Vyevyo Yefita Alonjezile Liye

Aisaraeli koo-iya teto mutumikela Yehova moi koowambeela lambela milungu donama. Vevo a Amoni kaaukeleathu nowambeela wana na aluwa, milungu donamadi kadaakami-ile. Aisaraeli koovuteya wa chaka dinjinji. Vanduli viwa koomuwandela Yehova ira: ‘Niuchimwelani, ninavepa ira munivulumuche wa adani-u.’ Vyangaireile eno, Aisaraeli koochosa mafano etene moi koowambeela nawili mulambela Yehova. Yehova kaafuna ira aluwa kakedenga zuzumave.

Eno athwayo koomusakula Yefita ira aasogolele vodowa wana na a Amoni. Yefita oomuwandela Yehova ira: ‘Mwanikami-a kwaranya vakondwela, ndinolonjeza ira ndinoza ndipeleke wa nyo muthu uliwetene wa m’mba mwanga unoyo unaze aambeele kuma za ndichingamela.’ Yehova oosomeda pempelo la Yefita moi Aisaraeli kookwaranya vakondweyo.

Vevo Yefita awelela liye waniwa, muthu owambeela muchingamela ali mwanae wa-iyana. Liye akede kaana mwana m’mo-i unoyo ba-i. Mwanaela oomuchingamela ainanga koma teto imba maseche. Kodi Yefita apangile avi? Liye ooumbuwela vyevyo alonjezile liye vile moi oonga ira: ‘M’mani mwananga! Undikumudwi-a. Ndoolonjeza wa Yehova moi ira ndikwakwaneli-ede vyevyo ndalonjezile miyo, ndinafuneya utumiza ira watumikelanga uihema wu Silo.’ Koma mwanaeyo oonga ira: ‘Babani munafuneya panga vyeyo mwalonjezile nyovyo. Ndinakeda vepa ira mundilole ira ndidowe umwango na afwanga wa medi min’li. Vanduli viwa ndize ndidowe uihemawo.’ Mwana wa Yefita ootumikela va ihema mororomeleya wa moywae wetene. Chaka iliyetene afwae koodowa wu Silo dowa muona.