Yesu Oomangiwa

Yesu na anamarumiwae koovira muigwa ya Kidironi nodowa umwango wa Maolivi. Va thawi yali ingakwaranyile 12 koloko ya ma-iyu moi mwedi wali wathuta. Kangafiile m’munda wa Gesemani Yesu oowawandela anamarumiwayo ira: “Garatini vevano miyo ndinafuna ndapempele.” Vanduli viwa oodowa vandendai na aluwa moi ookokora nowambeela pempela. Liye ookaana khawa vinjinji moi oopempela wa Yehova ira: “Vyofuna vinyu viireye.” Yehova ooruma mgelo ira amulimbikise Yesu. Angadowile vevo vali anamarumiwale, oofwanya anamarumiwa aralu kagonanga. Liye oowawandela ira: ‘Venyani! Ila kai thawi yoi mugonenga. Thawi ifiya yoi ndipelekiwe wa adani.’

Va-anavire thawi Yudasi oofiya angali na gulu la athu lotukula masupada na vibonga. Yesu na anamarumiwae koomeliwa dowa umunda wa Gesemani. Eno Yudasi ooiziwa ira Yesu unodowa afwanyeye wewo. Liye ali angaawandelile athwayo ira unodowa apange vimo-i viwa vyene ira aluwa kakwakwani-e muzindikila Yesu. Eno akede fiyeda vevo vali Yesu noonga ira: ‘Mucheluwe avi Mphuzisi?’ Vanduli viwa oomukisa. Koma Yesu oonga ira: ‘Yudasi, kodi unandipeleka vondikisa?’

Yesu oowandamela gululo nofuka ira: “Munamufuna mbaani?” Athwayo koosomeda ira: “Yesu wau Nazareti.” Eno liye oowasomeda ira: “Ngumiyo.” Koma athwayo koowelela munduli nogwa vati. Yesu oowafuka teto nawili ira: “Ndiongile ira munamufuna mbaani?” Aluwa koosomeda teto ira: “Yesu wau Nazareti.” Yesu oowawandela teto ira: ‘Ndiuwandelani ira, ngumiyo. A-iyeni ala kadowenga.’

Thawi ineyo Petulo ootukula supada lae nodula libaru la Makasi, unoyo ali wachito wa ndimuwa wa asembe. Koma Yesu olanda libarulo noli-ela vamalo viwa moi oomuili-a. Vanduli viwa oomuwandela Petulo ira: ‘Weli-eda supada lawo vamalo viwa. Waphanga athu na supada, nawene teto unoza uphiwe na supada.’ Asilikalayo koomu-inda Yesu nomumanga moi anamarumiwae kootawa. Vanduli viwa asilikalayo koomulanda Yesu nomudowana wa wasembe mulukulu, zina lae Anasi. Kangamufukile vyofuka koomutumiza wa Ndimuwa wa Asembe, zina lae Kayafa. Koma kodi anamarumiwale vyaamalele avi?