Musikana Oomukami-a Ndimuwa wa Asilikali

Musikana m’mo-iwa wau Isaraeli oolandiwa dowa kala ngati kapolo wu Siriya wewo wali olapelana vinjinji na waniwa. Gulu la asilikali la Asuri ti lelo lamulandile musikanola. Wu Siriyawo a-inda chito wa ndimuwa wa asilikali zina lae Namani. Musikanola oolambela Yehova ngakale ira athu awewo kalambela milungu donama.

Namani ookaana marenda a makate moi oovwa voreya vinjinji. Musikanola oofunechecha mukami-a Namani. Eno oomuwandela bwanae wa mu-iyana ira: ‘Ndinomuiziwa unoyo unakwakwani-e aili-a abwanala. Muthuwa ngu Elisa moi unakala wu Isaraeli. Kandinakaikela unokoza aili-a.’

Iyanae wa Namani oomuwandela mamunae vyokuza khanila. Moi Namani oodowa wu Isaraeli ira aonane na Elisa. Angafiile wewo aganiza ira Elisa unomuva-a ulemu wavadela monga muthu olemekezeya. Koma Elisa kaaongile na liye. Akede mutumiza muzombwae ira amulonjele nomuwandela ira: ‘Dowani mwa-ambe maulendo 7 mu-inje wa Yorodano, mwapanga eno munoila.’

Angavwile vyevi, Namani oolunduwa vinjinji moi oonga ira: ‘Miyo ndaganiza ira namaongela unola unondiili-a voitana zina la Mulungwae koma teto endi-a ndanda lae wu na wu. Koma unandiwandela ira ndikede dowa u-inje nda-ambe? Kodi kanaiziwa ira wu Siriya ukala mi-inje kwaranya wu Isaraeli uno? Moi ndookoza dowa umi-inje da wani-u wewo dowa amba?’ Angaongile vyevi oomaruwa angali okumudwa liye dowanga.

Koma achitwae koomukami-a ira aiganizele pama khanila. Koomuwandela ira: ‘Kodi kamunapange iliyetene ineyo inaukami-eni ira muile? Vyevyo namaongelole viongile liye kai vyorucha. Mukede panga vyevyo uuwandeleni liyevyo.’ Namani oowavwela achitwae moi oodowa u-inje wa Yorodano dowa amba maulendo 7. Anga-ambile ulendo ogomi-eda akede ona ira marendayale koomala. Vyevi vingaireile oosangalala vinjinji moi oodowa wa Elisa dowa muyamikela. Oomuwandela ira: ‘Sopano ndiiziwa ira Yehova ngu Mulungu oona.’ Kodi munaganiza ira musikanole avwile avi angamuonile Namani azanga koma marendae kangamalile?