Yehova Oomusakula Yoswa

Mose oosogolela mtundu wa Aisaraeli wa chaka dinjinji. Eno anga-alile vang’ono khwa, Yehova oomuwandela ira: ‘Kai weyo unoyo unaze uwavolochi-e Aisaraeli mu ilambo yolonjeziwa. Koma ndinoza ndiuwoni-e ilambweyo.’ Vyangaireile eno Mose oomuvepa Yehova ira asakule sogoleli m’mo-iwa oyi aasogolelenga athwayo. Yehova oomuwandela ira: ‘Dowa wa Yoswa teto wamuwandele ira ngunoyo ndimusakulile miyo.’

Mose oowawandela Aisaraeli ira voi miyo ndikede ala vang’ono khwa, Yehova umusakula Yoswa ira ausogoleleni vovolowa mu ilambo yolonjeziwa. Eno, Mose oomuwandela Yoswa ira: ‘Kuove, Yehova unoukami-a.’ Vyangaireile eno Mose oodowa vadimu va mwango wa Nebo. Wewo Yehova oomuoni-a ilambo ineyo amulonjezile liye Aburahamu, Isaki na Yakobo. Moi Mose ookhwa anga’na chaka 120.

Vanduli viwa Yehova oomuwandela Yoswa ira: ‘Mulambuwe inje wa Yorodano novolowa mu ilambo ya Kanani. Ndinerenga ukami-a ngati mwemo ndapangela miyo na Mose. Uwelengenga malamulwanga dambo lililetene. Kala olimba murima teto kuove. Dowa wapange vyevyo ndiuwandele miyo.’

Yoswa ootumiza athu ambin’li ira kadowe kaone mzinda wa Yeriko. Mukhani yo-arela ninoza nione vyevyo vyaireile athwayo kangafiile wewo. Kangazilewo, aluwa koonga ira sopano yali thawi yoi Aisaraelayo kavolowe mu ilambo ya Kanani. Dambo lo-arela, Yoswa oowawandela Aisaraeli ira kamaruwe. Vanduli viwa oowawandela asembe anayo katukula likasa la pangano ira kasogole dowa u-inje wa Yorodano. Vathawi inela injeyo wali wangasefuwele. Koma asembayo kanganyingalile ma-injayo injeyo oowambeela uma. Aluwa kooenda dowa fiya vaari va injeyo moi kooimela vevo mpakana Aisaraeli etene koolambuwa. Mookaikela vyevi vyaireilevi vyakede aumbucha Aisaraeli vyevyo Yehova apangile liye va Nyanja Yofiila.

Kangaendile wa chaka dinjinji, sopano Aisaraeli koofiya mu ilambo yolonjeziwa. Aluwa koowambeela manga manyumba na mizinda. Koolima maminda nozala mphesa, vipaso na mbewu do-iyana-iyana. Onga vyoona yali ilambo yapama vinjinji.