Mulungu Oolenga Athu Ambin’li Owambeela

Yehova oosakaeda munda wa Edeni. M’mundamo mookala maluwa na mitengo dinjinji. Mookala teto vinyama vyo-iyana-iyana. Vanduli viwa oo-indi-eda chito teya vomupanga muthu zina lae Adamu. Liye ookupeda mpweya m’phuno mwa Adamuyo. Munoiziwa vyevyo vyaireile? Muthuyo ookala na moyo. Oomuwandela ira aing’anelenga mundoyo koma teto ira ava-e mazina vinyama vya tundu uliwetene.

Koma Yehova oomuva-a teto lamulo lofuneya vinjinji loi: ‘Vipaso vyatengo uliwetene wa m’mundamu udjenga, patulavo vyatengo umo-i oka. Waza udja vipaso vyatengo unola unoza ukhwe.’

Vanduli viwa Yehova oonga ira: ‘Ndinafuna ndimupange fwae wa Adamu.’ Moi oomupangi-a Adamu gona vinjinji. Eno oomuchosa thiri moi oo-indi-eda chito thiriyo vomupangela iyana. Iyanoyo zina lae ali Hava. Eno Adamu na Hava kali banja lowambeela. Kodi Adamu avwile avi Mulungu angamupangele iyana? Oosangalala vinjinji moi oonga ira: ‘Ndinosangalala vinjinji ira Yehova u-indi-eda chito thiranga vondipangela iyana. Sopano ndiifwanya fwanga.’

Yehova oowawandela Adamu na Hava ira kakaena a-ima teto kazaale va ilambo yavati. Afuna ira athwayo ka-indenga chito limo-i mosangalala nosakaeda ilambo yetene ira ikale paradaiso oriya vinjinji ngati munda wa Edeni. Koma vyongo kavyaendile ngati mwemo Yehova mwafunela liye. Kodi munoiziwa chifukwa iwa? Ninoza nikambilane m’muru o-arela.