriki. 11 Chifukwa yoi Mulungu kan’na sakulo.

12 Athu etene anayo kachimwile ka-anaiziwe Ilamulo, kanoza kakhwe ka-aiziwanga Ilamulo. Koma athu etene anayo kakhwile kaiziwanga Ilamulo, kanoza kaweluziwe mogwilizana na Ilamulweyo. 13 Vale athu anayo kanakeda vwa Ilamulo, Mulungu kanaaona ira mbolungama koma anayo kana-arela Ilamulo mbanayo kanaze kaoniwe ira mbolungama. 14 Athu a mitundu dimo-i katin’na Ilamulo. Koma kapanganga mundila yobaliwana vyongo vyevyo vili mu Ilamulo, ngakale ira katin’na Ilamulo, kanotonyi-eda ira kokaana Ilamulo m’murimani mwiwa. 15 Athu anala kanotonyi-eda ira makundo a mu Ilamulo koolembiwa m’mirimani mwiwa moi ikumbumtimiwa inowapangela umboni. Maganizo a athu anala kanowaruni-a kapena teto asomedela. 16 Vyevi vinoza vioneele va dambo lelo Mulungu, unaze liye amu-indi-ede chito Yesu Kristu, voweluza vyongo vyaisisi vyevyo athu kanapangaathu koma teto vyevyo kanaganizaathu. Moi unoza aweluze mogwilizana na uthenga wapama unoyo ndinalaleela miyo.

17 Amo-iwa mwa nyo munoviromola ira muli Ayuda, munororomela Ilamulo koma teto munovitama ira muli vausamwali na Mulungu. 18 Munoiziwa vyevyo Mulungu unafuna liye koma teto munosangalala na vyongo vyapama vinjinji chifukwa yoi moofunji-iwa Ilamulo. 19 Munororomela ira munokoza asogolela athu o-oona koma teto munokoza amoneela athu anayo kali mudima. 20 Munororomela ira munokoza asogolela athu o-okaana zelu. Munaganiza teto ira munokoza afunji-a a-ima chifukwa yoi munovwechecha koma teto iziwa choonadi yofwanyeya mu Ilamulo. 21 Kodi we unoyo unafunji-a athu amo-iwa, chifukwa n’ni kunavifunji-a wekave? Unolaleela ira, “Kube,” nanga chifukwa n’ni weyo unaba? 22 We unoyo unaonga ira “Kupange igololo,” nanga chifukwa n’ni weyo unapanga igololo? We unoyo unaonga vyotonyi-eda ira unotakaleliwa na mafano, nanga chifukwa n’ni unaba vyongo vya mukachisi? 23 We unoyo unanyadela Ilamulo, Kodi unomupangela Mulungu ibewe vophwanya Ilamulo? 24 “Zina la Mulungu linonyoziwa vaari va athu a mitundu dimo-i chifukwa ya nyo,” monga mwemo Malemba kanaongelaathu.

25 Panga mdulidwe kwapama akala weyo una-arela Ilamulo. Koma akala unaphwanya Ilamulo, mdulidwawo kun’na chito. 26 Eno akala muthu o-oduliwa una-arela makundo olungama a mu Ilamulo, ngakale ira liye kaduliwe, unoza aoniwe ngati muthu unoyo uduliwe. 27 Muthu unoyo uli o-oduliwa a-arelanga Ilamulo, unoza auweluze chifukwa yoi ngakale ira uli oduliwa koma teto ukaana malamulo olembiwa weyo kunavwela. 28 Chifukwa unoyo uli Muyuda unde oka kai Muyuda, koma teto pangiwa mdulidwe thuthu loka, kai mdulidwe. 29 Kala Muyuda weniweni uli m’murimani moi mdulidwae unakala teto m’murimani opangiwa na zimu owela, o-okala na malamulo olembiwa. Muthu unola kanatamandiwa na athu, koma unotamandiwa na Mulungu.

3 Kodi kala Muyuda un’na upama oyi avi, kapena mdulidwe un’na pindu loi avi? 2 Upamiwa ngoinjiva. Yowambeela, mawu opatuleya a Mulungu kali m’mandani mwa Ayuda. 3 Nanga bwanji naonga vya Ayuda amo-iwa oororomeleya? Kodi oororomeleya uwa unatapulela teto ira Mulungu kai ororomeleya? 4 Naari. Ngakale muthu angali onama, vinoiziweya ira Mulungu unoonga vyoona mogwilizana na vyevyo Malemba kanaongaathu ira: “Mwaonganga, munoonga vya chilungamo ira muwine mulandu vevo munaweluziwa nyo.” 5 Akala ninapanga vyongo vyoolungama vinoza vitonyi-ede pama ira Mulungu ngolungama, ndiye kodi ninokoza onga ira Mulungu kai olungama aoni-anga uwalae? (Ndinoonga ngati mwemo athu amo-iwa kanaongelaathu.) 6 Naari! Akala Mulungu kai olungama, nanga ilambo unaza aiweluza avi?

7 Koma akala chifukwa ya vyonama vyanga choonadi ya Mulungu iwoneele vinjinji moi vyevyo vimuzi-eda ulemelelo, nanga chifukwa n’ni ndinaweluziwa ngati ochimwa? 8 Ni-iyele n’ni onga vyevyo athu amo-iwa kananinamedelaathu, ira ninoonga vyoi: “Tiyemoni nipange vyotakala ira vakale vyongo vyapama”? Athu anayo kanaonga vyevi kanoza kaweluziwe mogwilizana na chilungamo.

9 Ndiye kodi vyera eno iyo Ayuda niongenga ira nili athu apama kwaranya athu amo-iwa? Naari. Chifukwa monga mwemo niongele iyo wale, Ayuda koma teto Agiriki, etene kanolamuleliwa na uchimo 10 mogwilizana na vyevyo Malemba kanaongaathu ira: “Kavali muthu olungama ngakale m’mo-i. 11 Kavali muthu ozindikila ngakale vang’ono koma teto kavali muthu unoyo unaesaesa musaela Mulungu. 12 Athu etene komu-iya, moi etene mbookaana chito. Kavali muthu unoyo unatonyi-eda oma murima.” 13 “Vamelo viwa* vali ngati manda o-uleya. Aluwa kanoonga vyachinyengo na lumi liwa.” “Milomo diwa dikaana poizoni wa nyowa.” 14 “Moi muwano mwiwa muzaala na matembelelo koma teto mawu otakala.” 15 “Manyalwiwa kanotamanga vinjinji dowa pha athu.” 16 “Vyongo vyetene vyevyo kanapangaathu vinakala vyoononga koma teto vyozi-a mavuto, 17 moi ndila ya murendele katinaiiziwa.” 18 “Aluwa katinamuova Mulungu.”

19 Ninoiziwa ira vyongo vyetene vyevyo Ilamulo inaongaathu vino-inda chito wa athu anayo kana-arela Ilamulo. Yolinga iwa kupangi-a ira athu kasauwele yoonga koma teto tonyi-eda ira ilambo yetene ikaana mulandu vamaso va Mulungu moi chiyofwanelela wachela ilango. 20 Eno kavali muthu unoyo unaoniwa ira ngolungama na Mulungu chifukwa yo-arela Ilamulo, voi Ilamulo inonikami-a iziwa ira nili athu ochimwa.

21 Koma sopano, viiziweya ira muthu unokoza kala olungama wa Mulungu ngakale ira kana-arela Ilamulo. Vyevi vyooromoliwa mu Ilamulo koma teto mu vyevyo anamaongela kalembileathu. 22 Athu etene anayo kanatonyi-eda ira kanomuroromela Yesu Kristu, Mulungu unowaona ira mbolungama chifukwa wa liye athu etene mbofwanafwana. 23 Voi athu etene mbochimwa moi kanolepela tonyi-eda pamapama ulemelelo wa Mulungu. 24 Mulungu unowaona ira mbolungama chifukwa yooma murima wae ulukulu, wewo atonyi-edile liye vopeleka mphaso yaulele ya dipo lelo Kristu Yesu alivele liye. 25 Mulungu oomupeleka ngati sembe ira athu kagwilizane nawili na Mulunguyo vororomela magazae. Oopanga vyevi vofuna tonyi-eda chilungamo ineyo un’na liye chifukwa ootonyi-eda ira kanalunduwa mombaraanya vokululuka machimo anayo kaireile wale. 26 Oopanga vyevi ira atonyi-ede chilungamwae vathawiila voona ira muthu unoyo unamuroromela Yesu ngolungama.

27 Kodi veva vikala chifukwa yovitamela? Naari kilivo. Kodi nivitamenga chifukwa yo-arela Ilamulo? Naari, koma nivitamenga chifukwa yo-arela lamulo la iroromelo. 28 Niona ira muthu unokala olungama chifukwa ya iroromelo, o-okala vo-arela Ilamulo. 29 Kodi liye ngu Mulungu wa Ayuda oka? Kodi kai Mulungu wa athu a mitundu dimo-idiwa? Liye ngu Mulungu wa athu a mitundu dimo-idiwa. 30 Voi Mulungu ngu m’mo-i, liye unoza aone ira athu oduliwa mbolungama chifukwa ya iroromelo iwa. Unoza aone teto ira athu o-oduliwa mbolungama chifukwa ya iroromelo iwa. 31 Kodi vyevi vinatapulela ira ninaamali-a Ilamulo chifukwa ya iroromelo yi-u? Naari! Koma m’malomwiwa, ninaalimbikisa Ilamulo.

