Chimo la Mwene Davide

Sauli angakhwile, Davide ookala mwene. Liye oowambeela lamulela angan’na chaka 30. Dambo limo-i angali vadimu va nyumbae oona iyana woriya. Angasaelile oofwanya ira zina lae ali Bati-seba teto ali iyana wa Uriya. Davide oomuitani-a iyanoyo moi oogona na liye. Angazindikilile ira iyanoyo ngoembekezela, Davide oofwanya ndila yoi chimo lae kaliiziweye. Liye oomuwandela ndimuwa wa asilikali ira amu-ele Uriya usogolo nomu-iya ira aphiwe. Vi vyooireya moi Davide oomutela Bati-seba.

Koma Yehova oona vyetene vyevi. Kodi liye apangile avi? Liye oomutumiza Natani ira adowe akambilane na Davide vya khanila. Natani angafiile wa Davide oomuwandela ira: ‘Vookala muthu m’mo-iwa wolemela unoyo an’na khosa dinjinji koma teto vookala muthu m’mo-iwa wosauwa unoyo an’na khosa imo-i. Wosauwoyo ooiwomeliwana vinjinji khosaeyo. Eno muthu olemelole oowaka khosa ya muthu wosauwoyo ira teto ikale yaaye.’ Davide angavwile vyevi, oolunduwa vinjinji moi oonga ira: ‘Muthu unoyo unafuneela phiwa ba-i.’ Natani oomuwandela Davide ira: ‘Muthu wolemeloyo ngu nyo.’ Davide oozindikila vyevyo Natani atapulela liye teto oovivwela chisoni. Moi oonga ira: ‘Ndiichimwela Yehova.’ Chimo laeli loomuzi-ela mavuto Davide limo-i na banja lae. Yehova oopeleka ilango wa Davide koma kaamuphile chifukwa ooviyevi-a koma teto oolapa kumela vati va murima.

Davide oofuna manga kachisi wa Yehova. Koma Yehova oomusakula mwanae Solomo ira ngunoyo unaze amange kachisiyo. Davide oowambeela sonkani-a vyongo vyoi Solomo aze a-indi-ede chito vomanga. Liye oonga ira: ‘Kachisi wa Yehova unafuneya aze akale woriya vinjinji. Voi Solomo ngu mwana, ndinomukami-a fwanya vyongo vyomangela kachisila.’ Eno Davide oopeleka ndalama dinjinji doi dikami-e va chito yomanga kachisila. Oofwanya athu aluso koma teto oosonkani-a golide na siliva oinjiva. Teto oosonkani-a matabwa a tengo wa mkunguza okumela wu Turo na wu Sidoni. Davide anga-alile vang’ono khwa, oomuva-a Solomo pulani ya kachisi. Oonga ira: ‘Yehova oondiwandela ira ndiulembele pulanila. Kuove chifukwa liye unoukami-a. Limba murima teto ambeela inda chitwela.’