Ezara Oofunji-a Ilamulo ya Mulungu

Vali vangamalile chaka 70 kumela vevo Aisaraeli kaweleleathu wu Yelusalemu. Komave vookala Aisaraeli amo-iwa anayo kakalave m’madela amo-iwa amu umwene wa Perisiya. M’mo-i mwa athu anala ali Ezara teto oofunji-a athu Ilamulo ya Yehova. Ezara oovwa ira Aisaraeli amo-iwa anayo kakala wu Yelusalemu kata-arela Ilamulo. Eno ooganiza vyoi adowe ira aakami-e. Mwene Aritasasita oomuwandela ira: ‘Mulungu oouva-a zelu ira ufunji-enga Ilamulo yae. Dowa wu Yelusalemu teto unokoza mulanda uliwetene unoyo unafuna dowa na weyo.’ Ezara oogumana na athu etene anayo kafuna welela wu Yelusalemu. Aluwa koopempela wa Yehova ira aakami-e ira kaende pama va ulendola vanduli viwa koomaruwa.

Vangamalile medi 4 koofiya wu Yelusalemu. Akalonga koomuwandela Ezara ira: ‘Aisaraeli koo-iya muvwela Yehova moi kootela a-iyana anayo kanalambela milungu donama.’ Kodi Ezara apangile n’ni? Liye ookokora vamaso va athu etene nopempela ira: ‘Yehova, munipangela vyongo vinjinji, koma iyo niuchimwelani.’ Athwayo koolapa koma vookala vyongo vimo-i vyolakweya vyevyo kafuneyaathu ira kavikoze. Eno Ezara oosakula andimuwa na oweluza ira kaakami-e athwayo. Vevo vamalaathu medi taaru athu etene anayo katalambela Yehova kootamangi-iwa.

Sopano chaka 12 doovira. Vathawila Aisaraeli koomanga nawili mpanda wa Yelusalemu. Eno koosonkani-a athu nowambeela awelengela Ilamulo ya Mulungu. Ezara angakede ula buku la Ilamulo, athu etene kooimela. Liye ootamanda Yehova teto naaluwene athwayo koogweli-a manda votamanda Yehova. Vanduli viwa Ezara oowambeela awelengela Ilamulweyo moi athwayo koovuruwana mwachelu. Aluwa koosomedela ira kali kanga-iile mulambela Yehova moi kooula. Dambo lo-arela Ezara oopitiliza awelengela athwayo Ilamulweyo. Athwala koozindikila ira kafuneya panga Ikondwelelo ya Misasa moi thawi ineyo koowambeela kozeela.

Aisaraeli koopanga ikondwelelo wa malambo 7 moi koosangalala koma teto koomuyamikela Yehova vowava-a vyo-anda vinjinji. Vali vaanaireye Ikondwelelo ya Misasa ngati inela ambeela muthawi ya Yoswa. Ikondwelelo inela ingamalile, athwayo koosonkana nopempela ira: ‘Yehova, moonivulumucha uukapolo, moonidji-a muipululu koma teto mooniva-a ilambo yoriya. Koma iyo niikala niuchimwelangani moweli-eda weli-eda. Moonitumizela anamaongela koma kanaavwele. Komave moonilezela murima moi moosunga lonjezo linyu wa Aburahamu. Sopano ninoulonjezani ira ninerenga uvwelani.’ Kangaongile vyevi koolemba lonjezo liwalo moi akalonga, Alevi koma teto asembe koosimikizela lonjezoli na idindo iwa.