4 Voi vili eno, kodi nionge n’ni vyokuza likolo li-u Aburahamu? 2 Mwaisazo, aakale ira Aburahamu oowoniwa ira ngolungama chifukwa ya vyevyo apangile liye, ookaana chifukwa yoi avitamele, koma o-okala vamaso va Mulungu. 3 Kodi vale Malemba kanaonga vyoi avi? Kanaonga ira: “Aburahamu oororomela vyevyo Yehova* amuwandelile liye, moi oowoniwa ira ngu muthu olungama.” 4 Muthu unoyo u-indile chito awachela malipilwae kavinaoneya ngati bwanae ngooma murima, koma vinakala ira pivyevyo afuneya liye wachela.* 5 Koma muthu ochimwa unoyo unamuroromela Mulungu ngakale ira ka-indile chito iliyetene, Mulunguyo unomuona ira ngolungama. 6 Davide oowonga vya muthu osangalala unoyo Mulungu unamuona liye ira ngolungama ngakale ira vyevyo upangile liye kavinagwilizana kwenikweni na Ilamulo. Liye aongile ira: 7 “Osangalala mbaathu anayo kakululukiwe vyoira viwa vyo-ovwela malamulo moi machimwiwa kokululukiwa.* 8 Osangalala ngu muthu unoyo Yehova* kanawelengela chimo lae.”

9 Ndiye kodi athu oduliwa oka mbanayo kanakala osangalala eni, kapena naaluwene teto athu o-oduliwa kanokala osangalala? Voi ninoonga ira: “Aburahamu oowoniwa ira ngu muthu olungama chifukwa ya iroromelwae.” 10 Koma kodi yali thawi iivi vevo aoniwe liye ira ngu muthu olungama? Kodi ali oduliwa kapena o-oduliwa? Liye ali aanaduliwe. 11 Moi Mulungu oomuva-a Aburahamu mdulidwe ira ikale izindikilo yotonyi-eda ira Mulunguyo oomuona ira ngu muthu olungama aanaduliwe chifukwa yoi liye ookaana iroromelo. Oopanga vyevi ira aze akale baba wa athu etene o-oduliwa anayo kan’na iroromelo, ira naaluwene teto athwayo kaze kaoniwe ira mbolungama. 12 Ira teto aze akale baba wa a-ima oduliwa, koma teto wa athu anayo kanaenda mofwanelela vo-arela iroromelo ineyo babiwa Aburahamu an’na liye aanaduliwe.

13 Chifukwa Aburahamu kapena a-imae* katalonjeziwe ira kanoza kawachele ilambo monga cholowa iwa chifukwa yoi koo-arela Ilamulo. Aluwa koowachela lonjezolo chifukwa yoi Aburahamu ookaana iroromelo moi Mulungu oomuona ira ngolungama. 14 Chifukwa akala athu anayo kana-arelave Ilamulo mbanayo kanaze kawachele cholowa, ndiye kuti iroromelo kin’na chito moi lonjezoli limali-iwa. 15 Onga vyoona, phwanya Ilamulo unopangi-a ira muthu awachele ilango, koma akala kavali lamulo, teto kavali chimwa.

16 Mbaona Aburahamu ava-iwe lonjezolo chifukwa ya iroromelo, ira likale logwilizana nooma murima ulukulu. Koma teto oova-iwa lonjezolo ira likale losimikizeleya wa athu etene anayo kali a-imae,* o-okala wa athu oka anayo kanawachela Ilamulo, koma teto wa athu anayo kana-arela iroromelo ya Aburahamu unoyo uli babi-u. 17 (Vyevi pivyogwilizana na vyevyo Malemba kanaongaathu ira: “Ndiusakula ira ukale baba wa athu a mitundu detene.”) Vyevi vyali eno vamaso va Mulungu unoyo Aburahamu amuroromela liye, unoyo teto unavenyi-a okhwa moi liye unoonga vya vyongo vyoi kavinaireye ngati viireya wale. 18 Aburahamu ookaana idedi-edo koma teto iroromelo yoi unoza akale baba wa athu a mitundu detene, ngakale ira vyevi vyaoneya ngati kavinaza viwandeya. Liye oororomela vyevi mogwilizana na vyevyo Mulungu amuwandelile liye wale ira: “Mu pumwemo a-imawo* kanazeathu kakalele.” 19 Ngakale ira ookaana iroromelo yolimba, liye ooganizela vya thuthu lae, lelo vathawi ineyo lali ngati lokhwa (voi ali angan’na chaka dotamangela 100). Ooiziwa teto ira iyanae Sara ngokalamba vinjinji moi kanaza abala mwana. 20 Koma chifukwa ya lonjezo la Mulungu, iroromelwae yookalave yolimba moi iroromelweyo yoomuva-a kopolo moi oopeleka ulemelelo wa Mulungu. 21 Liye kaakaikela ira Mulungu ukaana kopolo dokwakwaneli-eda vyevyo alonjezile liye. 22 Eno “Mulungu oomuona ira ngu muthu olungama.”

23 Komave, mawu oyi “Mulungu oomuona ira ngu muthu olungama” katalembiwe chifukwa ya liye eka. 24 Koolembiwa teto chifukwa ya iyo. Na-iyene ninooniwa ira nili athu olungama chifukwa ninomuroromela Mulungu unoyo amuvenyi-ile Yesu Mbwii-u. 25 Yesu oopelekiwa chifukwa ya machimwi-u moi oovenyi-iwa ira Mulungu anione kala olungama.

5 Voi sopano ninooniwa kala olungama chifukwa yoi nikaana iroromelo, ninokoza kala vamurendele* na Mulungu zela mwa Mbwii-u Yesu Kristu. 2 Muroromela Yesu unonikami-a ira nimuwandamele Mulungu koma teto nisangalalenga nooma murima wae ulukulu. Moi ninokoza sangalala* chifukwa yoi nikaana idedi-edo yowachela ulemelelo wa Mulungu. 3 Kai vyokaaevi, koma ninokoza teto sangalalanga* nagumananga na mavuto chifukwa ninoiziwa ira mavuto anayo ninagumanana iyo kanopangi-a ira nivilele. 4 Vilela unopangi-a ira nikale osomedeleya wa Mulungu moi kala osomedeleya wa Mulungu, unopangi-a ira nikaena idedi-edo. 5 Idedi-edo kinanikumudwi-a chifukwa Mulungu unotonyi-eda ira unoniomeliwana vo-indi-eda chito zimu owela unoyo unaniva-a liye.

6 Vevo nali iyo ofooka, Kristu ookhwela athu ochimwa, vathawi ineyo ya-eliwe wale. 7 Chifukwa pivyorucha ira muthu m’mo-iwa akhwele muthu olungama. Koma mwina muthu unokoza limba murima mukhwela muthu wapama. 8 Koma Mulungu unonitonyi-eda chikondae, chifukwa vevo nali iyo ochimwa Kristu oonikhwela. 9 Voi ninooniwa kala olungama chifukwa ya magazi a Kristu, Mulungu unoza anivulumuche wu uwalae, zela mwa Kristuyo. 10 Akala nagwilizani-iwe na Mulungu chifukwa yoi Mwanae oonikhwela vathawi ineyo nali iyo adani, ndiye kuti ninoza nivulumuchiwe na moywae, chifukwa yoi vano nili vausamwali na Mulungu. 11 Kai vyokaaevi, koma ninosangalala teto chifukwa yoi zela mwa Mbwii-u Yesu Kristu, nigwilizani-iwa na Mulungu koma teto nili vausamwali olimba na Mulunguyo.

12 Uchimo oovolowa muilambo zela mwa muthu m’mo-i moi uchimoyo oopangi-a ira athu etene kakhwenga. Eno athu etene kanokhwa chifukwa etene mbochimwa. 13 Ilamulo yaanakalevo, uchimo ookalavo wale muilambwela, koma muthu kanafwanyiwe na mulandu oyi upanga chimo akala kavali lamulo. 14 Ngakale vili eno, khwa oolamulela ngati mwene ambeela muthawi ya Adamu mpakana dowa fiya muthawi ya Mose, ngakale teto wa athu anayo katachimwile ngati mwemo Adamu mwachimwele liye. Adamuyo ali ofwanafwana na muthu unoyo aza usogolo.

15 Koma mwemo vililiathu na mphaso inela, kai mwemo vyaliliathu na uchimo. Athu anjinji kookhwa chifukwa yochimwa wa muthu m’mo-i. Koma oma murima ulukulu wa Mulungu koma teto mphaso yaulele ineyo aipelekile liye mooma murima zela mwa muthu m’mo-i, Yesu Kristu, vikami-a athu anjinji. Vo-indi-eda chito mphaso inela, Mulungu unoza apeleke madaliso oinjiva wa athu anjinji. 16 Vyevyo viireile chifukwa ya mphaso yaulele inela, pivyo-iyana na vyevyo vyaireile zela mwa muthu m’mo-i unoyo achimwile. Iweluzo ya chimo limo-i yoozi-a uchimo wa athu etene, koma mphaso ineyo yapelekiwe chifukwa ya machimo anjinji, yoopangi-a ira athu kaoniwenga ira mbolungama. 17 Khwa oolamulela monga mwene chifukwa ya uchimo wa muthu m’mo-i. Koma athu anayo kawachelile oma murima ulukulu wa Mulungu koma teto mphaso yaulele ya chilungamo, kanoza kakaena moyo ira kaze kalamulelenga monga mamwene zela mwa muthu m’mo-i, Yesu Kristu.

18 Eno monga mwemo vyakaleleathu ira uchimo wa muthu m’mo-i oopangi-a ira athu a mitundu detene kaweluziwe ira mbochimwa, panga yongo imo-i yolungama upangi-a teto ira athu a mitundu detene kaoniwe ira mbolungama ira kakaena moyo. 19 Voi o-ovwela wa muthu m’mo-i oopangi-a ira athu anjinji kakale ochimwa, vwela wa muthu m’mo-i unoza upangi-e teto ira anjinji kakale olungama. 20 Mulungu oopeleka Ilamulo ira uchimo wa athu uoneele. Koma vevo uchimo waoneeleathu, oma murima ulukulu wa Mulungu ooenjedeleya vinjinji. 21 Chifukwa n’ni? Ira monga mwemo uchimo walamuleleathu monga mwene limo-i nokhwa, teto oma murima ulukulu ulamulele monga mwene zela muchilungamo. Moi vyevi vinoza vipangi-e ira athu kaze kafwanye moyo oomala zela mwa Yesu Kristu Mbwii-u.

