Yehova Oomukami-a Mwene Yehosafati

Yehosafati, ali mwene wa Yuda moi oogumula malo opelekela sembe a Baala koma teto oononga mafano etene a muilambweyo. Yehosafati afuna ira athu kaiziwe malamulo a Yehova. Eno ootumiza akalonga na Alevi ira kaafunji-e athu malamulo a Yehova mu Yuda mwetene.

Athu a muvilambo vyowandamana na Ayuda koova aukela chifukwa kooiziwa ira Yehova uli na aluwa. Athwayo mpakana koopeleka mphaso wa Mwene Yehosafati. Koma Amowabu, Aamoni na athu okumela wu Seiri kooza ira kawane na Ayuda. Va Yehosafati ooiziwa ira unafuneela kami-iwa na Yehova. Vyangaireile eno ooitani-a alombwana, a-iyana na a-ima ira kaze wu Yelusalemu. Athwayo kangafiile, liye oopempela ira: ‘Yehova, mo-okami-iwa na nyo kaninakwaranye va kondwela. Ninavepa ira munikami-e chifukwa kaninaiziwa yoi nipange.’

Yehova oosomeda pempelo leli ira: ‘Kamuove chifukwa ndinoukami- ani. Kalani m’malo mwinyu imelani noona ndiuvulumuchangani.’ Kodi Yehova aakami-ile avi?

Dambo lo-arela, Yehosafati oosakula athu oimba nowawandela ira kayendenga vasogolo va asilikali. Athwayo kooyenda kumela wu Yelusalemu mpakana wu Tekowa wewo waireele kondweyo.

Aluwa koomuimbela Yehova mokuwa moi liye oowavazela kondo athwae. Oopangi-a ira Amowabu na Aamoni kaambeele phana ekiwaekiwa moi kalivo unoyo avulumuwile. Yehova ooteteza Ayuda asilikali koma teto asembe. Athu amuvilambo vyowandamana na Ayuda koovwa vyevyo Yehova apangile liyevi moi kooiziwa ira liye unowakami-ave athwae. Kodi Yehova unavulumucha avi athwae? Unowavulumucha mundila do-iyana-iyana moi kanafuneya kami-iwa na athu ira apange vyevi.