Yesu Ooili-a Muthu va Dambo la Sabata

Afarisi kooidana na Yesu moi koofuna ira kamufwanyele vifukwa ira kamumange. Aluwa kaonga ira Yesu kaafuneela ili-anga athu va dambo la Sabata. Va dambo limo-i la Sabata, Yesu oogumana na muthu o-oona unoyo akalelecha vepavepa musewu. Liye oowawandela ofunjedae ira: ‘Dedi-ani muone mwemwo kopolo da Mulungu ndinamukami-edeleathu muthula.’ Yesu ootapeda vati liye tukula teya tangani-a na mare kukala madogo. Vanduli viwa ootukula madogwayo no-ela m’maso mwa muthuyo nomuwandela ira: ‘Dowa wa-ambe wu tada la Siloamu.’ Muthuyo oodowa moi anga-ambile oowambeela ona.

Athu koodabwa vinjinji na vyevyo vyaireilevi moi koovifuka ira: ‘Kodi muthula ngunole akalelecha vepavepole kapena ula ngumo-iwa kanakeda fwanafwana?’ Muthuyo oosomeda ira: ‘Kamukaikele ngumiyene unoyo ndabaluwile o-oona!’ Athwayo koomufuka ira: ‘Sopano iireile chin’ni ira uwambeele ona?’ Angaafotokozele vyevyo vyaireile, koomulanda nomudowana wa Afarisi.

Muthuyo oowawandela Afarisayo ira: ‘Yesu ootukula teya na mare liye tangani-a kukala madogo nondi-ela m’maso moi vanduli viwa oondiwandela ira nda-ambe. Ndoodowa, moi ndanga-ambile ndoowambeela ona.’ Koma Afarisayo koonga ira: ‘Akala Yesu unaili-a athu va dambo la Sabata pivyovaela oneya ira kopolo dae kai dokumela wa Mulungu.’ Koma athu amo-i koonga ira: ‘Daakale ira kopolo dae kai dokumela wa Mulungu kaaili-enga athu.’

Afarisi koowaitana makolwae a muthuyo nowafuka ira: ‘Viandeile avi ira mwaninyu aambeele ona?’ Koma makolwayo koova chifukwa Afarisi koochosa musunagoge muthu uliwetene omuroromela Yesu. Eno kakede someda ira: ‘Kaninaiziwa. Mufukeni mwinyailoyo.’ Afarisayo koomufuka muthuyo vyofuka vinjinji mpakana liye oowasomeda ira: ‘Ndiuwandelani wale vyetene. Chifukwa n’ni munakeda ndifukave?’ Afarisayo koolunduwa na vyevi moi koomuvokeda unde.

Yesu oodowa wewo wali muthuyo moi oomufuka ira: ‘Kodi unomuroromela Mesiya?’ Muthuyo oosomeda ira: ‘Ee ndinokoza muroromela ndangamuiziwile.’ Yesu oomuwandela ira: ‘Miyo ndili Mesiya.’ Veva-i Yesu ootonyi-eda ira ali ooma murima. Ninaonga eno chifukwa yoi oomuili-a muthuyo koma teto oomukami-a ira akaena iroromelo.