6 Kodi nionge n’ni? Kodi nipitilize chimwa ira oma murima ulukulu wa Mulungu uenjedeleye? 2 Naari. Voi kaninalamuleliwa na uchimo, ndiye nipitilize chimwa chifukwa n’ni? 3 Kapena kamunaiziwa ira etene anayo nabatiziwe moi sopano nili ogwilizana na Kristu Yesu noobatiziwa teto nokhwa wae? 4 Eno noo-eliwa m’manda limo-i na liye vevo nabatiziwe iyo nokhwa wae, ira mofwanafwana na Kristu unoyo avenyi-iwe zela mukopolo ya Babae, iyo teto nipitilize kala na moyo usha. 5 Chifukwa akala nigwilizanile na liye vokhwa mofwanafwana na liye, mookaikela ninoza nigwilizane na liye vovenyi-iwa mofwanafwana na liye. 6 Chifukwa ninoiziwa ira umuthwi-u wawale oopachikiwa limo-i na liye vatengo na yolinga yoi thuthu li-u lauchimo likale lookaana kopolo, ira kanikale akapolo a uchimo. 7 Chifukwa muthu unoyo ukhwile kanakaana mulandu* wa machimwae.

8 Koma teto, akala nakhwile limo-i na Kristu, ninororomela ira ninoza nikaena moyo limo-i na liye. 9 Ninoiziwa ira voi Kristu uvenyi-iwa, kanaza akhwa nawili moi kanaza alamuleliwa teto nokhwa ngati mwene. 10 Liye ookhwa ira achose uchimo ndila imo-i yoka moi ukaana moyo, ira apangenga ifunelo ya Mulungu. 11 Nanyen’ne teto muvionenga ngati okhwa vakhani ya uchimo, koma mukaena moyo ira mupangenga ifunelo ya Mulungu zela mwa Kristu Yesu.

12 Eno kamulole ira uchimo ulamulelengave ngati mwene m’mathuthwinyu oyi kanokoza khwayo ira mu-arelenga vilakolako viwa. 13 Moi kamupeleke mathuthwinyu* uuchimo ira kakale vida vyopangelana vyongo vyoolungama, koma vipelekeni wa Mulungu monga athu anayo kavenyi-iwe. Mathuthwinyu teto apelekeni wa Mulungu monga vida vyopangelana chilungamo. 14 Kamulole ira uchimo uulamulelengani ngati mwene, chifukwa kamuna-arela Ilamulo, koma munosangalala nooma murima ulukulu wa Mulungu.

15 Kodi vyevi vinatapulela ira nipangenga chimo chifukwa yoi kanina-arela Ilamulo koma ninosangalala nooma murima ulukulu wa Mulungu? Naari. 16 Kodi kamunaiziwa ira mwavipelekanga wa muthu m’mo-iwene ngati akapolo ira mumuvwelenga, munokala akapolo a muthu unoyo munamuvwela nyo? Munokala akapolo a uchimo unoyo unazi-a khwa, koma mwakala akapolo a Mulungu koma teto mwamuvwelanga, munoza mukale athu olungama. 17 Koma ninomuyamikela Mulungu ira ngakale ira vowambeela mwali akapolo a uchimo, moovwela kumela vati va murima makundo asha anayo mwafunji-iwe nyo. 18 Vyoona, voi moomasuliwa uuchimo, mookala akapolo a Mulungu ira mupangenga vyongo vyolungama. 19 Ndinaonga na nyo chifukwa yofooka wa mathuthwinyu. Mwemo munapelekela nyo mathuthwinyu ira kakale akapolo a vyonyakavala koma teto akapolo o-ovwela malamulo na yolinga yoi mupangenga vyongo vyoogwilizana na malamulo, pelekani teto mathuthwinyu ira kakale akapolo a chilungamo koma teto owela. 20 Chifukwa vevo mwali nyo akapolo a uchimo, mwali omasuwa wu chilungamo.

21 Kodi vathawi ineyo mwabala vipaso vyoi avi? Vyali vyongo vyoi vathawiila munovinyaswana. Moi vyo-arela vya vyongo vyevi kukhwa. 22 Koma voi moomasuliwa uuchimo nokala akapolo a Mulungu, munobala vipaso vyapama moi vogomi-eda viwa munoza mukaena moyo oomala. 23 Chifukwa malipilo a uchimo kukhwa, koma mphaso ineyo Mulungu unapeleka liye ngu moyo oomala zela mwa Kristu Yesu Mbwii-u.

7 Abali, nyo anayo munaiziwa Ilamulo, kodi kamunaiziwa ira Ilamulo inokaana kopolo mwa muthu vevo muthuyo un’na liye moyo? 2 Mwaisazo, iyana oteliwa mwalamulo unokala omangeya wa mamunae vevo mamunaeyo uli liye na moyo. Koma mamunaeyo akhwa, iyanoyo unokala omasuwa ulamulo lokuza mamunaeyo. 3 Akala iyanoyo unateliwe na lombwana m’mo-iwa koma mamunaeyo angali moyo, ndiye kuti upanga igololo. Koma akala mamunaeyo ukhwile, iyanoyo umasuwa ulamulo lokuza mamunaeyo, eno kapangile igololo akala unateliwe na lombwana m’mo-iwa.

4 Abalanga, thuthu la Kristu looumasulani wu Ilamulo, ira mukale athu a muthu unoyo avenyi-iwe na yolinga yoi nibale vipaso wa Mulungu. 5 Chifukwa vevo nakala iyo mogwilizana na mathuthwi-u ochimwala, Ilamulo yoopangi-a ira vilakolako vya uchimo vyevyo nan’na iyo m’mathuthwi-u* vioneele vowela. Moi vilakolako vyevi vyoopangi-a ira nikhwenga. 6 Koma sopano nimasuliwa moi kaninasogoleliwa na Ilamulo ineyo yalembiwe wale, ineyo yanimanga ira nikale akapolo mundila isha mosogoleliwa na zimu owela.

7 Ndiye nionge n’ni? Kodi Ilamulo ngu uchimo? Naari. Onga vyoona, aakale ira kavali Ilamulo kandaiziwa uchimo. Mwaisazo, kandaiziwa silila wa sanje aakale ira Ilamulo kiongile ira: “Kusilile mwasanje.” 8 Koma chifukwa ya lamulo, uchimo oofwanya ndila yondipangi-a ira ndikaena silila wa sanje wa tundu uliwetene. Chifukwa aakale ira kavali Ilamulo, uchimo kwaakaana kopolo.* 9 Ilamulo yaanapelekiwe ndookaana moyo. Koma Ilamulo ingapelekiwe, uchimo ookaana moyo, koma miyo ndookhwa. 10 Moi lamulo lelo lafuna ndisogolela ira ndidowe ndafwanye moyo, loondisogolela ira ndikhwe. 11 Uchimo oo-indi-eda chito lamulo leli vondinyengelela moi uchimoyo oondipha. 12 Eno Ilamulo vaekiwa chiyowela moi malamulo mbowela, olungama koma teto apama.

13 Kodi vyevi vinatapulela ira yongo yapama yoopangi-a ira ndikhwe? Naari. Uchimo ngunoyo wapangi-ile ira ndikhwe. Ilamulo chiyapama, koma yoopangi-a ira viiziweye pama ira uchimo unopangi-a ira ndikhwe. Eno malamulo koonikami-a iziwa ira uchimo ngotakala vinjinji. 14 Chifukwa ninoiziwa ira Ilamulo chiyokumela wa Mulungu, koma miyo kandili wangwilo moi ndooguli-iwa uuchimo. 15 Kandinavwechecha vyevyo vinandiireela. Chifukwa vyevyo ndinafuna miyo panga, kandinavipanga. Koma vyevyo ndinaidanana miyo pivyevyo ndinapanga miyo. 16 Komave akala ndinapanga vyongo vyoi kandinafuna vipanga, ndiye kuti ndinosomedela ira Ilamulo chiyapama. 17 Koma unoyo unapanga vyongovyo kai miyo, koma ngu uchimo unoyo uli muthuthu mwanga. 18 Ndinoiziwa ira muthuthu langa lochimwali, kamuli yongo iliyetene yapama. Chifukwa ndinofuna panga vyongo vyapama, koma kandinakwakwani-a vipanga. 19 Vyongo vyapama vyevyo ndinafuna miyo vipanga kandinavipanga, koma vyongo vyotakala vyoi kandinafuna vipanga pivyevyo ndinapanga miyo. 20 Sopano akala ndinapanga vyongo vyoi kandinafuna vipanga, ndiye kuti unoyo unapanga vyongovyo kai miyo, koma ngu uchimo unoyo uli muthuthu mwanga.

21 Vyevyo vinandiireela pivyoi,* vevo ndinafuna miyo panga vyongo vyapama, ndinoona vyongo vyotakala mwa miyo. 22 M’murimani mwanga ndinosangalala vinjinji na malamulo a Mulungu, 23 koma ndinoona lamulo limo-iliwa muthuthu* mwanga livazananga na malamulo a m’maganizo mwanga moi linondipangi-a ira ndikale kapolo wa lamulo la uchimo lelo lili muthuthu* mwanga. 24 Muthu ovuteya miyo! Kodi mbaani unoyo unaze andivulumuche wu thuthu lelo linapangi-a ira ndikhweli? 25 Mulungu unoza andivulumuche zela mwa Yesu Kristu Mbwii-u. Eno m’maganizo mwanga ndili kapolo wa malamulo a Mulungu, koma muthuthu mwanga ndili kapolo wa lamulo la uchimo.

