Yesu Oogumana na Athu Othota Somba

Vangavirile thawi kumela vevo Yesu agumanile liye na anamarumiwa, Petulo ooganiza vyodowa thota somba wu Nyanja ya Galileya. Tomasi, Yakobo na Yohani naaluwene teto koodowa. Aluwa koo-inda chito ma-iyu wetene koma kataphile iliyetene.

Ungachile, koomuona muthu m’mo-iwa angaimelile mpepetele mwa nyanja. Muthuyo oowafuka ira: ‘Koma mupha somba nyo?’ Aluwa koosomeda ira: “Naari.” Eno oowawandela ira: “Vokedani matavinyu umbali ya ndanda lodjana.” Kangairile eno kookola somba dinjinji moi koolepela dikokela ukumani. Thawi ineyo, Yohani oozindikila ira muthuyo ngu Yesu moi oonga ira: “Aaa kodi ngu nyo Mbwiyeni!” Petulo angakede vwa vyevi oolupela munyanjamo nowambeela sambilela dowa ukumani. Ofunjeda amo-iwayo koomu-arela vangalawa.

Kangafiile ukumani, koofwanya somba na mkate dingali vako. Yesu oowawandela ira kamuva-ewo somba dimo-i ira aenjedele yodjeyo. Vanduli viwa oowawandela ira: ‘Zani nidje yodja yamamawa.’

Kangamari-ile dja, Yesu oomufuka Petulo ira: ‘Kodi unondiomeliwana kwaranya chito yothota sombela?’ Petulo oosomeda ira: ‘Ee Mbwiyeni. Nyo teto munoiziwa vyevyo.’ Yesu oonga ira: ‘Dji-a a-ima a khosanga.’ Vanduli viwa Yesu oomufuka teto nawili ira: ‘Petulo kodi unondiomeliwana?’ Liye oosomeda ira: ‘Mbwiyeni nyo munoiziwa ira ndinowuomeliwani.’ Yesu oonga ira: “Weta a-ima a khosanga.” Eno oomufuka teto ulendo wanaralu moi Petulo oovwa chisoni nosomeda ira: ‘Mbwiyeni, nyo munoiziwa vyetene. Munoiziwa ira ndinowuomeliwani.’ Yesu oonga teto ira: “Dji-a a-ima a khosanga.” Vanduli viwa oomuwandela teto ira: “Pitiliza ndi-arela.”