Elizabeti Ookaana Mwana

Vangamalile chaka 400 kumela vevo mpanda wa Yelusalemu wamangiweathu nawili, wasembe m’mo-iwa akala vakwikwi na mzinda wa Yelusalemu. Zina lae ali Zakariya teto iyanae ali Elizabeti. Aluwa kookala m’banja wa chaka dinjinji koma katan’na mwana. Dambo limo-i Zakariya apelekanga sembe munyumba yopatuleya, oomuona mgelo Gabirieli. Zakariya oova vinjinji, koma Gabirieli oomuwandela ira: ‘Kuove. Ndiuzelana uthenga wapama okumela wa Yehova. Iyanawo unoza akale na mwana teto uze umuva-e zina loi Yohani. Yehova unafuna ira Yohaniyo aze a-inde chito yavadela.’ Zakariya oofuka ira: ‘Ndinaroromele avi vyevyo muongile nyoovi? Miyo na iyananga nili okalamba moi kai vyowandeya ira nikaena mwana.’ Gabirieli oonga ira: ‘Mulungu ngunoyo undirumile ira ndize ndiuwandele vyevi. Koma voi kunaroromela, kunakwakwani-enga onga mpakana mwanoyo aze abaluwe.’

Zakariya ookala m’mba mopatuleyamo wa thawi yolapa. Eno angakumile, athu koofuna iziwa ineyo yamuchedwi-ile. Koma Zakariya kaakwakwani-a onga. Eno akede ambeela onga vo-indi-eda chito manda. Athwayo koozindikila ira liye uwachela uthenga okumela wa Mulungu.

Vangavirile thawi, vyevyo mgelole aongile liye vile vyooireya. Elizabeti ookala oembekezela moi vanduli viwa ookaana mwana wamulombwana. Afwae a Elizabeti koma teto abalae kooza zamuona mwanoyo teto koosangalala vinjinji. Eno Elizabeti owawandela ira: ‘Zina la mwanola ngu Yohani.’ Athwayo koonga ira: ‘Koma m’banja linyu kavili uliwetene unoyo un’na zina leli. Bwanji alande zina la babae loi Zakariya?’ Vingaireile eno, Zakariya oolemba ira: ‘Zina lae ngu Yohani.’ Angakede lemba vyevi, oowambeela onga. Khani ya mwanola yooiziweya mu Yudeya mwetene moi athu koodabwa koma teto koovifuka ira: ‘Kodi mwanola unaza akala woi avi aza aulukula?’

Zakariya oozaaliwa na zimu owela. Eno oonga ira: ‘Yehova atamandeye. Oomulonjeza Aburahamu ira unoza atumize Mesiya ira anivulumuche. Yohani unoza akale namaongela teto unoza asakaede ndila ya Mesiya.’

Vathawi inela, vyongo vimo-i vyodabwi-a vyoomuireela balae wa Elizabeti zina lae Mariya. M’muru o-arela ninoza nikambilane vyevyo vyaireile.