8 Eno athu anayo kali ogwilizana na Kristu Yesu katin’na mulandu. 2 Chifukwa lamulo la zimu owela lelo linava-a moyo mogwilizana na Kristu Yesu liumasulani ulamulo la uchimo na ulamulo lokhwa. 3 Ilamulo kayan’na kopolo youmasulani chifukwa athu mbofooka koma teto mbochimwa. Koma Mulungu oomutumiza Mwanae, angan’na thuthu ngati la athu ochimwa ira aumasuleni uuchimo. Eno Mulungu oogonji-a uchimo vo-indi-eda chito thuthu. 4 Mulungu oopanga vyevi ira iyo anayo ninaenda mo-arela zimu owela, o-okala mo-arela vyofuna vya thuthu li-u, nikwakwaneli-ede vyongo vyolungama vyevyo IIamulo inafunaathu. 5 Chifukwa athu anayo kana-arela vyofuna vya thuthu, maganizwiwa etene kanakala va vyongo vya thuthu. Koma athu anayo kana-arela zimu owela, maganizwiwa etene kanakala va vyongo vya zimuyo. 6 Voi ganizela vinjinji vyongo vya thuthu unozi-a khwa, koma ganizela vinjinji vyongo vya zimu owela unozi-a moyo na murendele. 7 Chifukwa ganizela vinjinji vya thuthu unopangi-a athu kala vaudani na Mulungu voi thuthu kalinavwela lamulo la Mulungu, moi onga vyoona, kalinavwele lamulo. 8 Eno athu anayo kana-arela vyofuna vya thuthu katinawande musangalasa Mulungu.

9 Komave akala zimu wa Mulungu uli na nyo, muno-arela vyofuna vya zimuyo o-okala vyofuna vya thuthu. Akala m’mo-iwa kan’na zimu wa Kristu, muthu unoyo kai wa Kristu. 10 Koma akala muli ogwilizana na Kristu, zimu owela unopangi-a ira mukaena moyo chifukwa ya chilungamo ngakale ira thuthu linyu tilokhwa chifukwa ya uchimo. 11 Akala zimu wa Mulungu unoyo wamuvenyi-ile Yesu Kristu uli mwa nyo, liye unoza a-indi-ede chito zimuyo, vopangi-a ira mathuthwinyu okhwa kakaena moyo.

12 Eno abali, kanilole ira mathuthwi-u kanilamulelenga nopanganga vyongo vyevyo mathuthwayo kanafunaathu. 13 Chifukwa akala muna-arela vyofuna vya thuthu, mookaikela munoza mukhwe. Koma mwalola ira kopolo ya zimu owela iukami-eni ira muphe vilakolako vya thuthu, munoza mukaena moyo. 14 Etene anayo kanasogoleliwa na zimu wa Mulungu, mba a-ima a Mulungu. 15 Chifukwa kamuwachelile zimu wa ukapolo unoyo unapangi-a ira muovenga, koma moowachela zimu unoyo unapangi-a ira mukale a-ima a Mulungu, moi zimuyo unopangi-a ira niongenga mokuwa ira: “Abba,* Babani!” 16 Zimuyo unopangela umboni limo-i na zimwi-u ira nili a-ima a Mulungu. 17 Eno akala nili a-ima, nili teto owachela cholowa kumela wa Mulungu. Moi liye unoza aniva-e cholowa limo-i na Kristu, akala ninavuteya limo-i na liye ira nidowe nawachele ulemelelo.

18 Ndinaona ira mavuto anayo ninagumanana iyo vathawiila mba ang’onong’ono voelekezela na ulemelelo unoyo Mulungu unaze liye aniva-e usogolo. 19 Chifukwa ilengedwe inoembekezela mwachidwi thawi ineyo ulemelelo wa a-ima a Mulungu unazeathu uoneele. 20 Voi ilengedwe yetene yooweluziwa ira ikale yookaana chito, o-okala mofuna mwiwa koma Mulungu ngunoyo apangi-ile ira ikale yookaana chito. Moi oopeleka teto idedi-edo 21 yoi ilengedweyo inoza imasuliwe uukapolo wa uchimo nokhwa moi inoza ikaena ufulu wa ulemelelo wa a-ima a Mulungu. 22 Chifukwa ninoiziwa ira ilengedwe yetene inaadumbela vamo-i koma teto vwa voreya mpakana vano. 23 Koma teto kai vyokaaevi. Iyo anayo nin’na vipaso vyowambeela vya zimu, ninodumbela m’murimani mwi-u vevo ninaembekezela iyo na murima wetene ira Mulungu anilande kala a-imae, koma teto ira aze animasule wu mathuthwi-u vo-indi-eda chito dipo.* 24 Chifukwa noovulumuchiwa ira nikaena idedi-edo inela, koma yongo ineyo muthu unaidedi-eda liye yawandeya kanaidedi-edave. Kodi ineyo muthu aidedi-eda liye yaireya, unopitilizave idedi-eda? 25 Koma akala vyongo vyevyo ninadedi-eda iyo kavinaireye, ninopitilizave dedi-eda movilela.

26 Mofwanafwana na vyevi, zimu owela unonikami-a va vyongo vyevyo ninalepela iyo vipanga. Chifukwa vuto tiloi kaninaiziwa vyevyo ninafuna iyo romola vopempela, koma zimu owela unochondelela m’malo mwa iyo va vyongo vyoi kaninawande vifotokoza. 27 Koma Mulungu unoyo unaiziwa vyevyo vili m’murimani mwi-u unoiziwa vyevyo zimu owela unafunaathu, chifukwa unochondelela m’malo mwa owela mogwilizana na ifunelo yae.

28 Ninoiziwa ira Mulungu unogwilizani-a vyoira vyae vyetene vofuna kami-a athu anayo kanamuomeliwana, anayo kali oitaniwa mogwilizana na yolinga yae. 29 Unopanga vyevi chifukwa athu anayo aaiziwile liye wale oowasakula ira kaze kakale ofwanafwana na Mwanae, ira Mwanoyo akale owambeela baliwa vaari va abalae anjinji. 30 Koma teto anayo aasakulile liye wale mbanayo aaitanile liye. Anayo aaitanileliyayo mbanayo teto unaaona liye ira mbolungama. Moi anayo unaaona liye ira mbolungamayo mbanayo teto aava-ile liye ulemelelo.

31 Ndiye nionge n’ni veva? Akala Mulungu uli umbali-u, mbaani unaze aruni-ane na iyo? 32 Voi umupeleka Mwanae mofunechecha m’malo mwa etene iyene, unalepele avi niva-a mooma murima vyongo vyetene vamo-i na Mwanae? 33 Mbaani unoyo unaze aimbe mulandu athu a Mulungu osakuliwa? Voi Mulungu ngunoyo unaona ira mbolungama, 34 mbaani unoyo unaze aaruni-e? Kristu Yesu ngunoyo akhwile koma teto ngunoyo avenyi-iwe. Liye uli wu ndanda lodjana la Mulungu, moi unoonga mochondelela m’malo mwa iyo.

35 Mbaani unoyo unaze animwalani-e na chikondi ya Kristu? Kodi mba mavuto, vyongo vyovoreya, zuzumi-iwa, ndala, usiwa, vyongo vyoopi-a kapena supada? 36 Malemba kanaonga ira: “Chifukwa ya nyo, iyo ninophiwa thawi detene. Nili ngati khosa dedo dinadowa ophiwa.” 37 Koma ninogonji-a vyongo vyetene vyevi mokami-iwa na unoyo aniomeliwilena. 38 Chifukwa ndisimikiza murima ira khwa, moyo, angelo, olamulela, vyongo vyevyo vilivo vathawiila, vyongo vyevyo vinaza usogolo, kopolo, 39 usinkhu, dii-a kapena yolengiwa iliyetene, kavinaza viwanda nimwalani-a na chikondi ya Mulungu ineyo ili mwa Kristu Yesu Mbwii-u.

9 Ndinaonga vyoona mogwilizana na Kristu, kandinanama. Moi ikumbumtimanga inondipangela umboni mwa zimu owela, 2 ira ndikaana chisoni vinjinji moi murimanga unondivoreya thawi detene. 3 Ndoowomeliwa ira miyo ndi-iyani-iwe na Kristu monga muthu otembeleliwa chifukwa ya abalanga, athu a tundwanga, 4 anayo mba Aisaraeli. Mulungu oowasakula ira kakale a-imae moi oowava-a ulemelelo, mapangano, Ilamulo, utumiki opatuleya koma teto malonjezo. 5 Aluwa mba a-ima a makolwi-u awale. Moi Kristu abaliwile kumela mwa aluwa. Mulungu unoyo ngu mulukulu va vyongo vyetene, atamandeye mpakana walewale. Ame.

6 Komave vyevi kavinatapulela ira mawu a Mulungu katikwakwaneli-ediwe. Chifukwa kai athu etene okumela mufuko la Aisaraeli anayo kali “Aisaraeli.” 7 Ngakale ira aluwa mba afuko* la Aburahamu, vyevi kavinatapulela ira etene mba a-imae. Chifukwa Malemba kanaonga ira, “Anayo kanafuna za iziweyanga monga a-ima* a Aburahamu kanaza kakumela mwa Isaki.” 8 Vyevi kavinatapulela ira a-ima etene a Aburahamu mba a-ima a Mulungu, koma a-ima anayo kabaliwile mogwilizana na lonjezo mba a-ima* a Aburahamu. 9 Voi Mulungu alonjezile ira: “Ndinoza ndize nawili thawi ngati inela, moi Sara unoza akaena mwana walombwana.” 10 Lonjezo leli kalipelekiwe vathawi yoka inela. Loopelekiwa teto vevo Rabeka aembekezela liye bala a-ima anasambili a Isaki mbwii-u. 11 Anasambilayo kaanabaliwe koma teto kaanapange yongo yapama kapena yotakala iliyetene, Mulungu ali angatonyi-edile wale unoyo amusakulile liye chifukwa liye unomusakula muthu unoyo unamufuna liye, o-okala volandela vyoira vya muthu. 12 Eno Mulungu oomuwandela Rabeka ira: “Mwanawo wandimuwa unoza akale kapolo wa mwanawo n’ng’onong’ono.” 13 Mogwilizana na vyevyo Malemba kanaongaathu ira: “Ndoomuomeliwana Yakobo, koma ndooidana na Esau.”

