N’nga Chin’ni Inakhami-e Banja Linyu Ira Likhale La Imwerumweru?

1. Phi vyofwanelela lembi-a ukhwati ira banja linyu likhale la imwerumweru?

Yehova ngu Mulungu wa milanyo daphama. Liye ngu Mulungu wa imwerumweru, thetho unafuna ira mabanja kakhale a imwerumweru. (1 Timoteyu 1:11) Liye ngwambeeli-ile banja. Thelana wolembi-a ukwati uboma unokhami-a banja ira likhale la imwerumweru mwasa woi unokhami-a banja na a-ima ira kakhale wothithi-edeya. Akiristu kanafuneela rii-eda malamulo awuboma olembi-a ukwati. — Welengani Luka 2:1, 4, 5.

N’nga Mulungu unawona avi banja? Liye unafuna ira mulombwana na mu-iyana thelana uwa ukhale wa dowa no dowa. Yehova unafuna ira mulombwana wothela na mu-iyana wotheliwa kakhalenga mororomelana. (Aheberi 13:4) Liye unoidanana no mwalana. (Malaki 2:16) Mbwenye liye unosomedela ira Akiristu kamwalane no thela vamo-i theliwa na m’mo-iwa akhala ira m’mo-i mwa aluwa wire raruwa. — Welengani Mateyu 19:3-6, 9.

2. N’nga mulombwana na mu-iyana othelana kanafuneyela kakhalenga moi avi?

Yehova oophanducha mulombwana na mu-iyana ira kakhami-edanenga m’banja. (Genesesi 2:18) Voi mulombwana wothela ngu muru wa banja, unafuneela athamaala athu a banja laye vowasayelela vokhala, vyodja na vyowara, no afunji-a vya Mulungu. Mulombwana wothela unafuneela akhaena zivelo la imbarimbari wa mu-iyanaye. Mulombwana na mu-iyana othelana kanafuneela kazivelanenga no ri-edana m’mo-i na fwaye. Voi mulombwana wothela na mu-iyana otheliwa mba athu o-olongomana, aluwa kanafuneela funjeda levelelana ira kakhale aimwerumweru m’banja. — Welengani Aifeso 4:31, 32; 5:22-25, 33; 1 Petulo 3:7.

3. N’nga banja la-aendenga phama chi phama keda mwalanavo?

Akhala nyo na fwinyo wa m’banjani kamunavwanana, munafuneela muyesayesenga thonyi-edana zivelo. (1 Akorinto 13:4, 5) Mazu a Mulungu kathinawandela athu ira kandundumazenga vofuna mali-a nyarwa da m’banjani. — Welengani 1 Akorinto 7:10-13.

4. A-ima, n’nga Mulungu unafuna n’ni wa nyo?

Yehova unafuna ira mukhalenga aimwerumweru. Liye unowuva-ani malango ofwanelela ira muwomeliwenga na uzombwinyu. Liye unafuna ira muganyaali na zelu na vyevyo makholwinyu viiziwileathu va ingumiwa. (Akolose 3:20) Yehova, onoyo uniphanduchile, unafuna ira mukhalenga aimwerumweru voira vyofuna vyaye na vya Mwanaye. — Welengani Namalaleya 11:9–12:1; Mateyu 19:13-15; 21:15, 16.

5. Anamabala, munakhami-ede avi a-iminyu ira kakhale aimwerumweru?

Nyo munafuneela muvilimbi-edenga afwanyela vyodja, nyumba na vyowara a-iminyu. (1 Timoteyu 5:8) Ira a-ima kakhale aimwerumweru, munafuneela muwafunji-e ira kaziveliwengana Mulungu no funjeda vya liye. (Aifeso 6:4) Lifwanafwani-edo linyu lozivela Mulungu linokhuza mirima da a-iminyu. Mwaafunji-anga a-iminyu Mazu okhumela wa Mulungu vinoakhami-eda ira kakhale na mawumbulelo aphama. — Welengani Dotoronomo 6:4-7; Miyambo 22:6.

A-iminyu kanowomeliwa mwaalimbi-anga no athamaalela. Aluwa thetho kanafuneela ira muwasumululenga no alanga. Vyevyo vyinowathithi-eda ira katikhayena makhalelo onoonga imwerumweruwa. (Miyambo 22:15) Mbwenye asumulula uwa kukhale ovalala na mwauwalanga. — Welengani Akolose 3:21.

A Mboni da Yehova kookhaana mabukhu owakhami-eda makholo na a-ima. Mabukhwala kanawonga vya m’Bayibulo. — Welengani Salimu 19:7, 11.