Adamu na Hava Katavwele Mulungu

Dambo limo-i Hava angali eka, nyowa yooza za ambeela onga na liye. Yoomufuka ira: ‘Pivyoona ira Mulungu ooukoondi-ani ira kamudje vipaso vyatengo uliwetene wa m’mundola?’ Hava oosomeda ira: ‘Akede niwandela ira kanidje vipaso vyatengo umo-i oka, moi ooniwandela ira naza nidja vipaso vyatengo unola ninoza nikhwe.’ Eno nyoweyo yoosomeda ira: ‘Nyo kamunaza mukhwa. Moi mwakeda dja vipaso vyatengo unola munoza mufwanafwane na Mulungu.’ Kodi vyevi vyali vyoona? Naari, vyali vyonama. Koma Hava oororomela vyevyo nyoweyo yaongileathu. Angaambeele ing’anechecha vipasovyo oowambeela visilila. Eno oocha ipaso ya tengoyo nodja teto oomuva-awo mamunae. Adamu ooiziwa ira akala kanavwele Mulungu unoza akhwe. Koma naliyene oodja.

Mazulo a dambo lelo, Yehova oonga na Adamu na Hava. Liye oowafuka ira chifukwa n’ni kamundivwele? Hava oosomeda ira nyowa chineyo indipangi-ile, teto Adamu oosomeda ira Hava ngunoyo undipangi-ile. Chifukwa yoi Adamu na Hava katavwele, Yehova oowatamangi-amo m’munda wa Edeni. Ira katiwelelemo, Yehova oo-ela angelo koma teto supada lokara mulo vamalo ovolowela m’mundamo.

Yehova oonga teto ira nyowa inoza ilangiwe. Koma-i kayali nyowa yeniyeni ineyo yaonga na Hava. Yehova kalengile nyowa ira ikwakwani-enga onga. Eno mgelo otakala ngunoyo apangi-ile ira nyoweyo iongenga. Oopanga vyevi vofuna munami-a Hava. Mgelo unola ngu Satana Mdyerekezi. Usogolowu, Yehova unoza amuononge na yolinga yoi kawelele nawili nami-a athu.