14 Ndiye nionge n’ni veva? Kodi Mulungu kan’na chilungamo? Naari. 15 Chifukwa liye oomuwandela Mose ira: “Muthu unoyo ndinafuna miyo muomela murima, ndinoza ndimuomele murima, moi muthu unoyo ndinafuna miyo mutonyi-eda chifundo, ndinoza ndimutonyi-ede chifundo.” 16 Eno kavinaroromela funa wa muthu kapena tindi lae,* koma vinaroromela Mulungu unoyo uli wachifundo. 17 Voonga vya Farao, Malemba kanaonga ira: “Ndiu-iya na moyo ira ndiutonyi-ede kopolo danga koma teto ira zina langa lilengeziwe vailambo yetene yavati.” 18 Eno liye unomupangela chifundo muthu unoyo unafuna liye mupangela chifundo, koma unolola ira athu amo-iwa kaumi-e mirima diwa.

19 Mwina unokoza ndiwandela ira: “Chifukwa n’ni Mulungu unafwanyela athu vifukwa? Kodi mbaani unaruni-a ifunelwae?” 20 Kodi weyo uli mbaani ira uruni-anenga na Mulungu? Kodi yongo yopangiwa inokoza muwandela muthu unoyo aipangile ira, “Chifukwa n’ni wandipangile eni?” 21 Kodi nyo kamunaiziwa ira oomba vyombwe ukaana ufulu oomba yongo yolemekezeya, na yongo yonyozeya kumela va ulongo umo-ive? 22 Vyevi pivyofwanafwana na Mulungu, liye unofuna oni-a uwalae na kopolo dae wa athu otakala koma unowalezela murima vinjinji ngakale ira kanoidana na liye moi mbofwanelela onongiwa.* 23 Liye upanga vyevi, ira atonyi-ede ulukula wa ulemelelwae wa athu anayo kali ofwanelela pangeliwa chifundo,* anayo aasakulile liye wale ira kawachele ulemelelo, 24 moi athu anala ngu iyo anayo naitaniwe ookala kumela wa Ayuda oka koma teto okumela wu mitundu dimo-i. 25 Pivyofwanafwana na vyevyo vyaongiwe m’buku la Hoseya ira: “Athu anayo kai athwanga ndinoza ndiaromole ira ‘athwanga,’ moi iyana unoyo kanatonyi-ediwa chikondi, ndinoza ndimuromole ira ‘ndinomuomeliwana.’ 26 Wewo kawandeliwaathu ira, ‘Nyo kamuli athwanga,’ kanoza kawandeliwe ira, ‘Nyo muli a-ima a Mulungu wamoyo.’”

27 Koma teto, Yesaya oowonga vyokuza Aisaraeli ira: “Ngakale ira a-ima a Isaraeli kanoza kakale oinjiva ngati miseva da munyanja, athu oyeva oka mbanayo kanaze kavulumuwe. 28 Chifukwa Yehova* unoza aweluze milandu vailambo yavati moi unoza apange vyevi mombaraanya.” 29 Koma teto mogwilizana na vyevyo Yesaya aongile liye wale ira, “Aakale ira Yehova* wa magulu akhondo audimu kani-iyede fuko,* nakala ngati Sodomu, moi noofwanafwana na Gomora.”

30 Ndiye nionge n’ni veva? Ngakale ira athu a mitundu dimo-i kati-arele chilungamo, aluwa koofwanya chilungamo ineyo inaza chifukwa ya iroromelo. 31 Koma ngakale ira Aisaraeli koo-arela lamulo la chilungamo, aluwa katikwakwani-ile arela lamulo. 32 Chifukwa n’ni? Chifukwa yoi aluwa kaganiza ira kanokoza li-arela lamulolo muvyoira viwa, o-okala mwa iroromelo. Aluwa kookwakwatuwa “valibwe lokwakwatuwi-a” 33 mogwilizana na vyevyo Malemba kanaongaathu ira: “Miyo ndino-ela libwe lokwakwatuwi-a koma teto libwe lokumudwi-a mu Ziyoni, koma muthu ororomela libwelo kanaza akumudwa.”

10 Abali, yongo ineyo ndinafunechecha miyo m’murimani mwanga koma teto pempelo langa lochondelela wa Mulungu tiloi athu a tundwanga kavulumuchiwe. 2 Chifukwa ndinowapangela umboni ira mbovipeleka votumikela Mulungu, koma katinamuiziwa molondola. 3 Chifukwa yoi katinaiziwa vyongo vyevyo Mulungu unaviona liye ira pivyolungama, aluwa katinagonjela vyongovyo moi kanapanga vyongo vyevyo Mulungu unaviona liye ira kai vyolungama. 4 Kristu oomali-a Ilamulo, ira muthu uliwetene unoyo unamuroromela aoniwe kala olungama.

5 Mose alembile ira: “Muthu unoyo unapanga vyongo vyolungama mogwilizana na Ilamulo, unoza akaena moyo chifukwa ya malamulo.” 6 Koma voonga vya chilungamo ineyo inaza chifukwa ya iroromelo, Malemba kanaonga ira: “Kuonge m’murimani mwawo ira, ‘Kodi mbaani unoyo unaze adowe udimu?’ ira adowe amutiti-e Kristu. 7 Kapena, ‘Kodi mbaani unoyo unaze atitele wu zenje lodii-a vinjinji?’ ira adowe amuvenyi-e Kristu.” 8 Koma kodi lemba linaonga vyoi avi? Linaonga ira: “Mawu a ilamulwayo kali vakwikwi na nyo, kali muwano mwinyu na m’murimani mwinyu,” anala mba “mawu” a iroromelo anayo ninalaleela iyo. 9 Chifukwa akala unalengeza ‘mawu anayo kali muwanoni mwawo,’ oyi Yesu ngu Mbwiye, moi weyo unororomela m’murimani mwawo ira Mulungu oomuvenyi-a, unoza uvulumuwe. 10 Ira muthu akale olungama unafuneya kaana iroromelo m’murimani mwae, koma na vamulomo vae unolengeza vowela vya iroromelo yae ira avulumuwe.

11 Vale lemba limo-iliwa linaonga ira: “Muthu uliwetene unoyo unamuroromela kanaza akumudwa.” 12 Kavali iyana vaari va Muyuda na Mgiriki, voi athu etene anayo Mbwiiwa ngu m’mo-i, unoyo unapeleka mofunechecha wa athu etene anayo kanaitana va zina lae. 13 Chifukwa “muthu uliwetene unoyo unaitana va zina la Yehova* unoza avulumuwe.” 14 Komave, kodi unaitane avi va zina lae akala kanamuroromela? Unamuroromele avi akala kanavwevo vya liye? Nanga unavwe avi vya liye akala kavali muthu unoyo unalaleela? 15 Moi unalaleele avi akala karumiwe? Vili ngati mwemo Malemba kanaongelaathu ira: “Manyalo a athu anayo kanalengeza uthenga wapama wa vyongo vyapama, mboriya vinjinji.”

16 Koma kai athu etene anayo ka-arele uthenga wapama. Chifukwa Yesaya aongile ira: “Yehova,* kodi mbaani unoyo uroromele vyevyo naongile iyo?” 17 Eno muthu unokaana iroromelo chifukwa ya vyevyo uvwile liye. Moi vyevyo uvwile liye vinakumela m’mawu oonga vya Kristu. 18 Koma ndinafuna ndifuke ira, Kodi aluwa kativwile uthenga unola? Vale malemba kani “mawiwa koovweya vailambo yetene yavati, moi uthengiwa oovweya mpakana umagomi-edo ailambo yavati wewo uli athu.” 19 Koma teto ndinafuna ndifuke ira, Kodi kai vyoona ira Aisaraeli kooiziwa? Yowambeela Mose aongile ira: “Ndinoza ndipangi-e ira mukaena sanje vo-indi-eda chito athu anayo kai Aisaraeli. Ndinoza ndipangi-e ira mulunduwe vinjinji vo-indi-eda chito tundu wa athu oyi katin’na zelu.” 20 Koma Yesaya oowonga molimba murima vinjinji ira: “Athu anayo kandifwanyile mba athu oyi katandisaela. Ndooiziweya wa athu oyi katafukile vya miyo.” 21 Koma voonga vya Aisaraeli liye aongile ira: “Nditapula mandanga dambo letene wa athu o-ovwela koma teto amakani.”

11 Ndinafuna ndifuke ira, kodi Mulungu oowakoonda athwae? Naari. Voi miyo teto ndili Muisaraeli, m’mo-i wa a-ima* a Aburahamu, wa fuko la Benjamini. 2 Mulungu kaakoondile athwae anayo aasakulile liye vowambeela. Kodi nyo kamunaiziwa vyevyo lemba limo-iliwa linaongaathu vyokuza Eliya, vevo amuchondelele liye Mulungu chifukwa ya Aisaraeli? Liye aongile ira: 3 “Yehova,* aluwa koopha anamaongelinyu moi kogumula maguwinyu asembe moi miyo ndikede ala mekave. Teto kowambeela ndisaela ira kandiphe.” 4 Koma kodi Mulungu amuwandelile n’ni? Oomuwandela ira: “Miyo ndikaana athu 7 000 anayo katinakokorelevo Baala.” 5 Eno, vathawiila vikala teto athu amo-iwa oyeva anayo kasakuliwe chifukwa yooma murima ulukulu wa Mulungu. 6 Eno aluwa koosakuliwa chifukwa yooma murima wae ulukulu, katasakuliwe chifukwa ya chito diwa. Aakale ira kasakuliwe chifukwa ya chito diwa, oma murima ulukulu wa Mulungu kwaakala teto oma murima.

