Rute na Naomi

Vathawi imo-iwa, wu Isaraeli ookala ndala. Eno Naomi oomaruwa na mamunae koma teto a-imae aalombwana ambin’li dowa wu Mowabu. Kangali wewo mamunae wa Naomi ootatiya. A-imayale kootela a-iyana aimowabu teto a-iyanayo kali Rute na Olipa. Koma vangavirile thawi, teto a-ima etene aalombwanayo kootatiya.

Naomi oovwa ira wu Isaraeli ndala imala moi ooganiza vyowelela waniwa. Rute na Olipa koodowana limo-i koma kangali mundila, Naomi oowawandela ira: ‘Muli a-iyana apama vinjinji. Moowakami-a a-imanga koma teto miyo. Koma welelani waninyu wu Mowabu teto munokoza dowa teliwa nawili.’ Rute na Olipa koonga ira: ‘Ninouomeliwanani vinjinji moi kaninafuna ira ni-iyane.’ Naomi oowakanyi-eda ira kawele. Vamapeto viwa, Olipa oowela koma Rute ookoonda. Naomi oomuwandela Rute ira: ‘Kaona Olipa unaawelela wa athwae na milungu dae. Welela limo-i na liye, teto dowa unyumba ya am’mawo.’ Koma Rute oosomeda ira: ‘Kandinau-iyeni. Athwinyu kanoza kakale athwanga teto Mulungwinyu unoza akale Mulungwanga.’ Kodi munaganiza ira Naomi avwile avi Rute angaongile vyevi?

Naomi na Rute koofiya wu Isaraeli thawi yo-anda tirigu yangakede ambeela wene. Dambo limo-i Rute oodowa vurula tirigu m’munda mwa muthu m’mo-iwa wau Mowabu zina lae Boazi. Muthula ali mwana wa Rahabi. Angavwile vyoi Rute ali wau Mowabu koma unakalave na Naomi, oowawandela achitwae ira kamu-iyedenga tirigu m’mo-iwa ira atukule.

Dambo limo-i Rute angawelilewo mazulo, Naomi oomufuka ira: ‘Kodi peeno wadowile waani ovurula tirigu?’ Rute oosomeda ira: ‘M’munda mwa muthu m’mo-iwene zina lae Boazi.’ ‘Eno Naomi oonga ira: ‘Unola ngu balae wa mamunaga. Thawi detene udowenga umunda wa muthu unola limo-i na asikana amo-iwa. Kanaupangele vyaimbewe.’

Rute oodowa umunda wa Boazi mpakana vevo nyengo yo-anda tirigu yamaleleathu. Boazi oona ira Rute oo-inda chito mwatindi teto ali iyana wapama vinjinji. Walevo muthu atela iyana liye tatiya aanabale mwana na iyanoyo, balae wa muthuyo oomutela iyanoyo. Eno Boazi oomutela Rute. Aluwa koobala mwana zina lae Obedi. Afwae a Naomi koosangalala vinjinji. Aluwa koonga ira: ‘Yehova oouva-a Rute teto ukala aukami-anga vinjinji. Sopano uuva-a izuulu. Yehova atamandeye.’ Vanduli viwa Obedi ookala mbwiyae wa Mwene Davide.