7 Ndiye nionge n’ni veva? Yongo ineyo Aisaraeli kanaifunechechaathu katiifwanyile, koma athu osakuliwa mbanayo kaifwanyile. Athu amo-iwa kooumi-a mirima diwa 8 ngati mwemo Malemba kanaongelaathu ira: “Mulungu uwapangi-a ira kagone mwauzimu, uwava-a maso o-oona na mabaru o-ovwa, mpakana peeno.” 9 Koma teto Davide aongile ira: “Tebulo liwa likale msampha, libwe lokwakwatuwi-a na ilango wa aluwa. 10 Maswiwa kakaena dima ira katione, moi orami-ani mitana diwa thawi detene.”

11 Ndinafuna ndifuke ira, kodi kookwakwatuwa mpakana fiya vogwa? Naari. Koma chifukwa yolakwa uwa athu a mitundu dimo-i kofwanya ipulumuso, moi vyevi vipangi-a ira olakwayo kakaena sanje. 12 Eno akala lakwa uwa unazi-a chuma muilambo moi yeva uwa unatapulela chuma wa athu a mitundu dimo-i, ndiye kuti vanoza vakale madaliso anjinji iwelengelo iwa yaza ikwakwanela.

13 Sopano ndinaonga na nyo athu a mitundu dimo-i. Voi miyo ndili namarumiwa orumiwa wa athu a mitundu dimo-i, ndinolemekeza utumikanga, 14 ira mwina ndinokoza pangi-a athu a tundwanga kaana sanje novulumuchavo amo-iwa mwa aluwa. 15 Chifukwa akala ilambo yagwilizani-iwe na Mulungu chifukwa yoi aluwa kookoondiwa, ndiye kuti kaza kawacheliwa vinaza vikala ngati kovenyi-iwa. 16 Koma teto, akala mbali ya mkate ineyo ipelekiwe sembe ngati ipaso yowambeela ili yowela, ndiye kuti mkate wetene ngowela. Moi akala michichi dili dowela, ndiye kuti thambi diwa teto tidowela.

17 Akala thambi dimo-i da tengo wa maolivi daduliwe, moi ngakale ira weyo uli thambi da tengo wa maolivi wamukokola, oolumikiziwa vaari va thambi do-ala moi oowambeela fwanya vyongo vyetene vyofuneya kumela wu michichi da tengo wa maoliviyo. 18 Eno kuwambeele viona ira uli ofuneya vinjinji kwaranya thambi dedo daduliwedo. Moi akala uwambeele viona ira uli ofuneya uumbuwelenga ira kai weyo unoyo unakami-a michichi, koma michichi tidedo dinaukami-a weyo. 19 Mwina unaonga ira: “Koodula thambi dimo-i ira kandilumikizevo miyo.” 20 Vyevi pivyoona. Aluwa kooduliwa chifukwa katan’na iroromelo, koma weyo uli olumikiziwa na tengoyo chifukwa ya iroromelo. Eno ambeela ova, moi u-iye vikuza. 21 Chifukwa akala Mulungu kalekelele thambi da ilengedwe, kanaza aulekelela teto weyo. 22 Uganizelenga oma murima koma teto uwali wa Mulungu. Athu anayo kagwile kootonyi-ediwa uwali, koma weyo ootonyi-ediwa oma murima wa Mulungu. Eno pitilizave kala ofwanelela tonyi-ediwa oma murima wae. Chifukwa akala kunapanga eno, nawen’ne teto unoza uduliwe. 23 Naaluwene teto akala kanaambeele kaana iroromelo, kanoza kalumikiziwe wu tengoyo, chifukwa Mulungu unokoza alumikiza nawili. 24 Akala weyo waduliwe wu tengo wa maolivi unoyo unamela mukokola, moi mosemphana na ilengedwe oolumikiziwa wu tengo wa maolivi oira zaliwa, kodi vinokoza kala vyorucha lumikiza thambido wu tengwiwa unoyo waduliwe?

25 Chifukwa abali kandinafuna ira mukale o-oiziwa vyaisisi yopatuleya inela, ovela ira munokoza vionanga ngati azelu. Isisi inela chiyoi Aisaraeli amo-iwa koumi-a mirima diwa moi kanopanga vyevi mpakana iwelengelo yetene ya athu okumela m’mitundu dimo-i ingakwakwanele. 26 Aisaraeli etene kanoza kavulumuchiwe mwandila inela mogwilizana na vyevyo Malemba kanaongaathu ira: “Mpulumusi unaza akumela mu Ziyoni moi unoza amali-e vyongo vyetene vyotakala vyo-olemekeza Mulungu vyevyo athu a fuko la Yakobo kanapangaathu. 27 Leli ti pangano lelo ndinaze miyo ndipange na aluwa ndaza ndiachosela machimwiwa.” 28 Pivyoona ira aluwa mba adani a uthenga wapama moi vyevi viukami-ani nyo. Koma Mulungu oowasakula moi unowaomeliwana chifukwa ya makolwiwa awale. 29 Mulungu kanaza aviimba mulandu chifukwa ya mphaso dedo unapeleka liye koma teto chifukwa yoi oowaitana. 30 Nyo wale mwali o-ovwela Mulungu, koma vathawiila mutonyi-ediwa chifundo chifukwa yoi aluwa katinavwela. 31 Vathawiila aluwa katinavwela moi vyevi vipangi-a ira Mulungu autonyi-edeni chifundo. Koma Mulungu unokoza atonyi-eda chifundo ngati mwemo apangele liye na nyo. 32 Mulungu ulola ira etene kakale akaidi o-ovwela ira aatonyi-ede chifundo.

33 Madaliso anayo Mulungu unapeleka liye mboinjiva vinjinji. Zelu dae ti dodii-a, koma teto liye ngoiziwa vyongo vinjinji. Viweluzo vyae pivyorucha vivwechecha, moi mbaani unoyo unakwakwani-e iziwa ndila dae? 34 “Mbaani unoyo unaiziwa maganizo a Yehova,* kapena mbaani unoyo unakale mulangizae?” 35 Kapena teto mbaani unoyo aambeele muva-a yongo, ira amuweli-ede? 36 Chifukwa vyongo vyetene vinakumela wa liye, moi liye ngunoyo avipangile koma teto pivyaae. Liye awachele ulemelelo mpakana walewale. Ame.

12 Eno abali, ndinaudandaulelani mwa chifundo ilukulu ya Mulungu ira mupeleke mathuthwinyu ngati sembe ya moyo, yowela koma teto yosomedeleya wa Mulungu, moi mupangenga utumiki opatuleya vo-indi-eda chito luso linyu loganiza. 2 Kamulandelenga* zelu da muthawiila,* koma kalani muthu musha vochenja vinjinji maganizwinyu, ira muzindikile ifunelo ya Mulungu, yapama, yosomedeleya wa liye na yangwilo.

3 Chifukwa yooma murima ulukulu wewo Mulungu anditonyi-ede liye, ndinauwandelani etene nyen’ne ira kamuganizenga ira muli ofuneya vinjinji kwaranya mwemo munafuneya nyo viganizela. Koma uliwetene aganizenga mwazelu moi aviweluzenga mogwilizana na iroromelo ineyo Mulungu umuva-ile liye. 4 Thuthu linokaana viwalo vinjinji, koma viwalovyo kavina-inda chito yofwanafwana. 5 Chimozimozi teto na iyo, ngakale ira nilivo anjinji, koma nili thuthu limo-i mwa Kristu moi nili viwalo vyolumikizana. 6 Nikaana mphaso do-iyana-iyana mogwilizana nooma murima ulukulu wewo Mulungu anitonyi-ede liye. Eno kaya niva-iwe mphaso ya ulosi, tiyemoni niloselenga mogwilizana na iroromelo yi-u. 7 Akala niva-iwe mphaso ya utumiki, tiyemoni nipangengave utumikiyo. Muthu unoyo unafunji-a, apitilize funji-a. 8 Muthu unoyo uva-iwe mphaso yolimbikisa, alimbikisenga. Muthu unoyo un’na mphaso yova-a, apitilizeve va-a mofunechecha. Unoyo unasogolela, asogolelenga mwatindi. Moi unoyo unatonyi-eda athu amo-iwa chifundo, apangenga vyevi mosangalala.

9 Chikondinyu kikale yachinyengo. Mutakaleliwenga na vyotakala moi muesaesenga panga vyapama. 10 Vowaomeliwana abali, mukaena chikondi yeniyeni. Vakhani yotonyi-edana ulemu, mukalenga owambeela. 11 Kalani atindi moi kamukale aulesi. Kalani achangu* mosogoleliwa na zimu owela. Tumikelani Yehova* monga akapolo. 12 Sangalalani na idedi-edo inyu. Pitilizani vilela mavuto. Mulimbi-edenga pempela. 13 Gaanani na abalinyu mogwilizana na vyevyo kanasauwelaathu. Kalani owachela alendo. 14 Pitilizani dalisa athu anayo kanauzuzumi-ani. Moi muwadalisenga, o-okala atembelela. 15 Musangalalenga na athu anayo kanasangalala moi muulenga na athu anayo kanaula. 16 Muonenga athu amo-iwa monga mwemo munavionela nyo. Kamuganizenga movikuza, koma kalani na murima oviyevi-a. Kamuvionenga ngati azelu.

17 Muthu aupangelani yotakala kamuweli-edenga yotakala. Mupangenga vyevyo athu etene kanavionaathu ira pivyapama. 18 Akala pivyowandeya, esaesani mwemo munawandele nyo ira mukalenga mwamurendele na athu etene. 19 Abalanga, kamuweli-edenga vyotakala, koma iyani ira Mulungu aze aweli-ede. Chifukwa Malemba kanaonga ira: “‘Weli-eda kwaanga, miyo ndinoza ndiweli-ede,’ uongile eno Yehova.”* 20 Koma “akala mdanawo un’na ndala, umuva-e yodja. Akala un’na thona, umuva-e yong’wa. Chifukwa wapanga eno unoza u-ele madime a mulo vamuru vae.”* 21 Kamulole ira yongo yotakala iugonji-eni, koma pitilizani gonji-a yongo yotakala vopanga yongo yapama.

13 Muthu uliwetene avwelenga olamulela alukulu alukulu, chifukwa kavali ulamulilo unoyo unakalevo akala Mulungu kaulolile. Olamulela anayo kalivo vathawiila kokaana maudindo o-iyana-iyana mololiwa na Mulungu. 2 Eno muthu unoyo unaruni-ana na olamulela, unaruni-ana na lamulo la Mulungu. Moi unoyo unaruni-ana na lamulo la Mulungu unoza awachele iweluzo. 3 Chifukwa olamulela kanoopi-a wa muthu unoyo unapanga vyongo vyotakala, o-okala wa muthu unoyo unapanga vyongo vyapama. Eno akala unafuna ira kuwaovenga olamulela pitiliza panga vyongo vyapama, moi olamulelayo kanoza kautamande. 4 Olamulelayo mba atumiki a Mulungu ira vyongo viuendele pama. Koma akala unapanga vyongo vyotakala, uwaovenga chifukwa yoi kokaana kopolo. Voi aluwa mba atumiki a Mulungu, kanooni-a uwali wa Mulunguyo wa muthu unoyo unapanga vyotakala.

5 Eno vikala chifukwa yapama yoi muwagonjelenga, o-okala chifukwa yoova langiwa koma chifukwa ya ikumbumtima inyu. 6 Mbaona teto munakhoma misonkho, voi aluwa mba achito a Mulungu anayo kanatumikela athu moi kanokwakwaneli-eda yolinga inela thawi detene. 7 Mupelekenga wa athu etene vyevyo kanafunaathu. Unoyo unafuna sonkho, muva-eni sonkho. Unoyo unafuna ndalama yaiphaso, muva-eni ndalama yaiphaso. Unoyo unafuna oviwa, muoveni. Unoyo unafuna va-iwa ulemu, muva-eni ulemu.

8 Kamukaena ngongole wa muthu uliwetene, koma muomeliwanenga voi unoyo unamuomeliwana muthu fwae ukwakwaneli-eda Ilamulo. 9 Chifukwa malamulo anayo kanaonga ira, “kupange igololo, kuphe muthu, kube, kusilile mwasanje,” koma teto malamulo amo-iwa anayo kalivo, kanakumela mulamulo limo-i loi: “Umuomeliwengana fwawo monga mwemo unaviomeliwana we wekave.” 10 Chikondi kinamulimbikisa muthu ira amupangele fwae vyotakala, koma chikondiyo inomukami-a muthu ira akwakwaneli-ede Ilamulo.

11 Mupangenga vyevi, simbwasimbwa chifukwa yoi munoiziwa, ira nili muthawi yoi munafuneya venya mukale maso, chifukwa thawi yoi nivulumuchiwe iandamela vinjinji iyana na thawi ineyo nakalile iyo ororomela. 12 Unde ukede ala vang’ono cha moi thawi ikede ala vang’ono ira ifiye mutana. Eno tiyemoni nikurule chito damudima moi niware vida vyowala. 13 Tiyemoni nikale na ikalelo yofwanelela monga athu anayo kanapanga vyongo mutana. Nipewenga panga maphwando otakala,* ng’wa mwauchidakwa,* iwerewere, ikalelo yookaana manyazi,* mikangano koma teto sanje. 14 Koma mumu-arelenga Mbwiye Yesu Kristu, moi kamupangenga vyongo vyevyo thuthu linalakalakaathu.

14 Muwacheleni pama muthu unoyo un’na iroromelo yofooka, koma kamumuweluze muthu unoyo un’na maganizo o-iyana na eenyu. 2 Muthu unoyo un’na iroromelo yolimba unodja yongo iliyetene, koma muthu unoyo un’na iroromelo yofooka unakeda dja vyamatakuru. 3 Muthu unoyo unadja yongo iliyetene, kamunyozenga muthu unoyo kanadja, moi muthu unoyo kanadja, kamuweluzenga muthu unoyo unadja yongo iliyetene, voi liye oowacheliwa na Mulungu. 4 Weyo uli mbaani ira umuweluze wachito wa fwawo? Ngu udindo wa bwanae muweluza ira ngolakwa kapena ngo-olakwa chifukwa Yehova* unokoza mukami-a ira vyongo vimuendele pama.

5 Muthu unoona dambo limo-i kala lofuneya kwaranya dambo limo-iliwa, koma muthu m’mo-iwa unoona ira malambo etene mbofwanafwana. Eno muthu uliwetene asimikizelenga ira vyevyo unaroromela liye pivyolondola. 6 Muthu unoyo unaona ira dambo limo-i tilofuneya unopanga vyevi vofuna mulemekeza Yehova.* Muthu unoyo unadja yodja iliyetene, unodja ira amulemekeze Yehova,* chifukwa unomuyamikela Mulungu. Moi unoyo kanadja, naliyene teto kanadja vofuna mulemekeza Yehova,* chifukwa unomuyamikela teto Mulungu. 7 Onga vyoona, kavali muthu unoyo unakala na moyo ira avilemekeze ekave, moi kavali muthu unoyo unakhwa ira avilemekeze ekave. 8 Akala nin’na moyo, ninokaana moyo ira nimulemekeze Yehova,* moi nakhwa, ninomukhwela Yehova.* Eno kaya nikaena moyo kapena nikhwe, nili a Yehova.* 9 Mbaona Kristu akhwile nokaana moyo nawili, ira akale Mbwiye wa okhwa koma teto amoyo.

10 Nanga chifukwa n’ni unamuweluza balawo? Kapena teto chifukwa n’ni unamunyoza balawo? Voi etene ninoza niimele vamaso vapando oweluzela milandu wa Mulungu. 11 Malemba kanaonga ira: “‘Miyo ndili Mulungu wamoyo,’ uongile eno Yehova,* ‘athu etene kanoza kandikokorele, moi athu etene kanoza kasomedele vowela ira miyo ndili Mulungu.’” 12 Eno uliwetene wa iyo unoza asomede ekave vamaso va Mulungu.

13 Eno kaniweluzanenga, koma m’malomwiwa simikizani murima ira kamunapanga yongo iliyetene ineyo inakumudwi-e kapena kwakwatuwi-a balinyu. 14 Ndinoiziwa moi ndinororomela mwa Mbwiye Yesu ira kavali yodja ineyo vaekiwa chotakali-iwa. Koma akala vali muthu unoyo unaona ira yodja imo-iwene chotakali-iwa, wa liye chotakali-iwa. 15 Chifukwa akala balinyu unakumudwa chifukwa ya yodja, ndiye kuti kamunamutonyi-eda chikondi. Kamumuononge* muthu unoyo Kristu amukhwele liye chifukwa ya vyodja vinyu. 16 Eno kamulole ira athu kaongenga vyotakala va vyongo vyapama vyevyo munapanga nyo. 17 Chifukwa ira muthu avolowe mu Umwene wa Mulungu yofuneya vinjinji kai dja kapena ng’wa, koma chilungamo, murendele na imwemwe vyevyo vinaza na zimu owela. 18 Muthu uliwetene unoyo unatumikela Kristu mwandila inela ngosomedeleya wa Mulungu moi athu kanosangalala na liye.

19 Eno tiyemoni niesaesenga kala mwamurendele koma teto limbikisana. 20 Iyani ononga chito ya Mulungu chifukwa ya vyodja. Pivyoona ira vyongo vyetene pivyowela, koma kulakwa dja vyongovyo akala vinamukumudwi-a muthu m’mo-iwa. 21 Chipama o-odja nyama kapena ng’wa vinyu kapena panga yongo iliyetene ineyo inamukumudwi-e balawo. 22 Iroromelo ineyo un’na we, ukaena vaari va weyo na Mulungu. Muthu unokala osangalala akala kanaviimba mulandu va vyongo vyevyo usakulile liye. 23 Koma akala muthuyo unadja akaikelanga, ukaana mulandu chifukwa unadja moosogoleliwa na iroromelo. Ndithu, yongo iliyetene yopangiwa moogwilizana na iroromelo ti chimo.

15 Iyo anayo nin’na iroromelo yolimba ninafuneya ganizelanga athu anayo kan’na iroromelo yofooka, o-okala kedanga panga vyongo vyonisangalasa eki-u. 2 Uliwetene wa iyo aesaesenga panga vyongo vyomusangalasa fwae moi apangenga vyongo vyomulimbikisa. 3 Chifukwa ngakale Kristu kaapanga vyongo vyomusangalasa ekave, koma oopanga vyevyo Malemba kanaongaathu ira: “Ibewe ya athu anayo kanaunyozani indifiyela.” 4 Vyongo vyetene vyevyo vyalembiwe wale vinjinji vyalembiwe ira vinilangize. Malembala kanonikami-a ira nivilelenga koma teto kanonilimbikisa na yolinga yoi nikaena idedi-edo. 5 Eno Mulungu unoyo unaniva-a kopolo ira niwande vilela koma teto unoyo unanimiyali-a, aukami-eni etene nyen’ne kaana maganizo anayo Kristu Yesu an’na liye, 6 ira etene koma teto mogwilizana, mumulemekeze Mulungu, Baba wa Mbwii-u Yesu Kristu.

7 Eno muwachelanenga, monga mwemo Kristu aniwachelele liye, ira Mulungu awachele ulemelelo. 8 Onga vyoona, Kristu ookala mtumiki wa athu oduliwa ira asimikizele ira Mulungu ngororomeleya votonyi-eda ira malonjezo anayo Mulungu aalonjezile liye makolwiwa mbosimikizeleya. 9 Koma teto ira athu a mitundu dimo-i kalemekeze Mulungu chifukwa ya chifundwae, mogwilizana na vyevyo Malemba kanaongaathu ira: “Chifukwa ya vyevi ndinoza ndiulemekezeni vaari va athu a mitundu dimo-i moi ndinoza ndiimbe nyimbo dotamanda zina linyu.” 10 Koma teto Malemba kanaonga ira: “Nyo athu a mitundu dimo-i, sangalalani vamo-i na athwae.” 11 Koma teto Malembayo kani: “Tamandani Yehova,* nyo athu a mitundu detene moi athu etene kamutamande.” 12 Koma teto Yesaya aongile ira: “Mufuko* la Jese, munoza mukume muthu m’mo-iwene ira aze alamulele mitundu. Idedi-edo ya athu a mitundu dimo-i inaza ikala va liye.” 13 Mulungu unoyo unauva-ani idedi-edo aukami-eni ira mukale osangalala vinjinji koma teto ira mukaena murendele vevo munamuroromela nyo, ira mukaena idedi-edo yakopolo mokami-iwa na zimu owela.

14 Abalanga, miyo kandinakaikela ira muli okozeya ira mupange vyapama, munoiziwa vyongo vyoinjiva koma teto munokoza langizana. 15 Komave, miyo ndiulembelani kalata yokaana makundo o-ovira m’mbali oyi kamunafuneya adiwala. Ndipanga vyevi chifukwa yooma murima ulukulu wewo Mulungu unditonyi-ede liye. 16 Oonditonyi-eda oma murima wewu ira ndi-inde chito yolengeza uthenga wapama wa Mulungu monga wachito wa Kristu Yesu, unoyo unatumikela athu a mitundu dimo-i. Ndino-inda chito yopatuleya inela ira athu a mitundu dimo-i kakale ngati sembe yosomedeleya wa Mulungu ineyo ipangi-iwe kala yowela vo-indi-eda chito zimu owela.

17 Eno ndinosangalala kala o-arela wa Kristu Yesu koma teto inda chito ya Mulungu. 18 Kandinaza ndionga yongo iliyetene ineyo ndipangile miyo vamekave, koma vyokaaevyo Kristu upangile liye koma teto onga zela mwa miyo ira ndikami-e athu a mitundu dimo-idiwa kala ovwela. 19 Aluwa kokala ovwela chifukwa ya vyodabwi-a vyakopolo koma teto vizindikilo vyevyo zimu wa Mulungu upangileathu. Eno ndilaleela mokwakwanela uthenga wapama oonga vya Kristu ambeela wu Yelusalemu mpakana wu Iluriko. 20 Vopanga vyevi ndoosimikiza murima ira kandilengeze uthenga wapama umalo oyi athu a wewo kooiziwa wale vya Kristu na yolinga yoi kandi-inde chito ineyo yaambeeliwe wale na muthu m’mo-iwa, 21 koma ira ndipange vyongo mogwilizana na vyevyo Malemba kanaongaathu ira: “Athu anayo katinawandeliwevo vya liye kanoza kamuone, moi anayo katinavwevo vya liye kanoza kazindikile.”

22 Mbaona ndikalile ndilepelanga za wa nyo. 23 Koma sopano kavali gawo loi kandifiilewo m’madela anala, moi wachaka dinjinji* ndikala ndilakalakanga ira ndize wewo. 24 Eno kandinakaikela ira ndaza ndidowanga wu Sipaniya ndinoza ndiuoneni moi ndaza ndikala na nyo wathawi yoyeva, ndinoza ndifune ira mundiveleele vang’ono va ulendwangoyo. 25 Koma vano ndinadowa wu Yelusalemu ira ndidowe ndaatumikele abali a wewo. 26 Abali awu Makedoniya na awu Akaya kopeleka mosangalala mphaso diwa wa abali amo-iwa awu Yelusalemu anayo mbosauwa. 27 Pivyoona ira aluwa kopanga vyevi mofuna mwiwa, komave aluwa kookaana ngongole wa abalayo. Chifukwa akala athu a mitundu dimo-i kawachelile vyongo vyauzimu kumela wa abalayo, ndiye kuti athu a mitundu dimo-idiwayo kanafuneya akami-a abalayo vowava-a vyongo vyofuneya vamoyo. 28 Eno ndamari-a peleka mphasodi, ndinoza ndivirele wewo vodowa wu Sipaniya. 29 Koma teto ndinoiziwa ira ndaza ndifiya wewo ndinoza ndifiye na madaliso oinjiva okumela wa Kristu.

30 Eno abali, ndinauvepani zela mwa Mbwii-u Yesu Kristu koma teto zela mu chikondi ya zimu owela, ira mulimbi-edenga ndipempelela wa Mulungu moi namiyene teto ndinolimbi-eda pempela. 31 Nilimbi-ede pempela ira ndidowe ndavulumuchiwe wa athu o-ororomeleya awu Yudeya koma teto ira abali awu Yelusalemu kadowe kawachele pama mphaso ineyo nditukulile miyo. 32 Akala Mulungu unalole, ndinoza ndize wa nyo mosangalala moi ninoza nilimbikisane. 33 Mulungu unoyo unapeleka murendele akale na etene nyen’ne. Ame.

16 Ndinafuna ndiuiziwi-eni vya murongoli-u Febe, unoyo unatumikela mupingo wawu Kenkereya. 2 Muwacheleni mwa Mbwiye monga mwemo munawachelela nyo abali amo-iwa koma teto mumuva-e likami-edo lililetene lelo unafuneya liye. Chifukwa naliyene teto oowateteza abali anjinji, tangani-avo miyo.

3 Mundipelekele moni wa Purisika na Akula, anayo kali achito afwanga votumikela Kristu Yesu. 4 Aluwa koo-ela moywiwa vangozi chifukwa ya miyo, moi miyo limo-i na mipingo detene na athu a mitundu dimo-i ninowayamikela. 5 Mundipelekele teto moni wu pingo unoyo unasonkana m’mba mwiwa. Moni wa Epeneto unoyo ndinamuomeliwana miyo, unoyo uli mugulu la ofunjeda owambeela a Kristu wu Asia. 6 Moni wa Mariya, unoyo ukalile a-indanga chito mwatindi voukami-ani. 7 Mundipelekele moni wa Anduroniko na Yuniya, anayo kali abalanga koma teto akaidi afwanga. Anala mba athu oiziweya vinjinji wa anamarumiwa koma teto kokala ogwilizana na Kristu wathawi indendai kwaranya miyo.

8 Mundipelekele moni wa Ampiliyato, unoyo ndinamuomeliwana miyo mwa Mbwiye. 9 Mundipelekele moni wa Uribano wachito fwi-u mwa Kristu koma teto mundipelekele moni wa Sitaku unoyo ndinamuomeliwana miyo. 10 Moni wa Apele, unoyo uli muthu ororomeleya mwa Kristu. Moni teto wa athu a m’banja la Arisitobulo. 11 Mundipelekele moni wa balanga Herodiona. Moni teto wa athu a m’banja la Narikiso anayo kali ofunjeda a Mbwiye. 12 Mundipelekele moni wa Turufena na Turufosa, a-iyana anayo kana-inda chito mwatindi votumikela Mbwiye. Moni wa Peresida, unoyo ninamuomeliwana iyo. Iyana unola u-inda chito mwatindi votumikela Mbwiye. 13 Mundipelekele moni wa Rufu, unoyo uli osakuliwa mwa Mbwiye. Mundipelekele teto moni wa m’mae unoyo ndinamuona miyo ngati m’manga. 14 Mundipelekele moni wa Asunkirito, Felego, Heme, Pateroba, Heremase koma teto abali anayo kali limo-i na aluwa. 15 Mundipelekele moni wa Filologo na Yuliya, Nerea na murongolae koma teto Olumpa na abali etene anayo kali limo-i na aluwa. 16 Muva-ane moni mwachikondi. Mipingo detene da Kristu dinopeleka moni.

17 Sopano abali ndinaulimbikisani ira, musamale na athu anayo kanapangi-a ira athu kagawaneyenga koma teto anayo kanapanga vyongo vyokumudwi-a amo-iwa. Vyevi pivyosemphana na vyevyo mwafunjedile nyo, eno muwapewenga. 18 Chifukwa athu anala katinatumikela Mbwii-u Yesu Kristu, koma kanotumikela vingulu viwa. Moi kano-indi-eda chito mawu okopa koma teto achinyengo ira kapusi-e athu oona murima. 19 Athu etene kanoiziwa ira muli ovwela moi chifukwa ya vyevi miyo ndinosangalala na nyo. Koma ninafuna ira mukale azelu va vyongo vyapama koma mukale athu o-oiziwa vyongo va vyongo vyotakala. 20 Mulungu unoyo unapeleka murendele unomuononga Satana vati va manyalwinyu chineneveva. Oma murima ulukulu wa Mbwii-u Yesu ukale na nyo.

21 Wachito fwanga Timoteyu unopeleka moni wa nyo, moi naliyene teto Lukiyo, Yasoni na Sosipato anayo kali abalanga kanopeleka moni.

22 Miyo Teritio, unoyo ndilembile kalatela, ndinopeleka teto moni mwa Mbwiye.

23 Gayo, unoyo ndinakala m’mba mwae koma teto unoyo pingo unasonkana vawaniwa, unopeleka moni. Naliyene teto Erasito oing’anela mzinda, na nchimwenae Kwarito kanopeleka moni. 24* ——

25 Mulungu unoulimbi-ani vo-indi-eda chito uthenga wapama unoyo ndinalengeza miyo koma teto uthenga oonga vya Yesu Kristu unoyo unalaleeliwa. Uthengola ngogwilizana na vyevyo viululiwe vyokuza isisi yopatuleya ineyo ikalile yobiseya wathawi indendai. 26 Koma sopano isisi inela iululiwa moi athu a mitundu detene kooiziwa zela m’maulosi ofwanyeya m’Malemba. Vyevi pivyogwilizana na lamulo la Mulungu unoyo unakalavo mpakana walewale. Yolingae choi athu a mitundu detene kamuvwelenga mwa iroromelo. 27 Mulungu unoyo, uli wazelu vinjinji, awachele ulemelelo mpakana walewale zela mwa Yesu Kristu. Ame.